নতুন দিল্লী, ১৯ মে’ (হি.স.)। দৰ্শনাৰ্থীৰ বাবে আধুনিক পাৰস্পৰিক ক্ৰিয়া-কলাপ বৃদ্ধি কৰাৰ লক্ষ্যৰে দিল্লীৰ টিন মূৰ্তি কমপ্লেক্সৰ প্ৰধানমন্ত্ৰী সংগ্ৰহালয়ত মঙলবাৰে তৃতীয়টো এআই চালিত ইন্টাৰেক্টিভ হ’ল’বক্স স্থাপন কৰা হয়।
এই অত্যাধুনিক প্ৰযুক্তিৰ জৰিয়তে দৰ্শকে এতিয়া মহাত্মা গান্ধীৰ হাইপাৰ-ৰিয়েলিষ্টিক থ্ৰীডি অৱতাৰৰ সৈতে জীৱন সদৃশ পাৰস্পৰিক ক্ৰিয়া-কলাপ অনুভৱ কৰিব পাৰিব আৰু প্ৰত্যক্ষ পাৰস্পৰিক ক্ৰিয়া-কলাপেৰে ইতিহাসৰ বিভিন্ন দিশৰ বিষয়ে জানিব পাৰিব।
এই নতুন প্ৰযুক্তিগত সংযোজনক লৈ আনন্দ প্ৰকাশ কৰি প্ৰধানমন্ত্ৰী সংগ্ৰহালয় আৰু পুথিভঁৰালৰ সঞ্চালক অশ্বনী লোহানীয়ে কয়, এই ধৰণৰ পদক্ষেপে প্ৰধানমন্ত্ৰী সংগ্ৰহালয়ৰ ভাৰতৰ ৰাজনৈতিক আৰু গণতান্ত্ৰিক ঐতিহ্যক সামগ্ৰিকভাৱে উপস্থাপন কৰাৰ প্ৰতিশ্ৰুতি আৰু অধিক শক্তিশালী কৰে। প্ৰযুক্তিৰ জৰিয়তে আমি অতীত আৰু ভৱিষ্যতৰ মাজত এখন সেতু নিৰ্মাণ কৰি আছো।
তেওঁ উল্লেখ কৰে যে নতুন এআই হ’ল’বক্স মুকলি কৰিলে নৱ প্ৰজন্মক ভাৰতৰ গৌৰৱময় ইতিহাস বুজি পোৱাত সহায় কৰাই নহয়, বিশ্বজুৰি ঐতিহাসিক ঐতিহ্য সংৰক্ষণ আৰু উপস্থাপনৰ ক্ষেত্ৰতো এক নতুন মানদণ্ড নিৰ্ধাৰণ কৰা হ’ব।
সংগ্ৰহালয়ত এআই প্ৰযুক্তিৰ ব্যৱহাৰ নতুন কথা নহয়। ইয়াৰ পূৰ্বে ভাৰতৰ আইৰন মেন চৰ্দাৰ বল্লভভাই পেটেল আৰু প্ৰাক্তন ৰাষ্ট্ৰপতি ড° এ পি জে আব্দুল কালামৰ এ আই চালিত হ'ল'বক্স সফলতাৰে স্থাপন কৰি জনসাধাৰণৰ ব্যাপক প্ৰশংসা লাভ কৰিছে। মহাত্মা গান্ধীৰ পিছত শীঘ্ৰে প্ৰাক্তন প্ৰধানমন্ত্ৰী অটল বিহাৰী বাজপেয়ীৰ হ’ল’বক্স স্থাপনৰ পৰিকল্পনা চলি আছে।
এই অনন্য সংগ্ৰহালয়ত ভাৰতৰ বিভিন্ন প্ৰধানমন্ত্ৰীৰ জীৱন, দৃষ্টিভংগী আৰু ৰাষ্ট্ৰ নিৰ্মাণৰ ক্ষেত্ৰত অৱদান প্ৰদৰ্শিত হৈছে।
হিন্দুস্থান সমাচাৰ / মনোজ কুমাৰ শইকীয়া
