নলবাৰী, ১৩ মে (হি.স.)। নলবাৰীৰ জাগাৰাস্থিত অসম গ্ৰামীণ বিকাশ বেংকৰ এটি গ্ৰাহক সেৱা কেন্দ্ৰত কেইবাগৰাকীও মহিলাৰ জমাধন দীৰ্ঘদিন ধৰি হৰলুকি হৈ অহাৰ সমস্ত ঘটনা শেহতীয়া ভাবে পোহৰলৈ আহিছে । অসম গ্ৰামীণ বিকাশ বেংকৰ জাগাৰা শাখাৰ দ্বাৰা অনুমোদিত জাগাৰাৰ গ্ৰাহক সেৱা কেন্দ্ৰৰ ক্ষুদ্ৰ শাখাত নিয়োজিত বেংক মিত্ৰ গৰাকীয়ে অঞ্চলটোৰ মহিলাসকলৰ লক্ষাধিক জমাধন হস্তগত কৰি শেহতীয়া ভাবে পলাতক অৱস্থাত আছে । উল্লেখ্য যে মহিলাসকলে নিজৰ নিজৰ জমাধন মুকলি কৰিবলৈ আহি অবগত হয় যে একাউণ্ট সমূহৰ পৰা তেওঁলোকৰ জমাধন ইতিমধ্যে মুকলি কৰা হৈ গৈছে । ইয়াৰ পিচতেই হতভম্ব হৈ পৰে মহিলা গ্ৰাহকসকল ।

এই সন্দৰ্ভত একাউণ্টৰ গৰাকীসকলে বেংক মিত্ৰ ভৱেশ বৈশ্যক জবাবদিহি কৰাত সকলো ষড়যন্ত্ৰ উন্মোচিত হৈ পৰে আৰু অঞ্চলজুৰি প্ৰতিক্ৰিয়াৰ সৃষ্টি হয় । উল্লেখ্য যে গ্ৰাহক সেৱা কেন্দ্ৰ সমূহত আঙুলিৰ চাপেৰেহে ধনৰ লেন দেন হয় । ইয়াৰ সুযোগ গ্ৰহণ কৰি বেংক মিত্ৰ ভৱেশ বৈশ্যই গ্ৰাহকসকলে মুকলি কৰিবলগীয়া জমাধনতকৈ বেছি মুকলি কৰে আৰু ওপৰঞ্চি ধনখিনি এনেদৰে আত্মসাত কৰি আহিছে । জমাধন মুকলি কৰা গ্ৰাহকসকলক কোনোধৰণৰ ৰচিদ প্ৰদান নকৰাৰ বাবেই গ্ৰাহকসকলেও কিমান ধন মুকলি কৰে জানিব পৰা নাছিল । শেহতীয়া ভাবে বেংক মিত্ৰ গৰাকীয়ে অময়া বৈশ্যৰ একাউণ্টৰ পৰা ১৬ হেজাৰ,তৰালী ডেকাৰ পৰা ১২ হেজাৰ,পায়েল ডেকা ( ছাত্ৰী)ৰ পৰা ৫ হেজাৰ,ধৰণী হালৈৰ পৰা ১০ হেজাৰ,পাৰুল ডেকাৰ পৰা ২৬ হেজাৰ,ৰশ্মি বৈশ্যৰ পৰা ১০ হেজাৰ,মিতালী কলিতা বৈশ্যৰ পৰা ১০ হেজাৰ টকা হস্তগত কৰিছে । ইয়াৰ উপৰিও আৰু ভালেকেইগৰাকী মহিলা গ্ৰাহকৰ জমাধন বেংক মিত্ৰগৰাকীয়ে হজম কৰিছে । অৱশেষত বেংক মিত্ৰগৰাকীৰ এই চক্ৰান্ত ফাদিল হৈ পৰাত অঞ্চলটোত প্ৰতিক্ৰিয়াৰ সৃষ্টি হয় । ইতিমধ্যে গোটেই কেইগৰাকী মহিলা গ্ৰাহকে জাগাৰা শাখা কাৰ্যালয়ত উপস্থিত হৈ শাখা পৰিচালকক লগ কৰি বেংক মিত্ৰগৰাকীৰ ওপৰত লিখিত অভিযোগ দাখিল কৰিছে । এইক্ষেত্ৰত শাখা পৰিচালকগৰাকীয়ে বেংক মিত্ৰগৰাকীৰ ওপৰত কেনেধৰণৰ ব্যৱস্থা গ্ৰহণ কৰে সেয়া লক্ষণীয় হ'ব ।

হিন্দুস্থান সমাচাৰ / প্ৰকাশ ডেকা