নতুন দিল্লী, ১৪ মে’ (হি.স.)। যন্তৰ মন্তৰ পথত কংগ্ৰেছ দলৰ বাংলো পঞ্জীয়নৰ দাবীৰ শুনানি গ্ৰহণ কৰি দিল্লী উচ্চ ন্যায়ালয়ে কেন্দ্ৰ আৰু দিল্লী চৰকাৰলৈ জাননী জাৰি কৰে। ন্যায়াধীশ পুৰুষেন্দ্ৰ কুমাৰ কৌৰৰ নেতৃত্বত এখন বিচাৰপীঠে এই জাননী জাৰি কৰাৰ নিৰ্দেশ দিয়ে।

শুনানিৰ সময়ত আদালতে কংগ্ৰেছ দলৰ আবেদনখনৰ ৰক্ষণাবেক্ষণযোগ্যতাক লৈ প্ৰশ্ন উত্থাপন কৰি কয় যে আবেদনখন ৰক্ষণাবেক্ষণযোগ্য বুলি সন্তুষ্ট হোৱাৰ পিছতহে অন্তৱৰ্তীকালীন সুৰক্ষাৰ বাবে কৰা অনুৰোধ বিবেচনা কৰিব। কংগ্ৰেছ পাৰ্টিয়ে নিজৰ আবেদনত উল্লেখ কৰিছিল যে ১৯৫৬ চনৰ ১৬ জানুৱাৰীত জন্তৰ মন্তৰ ৰোডৰ ৭ নং বাংলোটো তেওঁলোকক আবণ্টন দিয়া হৈছিল আৰু দলটোৱে ইতিমধ্যে ১৯৫৯ চনত সম্পূৰ্ণ ধন জমা কৰিছিল।১৯৫৯ চনৰ ২১ মে’ত কংগ্ৰেছ পাৰ্টিয়ে ₹৬১০,৭০০ টকা জমা দিছিল, লগতে অতিৰিক্ত প্ৰিমিয়াম আৰু বাৰ্ষিক ভাড়াও দিছিল। ইয়াৰ পিছতে কংগ্ৰেছ দলক বাংলো দখল কৰিবলৈ কোৱা হয়।

কংগ্ৰেছ পাৰ্টিয়ে আৰ টি আইৰ অনুৰোধৰ জৰিয়তে লাভ কৰা তথ্যৰ উদ্ধৃতি দি আৱেদনত উল্লেখ কৰিছে যে দিল্লী চৰকাৰৰ ভূমি আৰু বিল্ডিং বিভাগৰ বিষয়াসকলে বাংলোটোৰ পঞ্জীয়নৰ বাবে অনুৰোধ জনাইছে। জনতা দল বনাম কংগ্ৰেছ আৰু অন্যান্য গোচৰত ২০১৪ চনত উচ্চতম ন্যায়ালয়ৰ ৰায়দানৰ উদ্ধৃতি দি কংগ্ৰেছ দলে উল্লেখ কৰে যে ১৯৬৯ চনৰ পূৰ্বে কংগ্ৰেছ দলৰ মালিকানাধীন যিকোনো সম্পত্তি বৰ্তমানৰ কংগ্ৰেছ দলৰ হ’ব। আৱেদনখনত উল্লেখ কৰা হৈছে যে ২০১৭ চনৰ পৰা কংগ্ৰেছ দলে বাংলোটোৰ পঞ্জীয়নৰ বাবে অহৰহ অনুৰোধ জনাই আহিছিল যদিও কোনো সিদ্ধান্ত নোলোৱাত দলটোৱে উচ্চ ন্যায়ালয়ৰ কাষ চাপিছিল।

হিন্দুস্থান সমাচাৰ / অৰৱিন্দ