নতুন দিল্লী, ২১ মে’ (হি.স.)। কেন্দ্ৰীয় কৃষি আৰু কৃষক কল্যাণ মন্ত্ৰী শিৱৰাজ সিং চৌহানে ৰাষ্ট্ৰসংঘৰ খাদ্য আৰু কৃষি সংস্থা (এফএঅ)ৰ দ্বাৰা সন্মানীয় কৃষি পদক প্ৰদানক প্ৰতিজন ভাৰতীয়ৰ বাবে এক গৌৰৱৰ মুহূৰ্ত বুলি অভিহিত কৰে।
বৃহস্পতিবাৰে ইনষ্টাগ্ৰামত চৌহানে নিজৰ আনন্দ প্ৰকাশ কৰি কয় যে প্ৰধানমন্ত্ৰী মোদীয়ে খাদ্য সুৰক্ষা নিশ্চিত, দৰিদ্ৰতা হ্ৰাস, কৃষি উৎপাদন আৰু উৎপাদনশীলতা বৃদ্ধি, বিশ্বৰ পৰা ক্ষুধা দূৰ কৰাৰ বাবে কৰা প্ৰচেষ্টাৰ বাবে এই সন্মান লাভ কৰিছে। আজি সমগ্ৰ বিশ্বই ভাৰতৰ এই প্ৰচেষ্টাসমূহৰ শলাগ লৈছে।
তেওঁ কয় যে এই সন্মান ভাৰতৰ কঠোৰ পৰিশ্ৰমী কৃষকৰ কঠোৰ পৰিশ্ৰম, আমাৰ মাটিৰ শক্তি, ভাৰতৰ ক্ৰমবৰ্ধমান বিশ্বব্যাপী প্ৰতিপত্তিৰ এক জীয়া সাক্ষ্য।
প্ৰধানমন্ত্ৰীৰ নেতৃত্বত ভাৰতে কৃষি উৎপাদন বৃদ্ধি, খাদ্য সুৰক্ষা শক্তিশালী কৰা, লাখ লাখ কৃষকৰ জীৱনত ইতিবাচক পৰিৱৰ্তন আনি, প্ৰাকৃতিক কৃষিৰ দৰে জনকল্যাণমূলক প্ৰচেষ্টাৰ জৰিয়তে বিশ্বৰ আগত এক নতুন আৰ্হি দাঙি ধৰিছে। আজি ভাৰতে বহনক্ষম উন্নয়নৰ লক্ষ্যত উপনীত হোৱাৰ ক্ষেত্ৰত বিশ্বৰ আগশাৰীৰ দেশ হিচাপে আত্মপ্ৰকাশ কৰিছে।
কৃষি মন্ত্ৰী চৌহানে কয় যে ক’ভিড-১৯ মহামাৰীৰ ভয়াৱহ সংকটৰ পিছত প্ৰায় ৮০ কোটি লোকক বিশ্বৰ সৰ্ববৃহৎ খাদ্য সুৰক্ষাৰ আৱৰণ প্ৰদান কৰা, ‘কিষাণ সন্মান নিধি’ৰ জৰিয়তে লাখ লাখ কৃষকক সহায় কৰা, আমাৰ জি-২০ ৰাষ্ট্ৰপতিত্বৰ সময়ছোৱাত কৃষি খাদ্য ব্যৱস্থাক বিশ্বৰ কাৰ্যসূচীত আগস্থানলৈ অনা এই সকলোবোৰ প্ৰধানমন্ত্ৰীৰ দূৰদৰ্শী নেতৃত্বৰ প্ৰমাণ। এই অদম্য সংকল্প আৰু ভাৰতৰ বিপ্লৱী ফ্লেগশ্বিপ পদক্ষেপৰ ব্যাপক প্ৰভাৱক এফ এ অ’ই প্ৰশংসা কৰিছে। ই এক নতুন ভাৰতৰ ক্ৰমবৰ্ধমান প্ৰতিপত্তিৰ প্ৰতীক, য’ত বিশ্বই ভাৰতৰ নীতি, নেতৃত্ব, মানৱীয় দৃষ্টিভংগীক সন্মান জনাইছে।
উল্লেখযোগ্য যে খাদ্য সুৰক্ষা, বহনক্ষম কৃষি, আৰু গ্ৰাম্য উন্নয়নৰ ক্ষেত্ৰত প্ৰধানমন্ত্ৰী মোডীৰ অৱদানৰ স্বীকৃতি স্বৰূপে এফ এ অ’ই তেওঁক সন্মানীয় ‘এগ্ৰিকোলা পদক’ৰে সন্মানিত কৰে। পাঁচখন দেশৰ ভ্ৰমণৰ অন্তিম পৰ্যায়ত মঙলবাৰে নিশা ইটালীত উপস্থিত হোৱা মোডীয়ে ৰোমত ৰাষ্ট্ৰসংঘৰ এফ এ অ’ৰ মুখ্য কাৰ্যালয়ত এফ এ অ’ৰ সঞ্চালক প্ৰধান ড০ কে ডংগিউৰ পৰা এই বঁটা লাভ কৰে।
হিন্দুস্থান সমাচাৰ / মনোজ কুমাৰ শইকীয়া
