সমগ্ৰ বিশ্বতে মে হু পঞ্জাব শ্লোগান উত্থাপন কৰা বিখ্যাত পাঞ্জাবী গায়ক তথা অভিনেতা দিলজিৎ দোসাঞ্জে বৰ্তমান এক নতুন বিতৰ্কিত বাতৰিৰ বাবে বাতৰিৰ শিৰোনাম দখল কৰিছে। পঞ্জাৱৰ ৰাজনীতিত তেওঁৰ প্ৰৱেশৰ বিষয়ে শেহতীয়াকৈ জল্পনা-কল্পনা চলি থকাৰ সময়তে এক নতুন প্ৰতিবেদনে সকলোকে স্তম্ভিত কৰি তুলিছে। দাবী কৰা হৈছে যে দিলজিত এতিয়া বৈধ ভাৰতীয় নাগৰিক নহয় আৰু তেওঁ আমেৰিকাৰ নাগৰিকত্ব লাভ কৰাৰ অভিযোগ উত্থাপন হৈছে।

প্ৰতিবেদন অনুসৰি দিলজিতে ২০২২ চনত গোপনে আমেৰিকাৰ নাগৰিকত্ব লাভ কৰিছিল আৰু এতিয়া আমেৰিকাৰ পাছপ’ৰ্টত যাত্ৰা কৰি আছে। খবৰ অনুসৰি ২০২২ চনৰ ১ ছেপ্টেম্বৰৰ পৰা ই-ভিছাৰ জৰিয়তে ভাৰতলৈ আহি আছে।প্ৰতিবেদনত তেওঁৰ হাতত ওচিআই ( ভাৰতীয় মূলৰ বিদেশী নাগৰিক-Overseas Citizen of Indian Origin) কাৰ্ড নাই বুলিও দাবী কৰা হৈছে। সূত্ৰ অনুসৰি ২০১৮ চনত মুম্বাইত তেওঁৰ শেষৰটো ভাৰতীয় পাছপ’ৰ্ট জাৰি কৰা হৈছিল আৰু পিছত সেই পাছপ’ৰ্ট আত্মসমৰ্পণ কৰা হৈছিল। ইয়াৰ পূৰ্বেও তেওঁৰ এখন পাছপ’ৰ্ট জাম্বিয়াৰ পৰা জাৰি কৰা বুলিও খবৰ ওলাইছিল।

বাতৰিতো উল্লেখ আছে যে দিলজিতৰ পত্নী সন্দীপ কৌৰো আমেৰিকাৰ নাগৰিক আৰু দিলজিতে আমেৰিকাৰ নাগৰিকত্বৰ বাবে আবেদন কৰাৰ সময়ত কেলিফৰ্ণিয়াত থকা তেওঁলোকৰ পাঁচটা বেডৰুমৰ বাংলোটোৰ ঠিকনা দিছিল। সামাজিক সংগঠন জাগো পঞ্জাৱ মঞ্চকে ধৰি কেইবাটাও গোটে তেওঁক পঞ্জাৱৰ ৰাজনীতিত প্ৰৱেশ কৰিবলৈ আমন্ত্ৰণ জনোৱাৰ সময়ত এই বিষয়টো পোহৰলৈ আহিছে। অৱশ্যে দিলজিতে ইতিমধ্যে স্পষ্ট কৰি দিছে যে তেওঁৰ ৰাজনীতিত প্ৰৱেশৰ কোনো উদ্দেশ্য নাই আৰু কেৱল সংগীত আৰু অভিনয়ৰ ওপৰত গুৰুত্ব দিব বিচাৰে।

আনহাতে, দিলজিতে যদি ভৱিষ্যতে ৰাজনীতিত প্ৰৱেশৰ সিদ্ধান্ত লয় তেন্তে ভাৰতীয় নাগৰিকত্ব পুনৰ লাভ কৰিবলৈ তেওঁ এক দীঘলীয়া আইনী প্ৰক্ৰিয়াৰ মাজেৰে পাৰ হ’ব লাগিব বুলিও প্ৰতিবেদনত উল্লেখ আছে। ভাৰতীয় নাগৰিকত্ব আইন অনুসৰি এজন বিদেশী নাগৰিকে ভাৰতীয় নাগৰিকত্বৰ বাবে আবেদন কৰাৰ পূৰ্বে কমেও ১২ বছৰ ভাৰতত বাস কৰা হ’ব লাগিব। বৰ্তমান এই বিষয়ত দিলজিত বা তেওঁৰ দলৰ কোনো আনুষ্ঠানিক প্ৰতিক্ৰিয়া পোৱা নাই।

হিন্দুস্থান সমাচাৰ / অৰৱিন্দ