নতুন দিল্লী, ১৭ মে’(হি.স.)। ছয়দিনীয়া পাঁচখন দেশ ভ্ৰমণৰ তৃতীয় দিনা ডাচ প্ৰধানমন্ত্ৰী ৰব জেটেনৰ সৈতে প্ৰধানমন্ত্ৰী নৰেন্দ্ৰ মোদীয়ে নেদাৰলেণ্ডৰ ঐতিহাসিক আফছলুইটডাইক বান্ধ পৰিদৰ্শন কৰে। এই ভ্ৰমণৰ সময়ত দুয়োগৰাকী নেতাই পানী ব্যৱস্থাপনা, বান নিয়ন্ত্ৰণ আৰু সাগৰৰ পানী জমা কৰি ভূমি আৰু মিঠা পানীৰ সম্পদৰ উন্নয়নৰ সৈতে জড়িত প্ৰকল্পসমূহৰ পৰ্যালোচনা কৰে।
এই তথ্য ছ’চিয়েল মিডিয়া প্লেটফৰ্ম এক্সত শ্বেয়াৰ কৰি প্ৰধানমন্ত্ৰীয়ে কয় যে জলসম্পদ ব্যৱস্থাপনা এনে এটা ক্ষেত্ৰ য’ত নেদাৰলেণ্ডে কামৰ অগ্ৰণী ভূমিকা লৈছে, আৰু ইয়াৰ পৰা বিশ্বই বহু কথা শিকিব পাৰে। তেওঁ আফছলুইটডাইক প্ৰকল্পৰ মূল বৈশিষ্ট্যসমূহ বুজি পোৱাৰ সুযোগ পোৱা বুলি কয় আৰু ইয়াৰ বাবে প্ৰধানমন্ত্ৰী ৰব জেটেনৰ প্ৰতি কৃতজ্ঞতা প্ৰকাশ কৰে।
প্ৰধানমন্ত্ৰীয়ে কয় যে ভাৰতে জলসিঞ্চন, বান নিয়ন্ত্ৰণ, আৰু আভ্যন্তৰীণ জলপথ নেটৱৰ্ক সম্প্ৰসাৰণৰ বাবে আধুনিক প্ৰযুক্তিৰ প্ৰসাৰৰ বাবে কাম কৰি আছে। জল ব্যৱস্থাপনাৰ ক্ষেত্ৰত ভাৰত আৰু নেদাৰলেণ্ডৰ মাজত সহযোগিতা আৰু অধিক শক্তিশালী কৰিব পৰা যাব।
বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালেও এই ভ্ৰমণক তাৎপৰ্যপূৰ্ণ বুলি অভিহিত কৰে। তেওঁ এক্সত লিখিছে যে প্ৰধানমন্ত্ৰী ৰব জেটেনৰ সৈতে প্ৰধানমন্ত্ৰী নৰেন্দ্ৰ মোদীয়ে ডাচ অভিযান্ত্ৰিক উৎকৰ্ষতা আৰু পানী ব্যৱস্থাপনা, বানপানী সুৰক্ষা, আৰু মিঠা পানী সংৰক্ষণৰ ক্ষেত্ৰত উদ্ভাৱনৰ প্ৰতীক আফছলুইটডাইক বান্ধ পৰিদৰ্শন কৰে।
তেওঁ লগতে কয় যে খাম্ভাট উপসাগৰৰ সমীপত এটা বৃহৎ মিঠা পানীৰ জলাশয় আৰু মথাউৰি গঢ়ি তোলাৰ লক্ষ্যৰে গুজৰাটৰ কল্পনাপ্ৰকল্পৰ বাবেও এই ভ্ৰমণ তাৎপৰ্যপূৰ্ণ। ইয়াৰ দ্বাৰা জলবায়ু অভিযোজন, জল প্ৰযুক্তি, আৰু বহনক্ষম আন্তঃগাঁথনিৰ ক্ষেত্ৰত ভাৰত-নেদাৰলেণ্ডৰ সহযোগিতাৰ বাবেও নতুন সম্ভাৱনাৰ সৃষ্টি হ’ব।
মন কৰিবলগীয়া যে আফছলুইটডাইক হৈছে ১৯২৭ চনৰ পৰা ১৯৩২ চনৰ ভিতৰত নিৰ্মাণ কৰা নেদাৰলেণ্ডৰ এটা প্ৰধান বান্ধ আৰু দলং ।প্ৰায় ৩২ কিলোমিটাৰ দৈৰ্ঘ্যৰ এই বান্ধটোৱে উত্তৰ হলণ্ডৰ ডেন অ’ভাৰ গাঁওখনক ফ্ৰাইছলেণ্ড প্ৰদেশৰ জুৰিখ গাঁৱৰ সৈতে সংযোগ কৰিছে। এই বান্ধটোৱে উত্তৰ সাগৰৰ নিমখীয়া পানীৰ উপসাগৰ জুইডাৰজীক জব্দ কৰি আইজেচেলমিৰ নামৰ এটা বৃহৎ মিঠা পানীৰ হ্ৰদলৈ ৰূপান্তৰিত কৰে।
এই প্ৰকল্পটোক নেদাৰলেণ্ডৰ অন্যতম গুৰুত্বপূৰ্ণ পানী ব্যৱস্থাপনা আৰু ভূমি পুনৰুদ্ধাৰ প্ৰকল্প হিচাপে গণ্য কৰা হয়। আফছলুইটডাইক বান্ধ নিৰ্মাণৰ ফলত সাগৰৰ বানপানীৰ আশংকা হ্ৰাস পায় আৰু কৃষি, খোৱাপানী, আৰু পৰিবহণৰ বাবে নতুন সুযোগ মুকলি হয়। এই মথাউৰিটোৱে দেশৰ উত্তৰ আৰু পশ্চিম অংশৰ মাজত এক প্ৰধান পথ সংযোগ হিচাপেও কাম কৰে।
১৯৫৩ চনত উত্তৰ সাগৰৰ বিধ্বংসী বানপানীৰ পিছত বান্ধটোৰ উচ্চতা কেইবাটাও পৰ্যায়ত বৃদ্ধি কৰা হয়। ২০১৯ চনত ধুমুহাৰ ঢৌ আৰু জলবায়ু পৰিৱৰ্তনে সৃষ্টি কৰা প্ৰত্যাহ্বানসমূহ মোকাবিলা কৰিবলৈ ব্যাপক আধুনিকীকৰণ আৰু শক্তিশালীকৰণৰ কাম আৰম্ভ হয়।
হিন্দুস্থান সমাচাৰ / মনোজ কুমাৰ শইকীয়া
