বৰ্তমান ‘কান চলচ্চিত্ৰ মহোৎসৱ ২০২৬’ত গ্লেমাৰাছ লুকৰ বাবে বাতৰিৰ শিৰোনাম দখল কৰিছে অভিনেত্ৰী আলিয়া ভাটে। এটা প্ৰখ্যাত বিউটি ব্ৰেণ্ডৰ এম্বেছাদৰ হিচাপে এই অনুষ্ঠানত অংশগ্ৰহণ কৰিছিল অভিনেত্ৰীগৰাকীয়ে। ইফালে ৰেড কাৰ্পেটৰ পৰা তেওঁৰ এটা ভিডিঅ’ ছ’চিয়েল মিডিয়াত ভাইৰেল হোৱাৰ ফলত একাংশ ইণ্টাৰনেট ব্যৱহাৰকাৰীয়ে দাবী কৰে যে আন্তঃৰাষ্ট্ৰীয় সংবাদ মাধ্যমে তেওঁক প্ৰাপ্য মনোযোগ নিদিলে। ইয়াৰ বাবেই অভিনেত্ৰীগৰাকীক ছ’চিয়েল মিডিয়াতো ট্ৰ’ল কৰা হৈছিল।

এতিয়া আলিয়াৰ সমৰ্থনত ওলাই আহিছে অভিনেতা আলী গনি। নিজৰ ইনষ্টাগ্ৰামত আলিয়াৰ ভিডিঅ’ শ্বেয়াৰ কৰি তেওঁ লিখিছে যে বিশ্বৰ মঞ্চত ভাৰতৰ স্বীকৃতি অনাৰ বাবে ইমান কষ্ট কৰা এগৰাকী শিল্পীক যেতিয়া তেওঁৰ নিজৰ মানুহে হেয়জ্ঞান কৰিবলৈ চেষ্টা কৰে তেতিয়া দুখ লাগে। আলীয়ে কয় যে আলিয়াই নিজৰ কেৰিয়াৰত এনে উচ্চতা লাভ কৰিছে যিবোৰ মানুহে কেৱল সপোনহে দেখে, আৰু মানুহে তেওঁক উপহাস কৰাৰ পৰিৱৰ্তে আনন্দ উদযাপন কৰা উচিত।

দৰাচলতে ভাইৰেল ভিডিঅ’টোত আলিয়াই ৰেড কাৰ্পেটত হাঁহি হাঁহি কেমেৰাৰ সন্মুখত পোজ দিয়া দেখা গৈছে। একাংশ ছ’চিয়েল মিডিয়া ব্যৱহাৰকাৰীয়ে বিদেশী পাপাৰাজীৰ পৰা বিশেষ প্ৰতিক্ৰিয়া পোৱা নাছিল বুলি দাবী কৰাৰ বিপৰীতে বহু অনুৰাগীয়ে অভিনেত্ৰীগৰাকীৰ আত্মবিশ্বাস আৰু শৈলীক প্ৰশংসা কৰে। ভিডিঅ’টোত আলিয়াই সংবাদ মাধ্যমক উৰণীয়া চুমা এটা উৰুৱাই দিয়া আৰু আত্মবিশ্বাসেৰে ৰেড কাৰ্পেটত খোজ কাঢ়ি যোৱা দেখা গৈছে।

হিন্দুস্থান সমাচাৰ / অৰৱিন্দ