ভূপাল/উজ্জয়িনী, ১৩ মে (হি.স.)। ইন্ধন সংৰক্ষণৰ বাবে প্ৰধানমন্ত্ৰী নৰেন্দ্ৰ মোদীয়ে কৰা আবেদন আৰু মুখ্যমন্ত্ৰী ড০ মোহন যাদৱৰ নিৰ্দেশৰ পিছতে উজ্জয়িন জিলা প্ৰশাসনেও পেট্ৰ’ল-ডিজেল সংৰক্ষণৰ বাবে পদক্ষেপ গ্ৰহণ কৰিছে। বুধবাৰে শীৰ্ষ বিষয়াসকলে নিজৰ বিলাসী বাহনৰ পৰিৱৰ্তে একক ট্ৰেভেলাৰ বাছ (আৰ্বানিয়া বাহন)ত যাত্ৰা কৰি সিংহস্থ ২০২৮ৰ প্ৰস্তুতি পৰ্যালোচনা কৰে।

প্ৰধানমন্ত্ৰী মোডীৰ এই আবেদনৰ অন্তত মুখ্যমন্ত্ৰী ড০ যাদৱেও পৰৱৰ্তী জাননী নিদিয়া পৰ্যন্ত নিৰাপত্তাজনিত কাৰণত নিজৰ কনভয় নূন্যতম সংখ্যক যান-বাহনৰ মাজত সীমাবদ্ধ কৰি ৰখাৰ সিদ্ধান্ত গ্ৰহণ কৰিছে। লগতে সকলো মন্ত্ৰীকে যাত্ৰাৰ সময়ত নূন্যতম সংখ্যক যান-বাহন ব্যৱহাৰ কৰিবলৈ নিৰ্দেশ দিছে। লগতে ৰাজ্যৰ নাগৰিকসকলক ৰাজহুৱা পৰিবহণ ব্যৱস্থা গ্ৰহণ কৰিবলৈ আহ্বান জনায়।

বুধবাৰে পুৱা উজ্জয়িনীৰ সংমণ্ডল আয়ুক্ত আৰু সিংহস্থ মেলাৰ বিষয়া আশীষ সিং, কালেক্টৰ ৰোশন কুমাৰ সিং, পৌৰ নিগমৰ আয়ুক্ত অভিলাষ মিশ্ৰ, উজ্জয়ন উন্নয়ন প্ৰাধিকৰণৰ চিইঅ’ সন্দীপ ছোনী, তহচিলদাৰ আলোক চোৰে, জলসম্পদ বিভাগ ই.ই. আন ১৫ জন বিষয়াৰ সৈতে, সিংহস্থ মেলাৰ বাবে নিৰ্মাণ কৰা ২৯ কিলোমিটাৰ দৈৰ্ঘ্যৰ ঘাট অঞ্চল পৰিদৰ্শন কৰিবলৈ এখন আৰ্বানিয়া বাহনত উপস্থিত হয়। প্ৰায় ৬ কিলোমিটাৰ খোজ কাঢ়ি বিষয়াসকলে এপ্ৰ’চ ৰোড আৰু ঘাটৰ ব্যৱস্থা পৰিদৰ্শন কৰে।

বিগত এসপ্তাহ ধৰি আগন্তুক সিংহস্থ ২০২৮ৰ বাবে হৈ থকা কামসমূহ নিয়মীয়াকৈ পৰিদৰ্শন কৰি আহিছে বিষয়াসকলে। ইয়াৰ পূৰ্বে উপায়ুক্ত, সংগ্ৰাহক, অতিৰিক্ত সংগ্ৰাহক, এছ ডি এম, তহচিলদাৰ, এছ ডি অ’, পি ডব্লিউ ডি, আৰু জলসম্পদ বিভাগ আৰু অন্যান্য বিভাগৰ বিষয়াসকল পৃথক পৃথক বাহনেৰে আহিছিল। এতিয়া একেলগে বিষয়াৰ আগমনৰ ফলত ইন্ধনৰ ৰাহি হ’ব।

প্ৰশাসনিক তথ্য অনুসৰি এই পদক্ষেপে চৰকাৰী ধনৰ যথেষ্ট ৰাহি কৰিব। পূৰ্বৰ পৰিদৰ্শনৰ সময়ত উপায়ুক্ত, সংগ্ৰাহক, পৌৰ নিগমৰ আয়ুক্তকে ধৰি বিভিন্ন বিভাগৰ প্ৰায় ১৫ জন বিষয়াই নিজৰ বাহনেৰে যাত্ৰা কৰিছিল। যেতিয়া ১৫খন বাহনৰ কনভয়ে ১৬-২০ কিলোমিটাৰ যাত্ৰা কৰিছিল, তেতিয়া ইন্ধনৰ খৰচ প্ৰতিদিনে প্ৰায় ৬,৭৫০ ₹। বুধবাৰে ১৫জন বিষয়াই একেলগে এখন বাছত যাত্ৰা কৰি ২৯ কিলোমিটাৰ দৈৰ্ঘ্যৰ ঘাট অঞ্চল পৰিদৰ্শন কৰে। এই যাত্ৰাত মাত্ৰ ডেৰ-দুই লিটাৰ ডিজেল খৰচ হৈছিল, খৰচ হৈছিল ২৫০ ₹তকৈও কম। যদিও দৈনিক বাছৰ ভাড়া ৪,১০০ ₹, তথাপিও ই কনভয়তকৈ যথেষ্ট কম।

মেলা বিষয়া আশীষ সিঙে উল্লেখ কৰে যে এই পদক্ষেপে চৰকাৰী ধন আৰু বহুমূলীয়া ইন্ধনৰ অপচয় ৰোধ কৰিব। বিষয়াসকলৰ বাহনৰ দীঘলীয়া কনভয় এৰাই চলিলেও মহানগৰীত যান-জঁট ৰোধ কৰিব পৰা যাব। তদুপৰি একেলগে ভ্ৰমণ কৰিলে বিষয়াসকলৰ মাজত সমন্বয় আৰু দলীয় মনোভাৱ শক্তিশালী হ’ব। সকলো সংশ্লিষ্ট বিভাগৰ মুৰব্বী একেলগে উপস্থিত থাকিলে ফাইল আৰু পৰিকল্পনাৰ বিষয়ে ঠাইতে আলোচনা কৰি ক্ষিপ্ৰ সিদ্ধান্ত ল’ব পৰা যায়।

কালেক্টৰ ৰোশন কুমাৰ সিঙেও এই পদক্ষেপক দৃষ্টান্তমূলক বুলি প্ৰশংসা কৰে। প্ৰশাসনৰ এই পদক্ষেপে কেৱল পৰিৱেশ সুৰক্ষাৰ দিশত বাৰ্তা প্ৰেৰণ কৰাই নহয়, সাধাৰণ জনতাক ইতিবাচক বাৰ্তাও প্ৰেৰণ কৰিব।

হিন্দুস্থান সমাচাৰ / অৰৱিন্দ