নতুন দিল্লী, ১৯ মে’ (হি.স.)। ৰাষ্ট্ৰপতি দ্ৰৌপদী মুৰ্মু, উপ-ৰাষ্ট্ৰপতি চি.পি. ৰাধাকৃষ্ণন আৰু প্ৰধানমন্ত্ৰী নৰেন্দ্ৰ মোদীয়ে মঙলবাৰে উত্তৰাখণ্ডৰ প্ৰাক্তন মুখ্যমন্ত্ৰী বি.চি. খান্দুৰীৰ মৃত্যুত গভীৰ শোক প্ৰকাশ কৰি সামৰিক সেৱা আৰু ৰাজনীতিত তেওঁৰ উল্লেখযোগ্য অৱদানৰ কথা সোঁৱৰণ কৰে।
শোকবাৰ্তাত ৰাষ্ট্ৰপতি দ্ৰৌপদী মুৰ্মুৱে কয় যে উত্তৰাখণ্ডৰ প্ৰাক্তন মুখ্যমন্ত্ৰী তথা প্ৰাক্তন কেন্দ্ৰীয় মন্ত্ৰী মেজৰ জেনেৰেল (অৱসৰপ্ৰাপ্ত) বি.চি. খান্দুৰী গভীৰ দুখৰ বিষয়। ভাৰতীয় সেনাবাহিনীত সুখ্যাতিৰে সেৱা আগবঢ়োৱাৰ পিছত তেওঁ জনসেৱাত সততা, সৰলতা, স্বচ্ছতা, উন্নয়নৰ ৰাজনীতিৰ উদাহৰণ দাঙি ধৰিছিল। ৰাষ্ট্ৰপতিগৰাকীয়ে কয় যে দেশ আৰু উত্তৰাখণ্ডৰ উন্নয়ন, সুশাসন, জনকল্যাণৰ প্ৰতি তেওঁৰ দায়বদ্ধতা সদায় স্মৰণীয় হৈ থাকিব।
উপ-ৰাষ্ট্ৰপতি চি.পি. ৰাধাকৃষ্ণনে তেওঁৰ বাৰ্তাত কয় যে বি.চি. খান্দুৰীৰ মৃত্যুত দেশে হেৰুৱাইছে এজন বিশিষ্ট জোৱান, এজন সক্ষম প্ৰশাসক, আৰু বিৰল সততাৰ ৰাজনীতিবিদ। শেহতীয়াকৈ ডেৰাডুন ভ্ৰমণৰ সময়ত খাণ্ডুৰীক লগ পোৱা বুলি উপ-ৰাষ্ট্ৰপতিগৰাকীয়ে কয়, য’ত দুয়োজনে লোকসভাত সহযোগী হিচাপে দীৰ্ঘদিনীয়া সংগম স্মৰণ কৰে।
প্ৰধানমন্ত্ৰী নৰেন্দ্ৰ মোদীয়ে তেওঁৰ বাৰ্তাত উত্তৰাখণ্ডৰ প্ৰাক্তন মুখ্যমন্ত্ৰী মেজৰ জেনেৰেল (অৱসৰপ্ৰাপ্ত) ভূৱন চন্দ্ৰ খাণ্ডুৰীৰ মৃত্যুত শোক প্ৰকাশ কৰি কয় যে সশস্ত্ৰ বাহিনীৰ পৰা আৰম্ভ কৰি ৰাজনৈতিক ক্ষেত্ৰলৈ খাণ্ডুৰীৰ অৱদান অমূল্য আছিল আৰু সদায় স্মৰণীয় হৈ থাকিব। উত্তৰাখণ্ডৰ উন্নয়নৰ প্ৰতি খাণ্ডুৰীৰ অদম্য সমৰ্পণ মুখ্যমন্ত্ৰীৰ কাৰ্যকালত স্পষ্ট হৈ পৰিছিল বুলি প্ৰধানমন্ত্ৰীয়ে কয়। কেন্দ্ৰীয় মন্ত্ৰী হিচাপে তেওঁৰ কাৰ্যকালও প্ৰেৰণাদায়ক আছিল, আৰু সমগ্ৰ দেশতে সংযোগ উন্নত কৰাৰ বাবে তেওঁ অক্লান্ত প্ৰচেষ্টা চলাইছিল। তেওঁ কয় যে ‘সোণালী চতুৰ্ভুজ’ আৰু ৰাষ্ট্ৰীয় ঘাইপথ উন্নয়ন কাৰ্যসূচীৰ জৰিয়তে ভাৰতৰ পথ আন্তঃগাঁথনি ৰূপান্তৰিত কৰাত খাণ্ডুৰীৰ দূৰদৰ্শী অৱদান দেশৰ উন্নয়নৰ ইতিহাসত এক মাইলৰ খুঁটি হৈ থাকিব।
হিন্দুস্থান সমাচাৰ / অৰৱিন্দ
