ৱাশ্বিংটন, ১৩ মে’ (হি.স.)। মাৰ্কিন ৰাষ্ট্ৰপতি ড’নাল্ড ট্ৰাম্পে মঙলবাৰে চীন অভিমুখে ৰাওনা হয় আৰু বুধবাৰে বেইজিঙত উপস্থিত হ’ব। চীনৰ ৰাষ্ট্ৰপতি ছি জিনপিঙৰ সৈতে তেওঁৰ বৈঠকত বিশ্বই চকু ৰাখিছে। দুয়োগৰাকী নেতাই বিশ্বব্যাপী বিভিন্ন বিষয়ত আলোচনা কৰাৰ সম্ভাৱনা আছে। আলোচনাৰ মূল বিষয়সমূহৰ ভিতৰত আছে উপসাগৰীয় যুদ্ধ আৰু শুল্ক, লগতে বিৰল খনিজ পদাৰ্থৰ ওপৰত বাকী থকা বাণিজ্যিক চুক্তি।
ট্ৰাম্পৰ এয়া দ্বিতীয়টো চীন ভ্ৰমণ। লক্ষ্য হৈছে চলি থকা শুল্ক উত্তেজনা সমাধান আৰু বাণিজ্যিক বিবাদৰ সমাধান, যিয়ে আমেৰিকাৰ ৫২৫ বিলিয়ন ডলাৰতকৈ অধিক মূল্যৰ ৰপ্তানিত প্ৰভাৱ পেলাইছে। ইয়াৰ পূৰ্বে ২০১৭ চনত প্ৰথম কাৰ্যকালত চীন ভ্ৰমণ কৰিছিল ট্ৰাম্পে। এই ভ্ৰমণত তেওঁৰ সৈতে আমেৰিকাৰ কোম্পানীসমূহৰ শীৰ্ষ কাৰ্যবাহীসকলো থাকিব। আমেৰিকাৰ উপ-প্ৰেছ সচিব আন্না কেলিয়ে কয় যে বুধবাৰে সন্ধিয়া ট্ৰাম্প বেইজিঙত উপস্থিত হ’ব আৰু বৃহস্পতিবাৰে আদৰণি অনুষ্ঠান আৰু দ্বিপাক্ষিক বৈঠকত অংশগ্ৰহণ কৰিব।
আল জাজিৰাৰ মতে, বেইজিংলৈ যোৱাৰ পূৰ্বে ট্ৰাম্পে সাংবাদিকৰ আগত কয় যে চীনৰ নেতা ছি জিনপিঙৰ সৈতে হোৱা বৈঠকৰ মূল বিষয় হ’ব বাণিজ্য। ইৰাণৰ বিষয়েও তেওঁ আলোচনা কৰাৰ আশা কৰিছিল। ট্ৰাম্পে ছিক এজন ভাল বন্ধু বুলি অভিহিত কৰি কয় যে তেওঁৰ লগত তেওঁৰ ভাল মিল আছে। ট্ৰাম্পে কয় যে মই ভাবো যে চীনত ছিৰ সৈতে সাক্ষাৎ কৰিলে বহু ভাল কাম হ’ব।
ইৰাণৰ পাৰমাণৱিক কাৰ্যসূচী সন্দৰ্ভতো কঠোৰ সতৰ্কবাণী জাৰি কৰে ৰাষ্ট্ৰপতিগৰাকীয়ে। তেওঁ কয়, হয়তো আমেৰিকা আৰু ইৰাণৰ মাজত চুক্তি হ'ব, নহ'লে ইৰাণ সম্পূৰ্ণৰূপে ধ্বংস হ'ব। যিকোনো ক্ষেত্ৰতে আমেৰিকাই জয়ী হ'ব। বৰ্তমানৰ যুদ্ধবিৰতি সন্দৰ্ভত ট্ৰাম্পে কয় যে বেইজিঙলৈ যোৱাৰ সময়ত ইয়াৰ ভৱিষ্যত বিবেচনা কৰিব।
এফ ডি এৰ আয়ুক্ত মাৰ্টি মেকাৰীৰ পদত্যাগ:
চীনৰ ছিনহুয়াৰ সংবাদ সংস্থাৰ এক প্ৰতিবেদন অনুসৰি ট্ৰাম্পে ট্ৰুথ ছ’চিয়েলত ঘোষণা কৰিছে যে আমেৰিকাৰ খাদ্য আৰু ঔষধ প্ৰশাসনৰ আয়ুক্ত মাৰ্টি মেকাৰীয়ে পদত্যাগ কৰিছে, আৰু কাইল ডায়ামন্টাছে সংস্থাটোৰ ভাৰপ্ৰাপ্ত আয়ুক্ত হিচাপে কাৰ্যনিৰ্বাহ কৰিব। লগতে ট্ৰাম্পে মেকাৰীক তেওঁৰ উৎকৃষ্ট কামৰ বাবে অভিনন্দন জনায়।
তেওঁ কয় যে মাকাৰিৰ নেতৃত্বত বহুখিনি সফলতা লাভ কৰা হৈছে। কাইল ডায়ামন্টাছ এজন অতি প্ৰতিভাশালী ব্যক্তি আৰু তেওঁক ভাৰপ্ৰাপ্ত আয়ুক্ত হিচাপে নিযুক্তি দিয়া হ’ব। ইয়াৰ পূৰ্বে ডায়ামন্টাছে খাদ্যৰ ক্ষেত্ৰত এফ ডি এৰ উপ আয়ুক্ত হিচাপে কাৰ্যনিৰ্বাহ কৰিছিল। বৰ্তমান তেওঁ সংস্থাটোৰ হিউমেন ফুডছ প্ৰগ্ৰেমৰ নেতৃত্ব দিয়ে। বিশেষজ্ঞসকলে কয় যে হোৱাইট হাউছ আৰু স্বাস্থ্য বিভাগৰ জ্যেষ্ঠ বিষয়াসকলৰ মাজত কেইবা সপ্তাহ ধৰি তিক্ততা সৃষ্টি হোৱাৰ বাতৰি আৰু এফ ডি এৰ কেইবাটাও সিদ্ধান্তৰ ওপৰত অধিক নিৰীক্ষণৰ পিছত এই কথা প্ৰকাশ পাইছে।
ভুৱা বাতৰিত ক্ষুদ্ধ, কয় - তেনে কৰাটো দেশদ্ৰোহ:
চিবিএছ নিউজৰ এক প্ৰতিবেদন অনুসৰি ৰাষ্ট্ৰপতি ট্ৰাম্পে ট্ৰুথআউট ছ’চিয়েলত কয় যে সংবাদ মাধ্যমে ইৰাণে যুদ্ধত ভাল কাম কৰি আছে বুলি কৰা দাবী “প্ৰায় দেশদ্ৰোহৰ সমান”। ট্ৰাম্পে কয়, যেতিয়া ভুৱা বাতৰিয়ে দাবী কৰে যে আমাৰ শত্ৰু ইৰাণে আমেৰিকাৰ বিৰুদ্ধে যুদ্ধত ভাল কাম কৰি আছে, তেতিয়া ইয়াক দেশদ্ৰোহ বুলি গণ্য কৰা উচিত। কাৰণ ই শত্ৰুক সহায় আৰু সহযোগ কৰাৰ সমান।
তেওঁ কয় যে আমেৰিকাৰ সংবিধানত দেশদ্ৰোহক এনে অপৰাধ হিচাপে সংজ্ঞায়িত কৰা হৈছে য'ত কোনোবাই যিজনে আমেৰিকাৰ প্ৰতি আনুগত্য প্ৰকাশ কৰে, তেওঁ ইয়াৰ বিৰুদ্ধে যুদ্ধ কৰে, বা ইয়াৰ শত্ৰুক সমৰ্থন কৰে আৰু আমেৰিকাৰ ভিতৰত বা অন্য ঠাইত তেওঁলোকক সাহায্য আৰু সমৰ্থন দিয়ে । তেওঁ কয়, “আমেৰিকাৰ বিৰুদ্ধে কেৱল পৰাজিত, অকৃতজ্ঞ মানুহ আৰু মূৰ্খইহে কথা ক’ব পাৰে।” উল্লেখযোগ্য যে ফেডাৰেল কমিউনিকেচন কমিছনৰ অধ্যক্ষ ব্ৰেণ্ডন কাৰে যুদ্ধৰ বিষয়ে ভুৱা বাতৰি প্ৰকাশ কৰাৰ বাবে সংবাদ মাধ্যমৰ সম্প্ৰচাৰ অনুজ্ঞাপত্ৰ বাতিল কৰাৰ ভাবুকি দিছিল।
हिन्दुस्थान समाचार / অৰৱিন্দ
