নতুন দিল্লী, ২০ মে’(হি.স.)। কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰীয়ে অসমৰ ৪,১৭৮ কিলোমিটাৰ ৰাষ্ট্ৰীয় ঘাইপথ প্ৰকল্পৰ গুণগত মান আৰু ৰক্ষণাবেক্ষণৰ ওপৰত এক উচ্চ পৰ্যায়ৰ বৈঠকত পৰ্যালোচনা কৰে।
বুধবাৰে ইয়াত অনুষ্ঠিত হোৱা বৈঠকত কেন্দ্ৰীয় ৰাজ্যিক মন্ত্ৰী অজয় তামতা আৰু হৰ্ষ মালহোত্ৰাৰ লগতে ভাৰতীয় ৰাষ্ট্ৰীয় ঘাইপথ প্ৰাধিকৰণ (এন এইচ এ আই), পথ পৰিবহণ আৰু ঘাইপথ মন্ত্ৰালয়, প্ৰকল্প নিৰ্মাণ সংস্থাৰ বিষয়াসকলো উপস্থিত থাকে।
বৈঠকৰ সময়ত নীতিন গাডকাৰীয়ে প্ৰকল্পসমূহৰ স্থলভাগত ৰূপায়ণ ক্ষিপ্ৰতাৰে কৰা, গুণগত মানৰ নিৰীক্ষণ ব্যৱস্থা শক্তিশালী কৰা, আধুনিক নিৰ্মাণ কৌশল গ্ৰহণ কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ কয় যে পথৰ স্থায়িত্ব আৰু ভ্ৰমণৰ মান উন্নত কৰাৰ বাবে নিৰ্মাণ মানদণ্ডৰ কঠোৰ আনুগত্য অতি প্ৰয়োজনীয়।
কেন্দ্ৰীয় মন্ত্ৰীগৰাকীয়ে বাৰিষাৰ পূৰ্বৰ প্ৰস্তুতিক অগ্ৰাধিকাৰ দিবলৈও বিষয়াসকলক নিৰ্দেশ দিয়ে। তেওঁ বৰষুণৰ সময়ত যাতায়তৰ সুৰক্ষা নিশ্চিত কৰিবলৈ আৰু যাত্ৰীসকলৰ সুৰক্ষা নিশ্চিত কৰিবলৈ শক্তিশালী নিষ্কাশন ব্যৱস্থা, ঢাল সুৰক্ষা, আৰু দ্ৰুত সঁহাৰি ব্যৱস্থা গঢ়ি তোলাৰ আহ্বান জনায়।
হিন্দুস্থান সমাচাৰ / মনোজ কুমাৰ শইকীয়া
