গোলাঘাট, ১৫ মে’ (হি.স.)। গোলাঘাট জিলাৰ সৰুপথাৰ সম-জিলাৰ বৰপথাৰ আৰক্ষী থানাৰ অন্তৰ্গত অভংপথাৰত যোৱাকালি বৃহস্পতিবাৰে নিশা সংঘটিত হয় এক লোমহর্ষক হত্যাকাণ্ডৰ ঘটনা । অভিযোগ অনুসৰি, কনিষ্ঠ ভাতৃ ললিত গগৈ অৰ্থাৎ দদৌ গগৈয়ে হত্যা কৰে নিজৰ জ্যেষ্ঠ ভাতৃ দিলীপ গগৈক ।

পৰিয়ালিক সূত্রে জানিব পৰা মতে,দুয়ো ভাইৰ মাজত সুৰাক কেন্দ্ৰ কৰি সৃষ্টি হৈছিল তীব্ৰ বাক-বিতণ্ডা । পাছত সেই কাজিয়াই ভয়ংকৰ ৰূপ লয় আৰু সংঘটিত হয় এই হত্যাকাণ্ড । ঘটনাৰ পিছতেই অভিযুক্ত ললিত গগৈয়ে বৰপথাৰ আৰক্ষী থানাত আত্মসমর্পণ কৰা বুলি জানিব পৰা গৈছে । ইতিমধ্যে আৰক্ষীয়ে ঘটনাৰ তদন্ত আৰম্ভ কৰিছে । একেটা পৰিয়ালৰ দুজন ভাইৰ মাজত সংঘটিত এই শোকাবহ ঘটনাই অঞ্চলজুৰি সৃষ্টি কৰিছে তীব্ৰ চাঞ্চল্য । সুৰাৰ বাবেই এই হত্যাকাণ্ড সংঘটিত হোৱা বুলি প্ৰাথমিকভাৱে সন্দেহ প্ৰকাশ কৰিছে স্থানীয় লোকে । ঘটনাক লৈ আৰক্ষীৰ তদন্ত অব্যাহত আছে ।

---------------

হিন্দুস্থান সমাচাৰ / নিৰ্মলেন্দু