ৰায়পুৰ, ১৬ মে’(হি.স.)। চৰকাৰী ব্যয় হ্ৰাস আৰু আৰ্থিক অনুশাসন বজাই ৰখাৰ বাবে ছত্তীশগড় চৰকাৰে কঠোৰ নিৰ্দেশনা জাৰি কৰিছে। বিত্ত বিভাগে জাৰি কৰা এই আদেশ ২০২৬ চনৰ ৩০ ছেপ্টেম্বৰলৈকে কাৰ্যকৰী হৈ থাকিব।
বিত্ত বিভাগৰ সচিব ড০ ৰোহিত যাদৱে জাৰি কৰা এই নিৰ্দেশনাৰ লক্ষ্য হৈছে ৰাজ্যৰ বিত্তীয় সম্পদসমূহ দক্ষতাৰে পৰিচালনা কৰা আৰু ৰাজহুৱা ব্যয়ত অনুশাসন স্থাপন কৰা। এই নিৰ্দেশনাসমূহ তাৎক্ষণিকভাৱে কাৰ্যকৰী কৰা হৈছে আৰু ২০২৬ চনৰ ৩০ ছেপ্টেম্বৰলৈকে কাৰ্যকৰী হৈ থাকিব।এই নিৰ্দেশনা অনুসৰি মুখ্যমন্ত্ৰী, মন্ত্ৰী পৰিষদ, আৰু নিগম, ব’ৰ্ড, আৰু আয়োগৰ বিষয়াসকলৰ কনভয়ত কেৱল অত্যাৱশ্যকীয় বাহন ব্যৱহাৰ কৰা হ’ব। অন্যান্য চৰকাৰী সম্পদৰ বিবেচনাপূৰ্ণ ব্যৱহাৰো নিশ্চিত কৰা হ’ব।
ৰাজ্য চৰকাৰৰ বাহনসমূহক ক্ৰমান্বয়ে বৈদ্যুতিক বাহনলৈ ৰূপান্তৰিত কৰাৰ বাবে প্ৰয়োজনীয় ব্যৱস্থা গ্ৰহণৰ নিৰ্দেশনা দিয়া হৈছে, যাৰ ফলত ইন্ধনৰ খৰচ হ্ৰাস পাব আৰু পৰিৱেশ সুৰক্ষাৰ প্ৰসাৰ ঘটিব। পেট্ৰল আৰু ডিজেলৰ ব্যয় নূন্যতম স্তৰত ৰখাৰ নিৰ্দেশনা দিয়া হৈছে। একে দিশত যাত্ৰা কৰা বিষয়াসকলৰ বাবে বাহন পুলিং ব্যৱস্থা ৰূপায়ণ কৰা হ’ব।
অত্যন্ত অনিবাৰ্য পৰিস্থিতিৰ বাহিৰে ৰাজ্য চৰকাৰৰ খৰচত চৰকাৰী কৰ্মচাৰীৰ বিদেশ ভ্ৰমণৰ ওপৰত সম্পূৰ্ণ নিষেধাজ্ঞা আৰোপ কৰা হ’ব। প্ৰয়োজন হ’লে মুখ্যমন্ত্ৰীৰ পূৰ্ব অনুমতি বাধ্যতামূলক হ’ব।
ভৌতিক সভাৰ সলনি ভাৰ্চুৱেল আৰু অনলাইন মিটিংৰ প্ৰচাৰ কৰা হ’ব। এই নিৰ্দেশনা অনুসৰি মাহত এবাৰহে শাৰীৰিক বৈঠক অনুষ্ঠিত হ’ব, যিমানদূৰ সম্ভৱ, বিভাগীয় পৰ্যালোচনা বৈঠক ভিডিঅ’ কনফাৰেন্সিঙৰ জৰিয়তে অনুষ্ঠিত হ’ব। সকলো বৈদ্যুতিক সঁজুলি—যেনে লাইট, ফেন, এয়াৰ কণ্ডিচনাৰ, আৰু কম্পিউটাৰ—কাৰ্যালয়ৰ সময়ৰ পিছত বাধ্যতামূলকভাৱে বন্ধ কৰা হ’ব। চৰকাৰী ভৱনত শক্তিৰ অপচয় ৰোধৰ বাবে প্ৰয়োজনীয় ব্যৱস্থা গ্ৰহণ কৰা হ’ব।
ছপা নথি-পত্ৰৰ পৰিৱৰ্তে বৈঠকত ইলেক্ট্ৰনিক ফাইল (পিডিএফ, পিপিটি আদি) ব্যৱহাৰ কৰা হ’ব। ইয়াৰ উপৰিও কাগজ আৰু ষ্টেচনাৰীৰ ব্যয় হ্ৰাস কৰাৰ বাবে ই-অফিচৰ জৰিয়তে চৰকাৰী চিঠিপত্ৰ আৰু টোকা লোৱাৰ ব্যৱস্থা কৰা হ’ব। শাৰীৰিক প্ৰশিক্ষণৰ ঠাইত প্ৰশিক্ষণ কাৰ্যসূচী প্ৰচাৰৰ বাবে ব্যৱহাৰ কৰা হ’ব আইগট (iGOT) কৰ্মযোগী পৰ্টেল। বিভাগসমূহক নিজৰ প্ৰশিক্ষণ পাঠ্যক্ৰম এই পৰ্টেলত আপলোড কৰিবলৈ নিৰ্দেশ দিয়া হৈছে।
এই নিৰ্দেশনাসমূহ কঠোৰভাৱে পালন কৰাটো নিশ্চিত কৰিবলৈ বিত্ত বিভাগে সংশ্লিষ্ট সকলো বিষয়াক নিৰ্দেশ দিছে। চৰকাৰৰ মতে এই ব্যৱস্থাৰ দ্বাৰা চৰকাৰী ব্যয় হ্ৰাস পোৱাই নহয়, প্ৰশাসনিক দক্ষতা আৰু জবাবদিহিতাও যথেষ্ট উন্নত হ’ব।
হিন্দুস্থান সমাচাৰ / মনোজ কুমাৰ শইকীয়া
