ইম্ফল, ০২ মে' (হি.স.): মণিপুৰত নিৰাপত্তা বাহিনী আৰু আৰক্ষীয়ে চলোৱা পৃথক পৃথক ড্ৰাগছবিৰোধী অভিযানত ৭০০ গ্ৰামতকৈ অধিক সন্দেহজনক হেৰ’ইন জব্দ কৰাৰ লগতে দুজন লোকক গ্ৰেপ্তাৰ কৰা হৈছে।
প্ৰথমটো অভিযানত ১ মে’ত সেনাপতি জিলাৰ মৰাম আৰক্ষী থানাৰ অধীনস্থ কবিনাম এলেকাত অভিযান চলাই সাইকুল বজাৰৰ বাসিন্দা ২৫ বছৰীয়া মাংলেংথাং তুবোইক গ্ৰেপ্তাৰ কৰা হয়। তেওঁৰ পৰা ৫৫১ গ্ৰাম সন্দেহজনক হেৰ’ইন জব্দ কৰা হয়। লগতে এটা চাৰিচকীয়া বাহন আৰু এটা মোবাইল ফোনো জব্দ কৰা হৈছে।
আনটো অভিযানত ৩০ এপ্ৰিলত ইম্ফল ইষ্ট জিলাৰ লামলাই আৰক্ষী থানাৰ অধীনস্থ খাবেইছইস্থিত সাজিকোৱা জেল ৰোডত আৰক্ষীয়ে কাইৰাং খুমিডোক মায়াই লৈকাইৰ বাসিন্দা ২৮ বছৰীয়া মোহাম্মদ আনিছ খানক গ্ৰেপ্তাৰ কৰে। তেওঁৰ পৰা তিনিটা চাবোন বাকচত লুকুৱাই ৰখা ১৫৪ গ্ৰাম সন্দেহজনক হেৰ’ইন জব্দ কৰা হয়।
তদন্তৰ অংশ হিচাপে ১ মে’ত আৰক্ষীয়ে নংমেইবুঙ নাম্বাম চুথেকত থকা থৌনাওজাম দিলীপ কুমাৰৰ বাসগৃহত তালাচী চলাই, য’ত আঠটা অতিৰিক্ত চাবোন বাকচত ভৰ্তি সন্দেহজনক হেৰ’ইন উদ্ধাৰ কৰে।
আৰক্ষীয়ে জনায় যে ঘটনাটোৰ তদন্ত অব্যাহত আছে আৰু এই ড্ৰাগছ চোৰাং ব্যৱসায়ৰ সৈতে জড়িত আন লোকসকলৰ সন্ধান অব্যাহত আছে।
----------
হিন্দুস্থান সমাচাৰ / শ্ৰীপ্ৰকাশ
