নতুন দিল্লী, ২১ মে’(হি.স.)। প্ৰাক্তন প্ৰধানমন্ত্ৰী ৰাজীৱ গান্ধীৰ ৩৫ সংখ্যক মৃত্যু বাৰ্ষিকীত আজি বীৰ ভূমিত এখন শোক সভা অনুষ্ঠিত হয়। বীৰ ভূমিত কংগ্ৰেছৰ সভাপতি মল্লিকাৰ্জুন খাৰ্গে, কংগ্ৰেছ সংসদীয় দলৰ অধ্যক্ষ ছোনিয়া গান্ধী, লোকসভাৰ বিৰোধী দলপতি ৰাহুল গান্ধী আৰু কংগ্ৰেছৰ সাংসদ প্ৰিয়ংকা গান্ধী ভাদ্ৰাই তেওঁক শ্ৰদ্ধাঞ্জলি জ্ঞাপন কৰে। কংগ্ৰেছৰ কেইবাজনো জ্যেষ্ঠ নেতা, সাংসদ, কৰ্মীও উপস্থিত থাকে। প্ৰধানমন্ত্ৰী নৰেন্দ্ৰ মোদীয়েও ছ’চিয়েল মিডিয়া প্লেটফৰ্মত লিখিছে, “প্ৰাক্তন প্ৰধানমন্ত্ৰী শ্ৰী ৰাজীৱ গান্ধীক তেওঁৰ মৃত্যু বাৰ্ষিকীত শত শত শ্ৰদ্ধা”।
বীৰ ভূমিত অনুষ্ঠিত এই অনুষ্ঠানত ছোনিয়া গান্ধী, ৰাহুল গান্ধী, আৰু প্ৰিয়ংকা গান্ধী ভাদ্ৰাই ৰাজীৱ গান্ধীৰ স্মৃতিসৌধত পুষ্প অৰ্পণ কৰে আৰু এক মুহূৰ্ত মৌনতা অৱলম্বন কৰি তেওঁক শ্ৰদ্ধাঞ্জলি জনায়। খৰ্গে ৰাজীৱ গান্ধীক একবিংশ শতিকাত আধুনিক ভাৰতৰ ভেটি স্থাপন কৰা এজন দূৰদৰ্শী নেতা বুলি অভিহিত কৰে। তেওঁ কয় যে ৰাজীৱ গান্ধীয়ে যুৱ ভাৰতৰ শক্তিক বিশ্বাস কৰি ভোটদানৰ বয়স ২১ বছৰৰ পৰা ১৮ বছৰলৈ হ্ৰাস কৰি পঞ্চায়তসমূহক সবল কৰি প্ৰতিখন গাঁৱতে গণতন্ত্ৰক শক্তিশালী কৰি তুলিলে আৰু টেলিকমিউনিকেচন, তথ্য প্ৰযুক্তি, কম্পিউটাৰাইজেচনৰ জৰিয়তে ভাৰতক এক নতুন যুগত পথ প্ৰদৰ্শন কৰে।
ৰাহুল গান্ধীয়ে এক্সত পিতৃৰ সৈতে এখন পুৰণি ফটো শ্বেয়াৰ কৰি লিখিছে, পাপা, আপুনি সপোন দেখা দক্ষ, সমৃদ্ধিশালী আৰু শক্তিশালী ভাৰতক বাস্তৱায়িত কৰাৰ দায়িত্ব মই পালন কৰিম। আপোনাৰ শিক্ষা, আপোনাৰ মূল্যবোধ, আৰু আপোনাৰ স্মৃতি সদায় মোৰ লগত থাকিব।
কংগ্ৰেছৰ সাধাৰণ সম্পাদক (সংগঠন) কে.চি. ভেনুগোপালে কয় যে ৰাজীৱ গান্ধীয়ে তেওঁৰ ক্ষন্তেকীয়া কাৰ্যকালত ভাৰতৰ ৰূপান্তৰৰ বাবে এক শক্তিশালী ভেটি স্থাপন কৰিছিল। মহিলা, যুৱক-যুৱতী, দৰিদ্ৰ, আৰু অভাৱগ্ৰস্তসকলক সবলীকৰণ কৰা তেওঁৰ নীতিৰ প্ৰভাৱ আজিও দেখা যায়। ভেনুগোপালে কয় যে ৰাজীৱ গান্ধীয়ে ভাৰতৰ সাৰ্বভৌমত্ব আৰু অখণ্ডতা ৰক্ষা কৰি সৰ্বোচ্চ ত্যাগ কৰিছিল, যিটো ত্যাগ দেশে কেতিয়াও পাহৰিব নোৱাৰে।
ৰাজস্থানৰ প্ৰাক্তন মুখ্যমন্ত্ৰী অশোক গেহলটে কয় যে ৰাজীৱ গান্ধীয়ে বিজ্ঞান আৰু প্ৰযুক্তিৰ ক্ষেত্ৰত ডাঙৰ সপোন দেখিছিল আৰু ১৮ বছৰ বয়সত যুৱ প্ৰজন্মক ভোটাধিকাৰ প্ৰদান কৰি গণতন্ত্ৰত অংশগ্ৰহণ নিশ্চিত কৰিছিল।
কেৰালাৰ মুখ্যমন্ত্ৰী ভি.ডি. সতীশনে এক্সত লিখিছে যে আধুনিক ভাৰত গঢ়াত ৰাজীৱ গান্ধীয়ে ঐতিহাসিক ভূমিকা পালন কৰিছিল। তেওঁ পঞ্চায়তীৰাজ সংস্কাৰ ৰূপায়ণ কৰি গণতন্ত্ৰক শক্তিশালী কৰাৰ লগতে একবিংশ শতিকাৰ প্ৰত্যাহ্বানৰ বাবে দেশক প্ৰস্তুত কৰিছিল। তেওঁ কয় যে ৰাজীৱ গান্ধীৰ স্মৃতি আৰু চিন্তাই ভৱিষ্যত প্ৰজন্মক পথ প্ৰদৰ্শন কৰি যাব।
উল্লেখযোগ্য যে ১৯৯১ চনৰ ২১ মে’ত তামিলনাডুৰ শ্ৰীপেৰুম্বুদুৰত আত্মঘাতী বোমা বিস্ফোৰণত ৰাজীৱ গান্ধীৰ মৃত্যু হয়। ১৯৮৪ চনৰ পৰা ১৯৮৯ চনলৈ প্ৰধানমন্ত্ৰী হিচাপে কাৰ্যনিৰ্বাহ কৰা ৰাজীৱ গান্ধীক ভাৰতত তথ্য প্ৰযুক্তি আৰু দূৰসংযোগ বিপ্লৱৰ ভেটি স্থাপন কৰা অন্যতম নেতা হিচাপে গণ্য কৰা হয়। তেওঁৰ কাৰ্যকালত কম্পিউটাৰাইজেচন, দূৰসংযোগ সম্প্ৰসাৰণ, প্ৰশাসনিক আধুনিকীকৰণৰ দিশত বহু গুৰুত্বপূৰ্ণ পদক্ষেপ গ্ৰহণ কৰা হৈছিল।
হিন্দুস্থান সমাচাৰ / মনোজ কুমাৰ শইকীয়া
