ইটানগৰ, ১৩ মে’(হি.স.)। অৰুণাচল প্ৰদেশৰ পাপুম পাৰে জিলাৰ হোলংগী অঞ্চলত বন বিভাগ আৰু বালিজান আৰক্ষীয়ে যৌথ অভিযান চলায়। বালিজান আৰক্ষী আৰু হোলংগী বন বিষয়াৰ যৌথ অভিযানৰ ফলত গঁড়ৰ খৰ্গ সৰবৰাহৰ সন্দেহত জড়িত চাৰিজন ব্যক্তিক গ্ৰেপ্তাৰ কৰা হয়। আন্তঃৰাষ্ট্ৰীয় বজাৰত প্ৰায় ১.২০ কোটি টকাৰ সন্দেহযুক্ত গঁড়ৰ খৰ্গ উদ্ধাৰ কৰে বিষয়াসকলে।

হোলংগী বন বিষয়া নবাম ৰাকেশে বুধবাৰে জনোৱা মতে, একাংশ সৰবৰাহকাৰীয়ে সন্দেহযুক্ত গঁড়ৰ খৰ্গ বিক্ৰী কৰাৰ পৰিকল্পনা কৰা বুলি তথ্য লাভ কৰিছে। এই তথ্যৰ ভিত্তিত বিষয়াসকলে গ্ৰাহকৰ ৰূপ লৈ চোৰাং ব্যৱসায়ীসকলৰ সৈতে যোগাযোগ কৰি অসম-অৰুণাচল সীমান্তৰ হোলংগীত সাক্ষাৎ কৰাৰ পৰিকল্পনা কৰে।

প্ৰথমখন বৈঠক সফল নহ’লেও দ্বিতীয়খন বৈঠক ১২ মে’ত হ’লংগী নদী এলেকাত অনুষ্ঠিত হ’ব বুলিও তেওঁ কয়। বৈঠকৰ সময়ত বিষয়াসকলে দুজন ব্যক্তিক আটক কৰে। তেওঁলোকৰ তথ্যৰ ভিত্তিত মূল সৰবৰাহকাৰীৰ ঘৰত তালাচী চলোৱা হয়, য’ত উদ্ধাৰ হয় এটা সন্দেহযুক্ত গঁড়ৰ খৰ্গ।

এজন বন বিষয়াৰ মতে, অভিযুক্তই এই খৰ্গ প্ৰায় ১.২০ কোটি টকাত বিক্ৰী কৰাৰ পৰিকল্পনা কৰিছিল। অভিযানৰ অন্তত চাৰিওজন অভিযুক্তক অধিক তদন্তৰ বাবে বালিজান আৰক্ষীক গতাই দিয়া হয়।

ধৃত অভিযুক্ত কেইজন হ’ল হেমন্ত দাস, ৰোমান কলি, হামৰজিৎ নাৰ্জাৰী আৰু অজয় ​​সিং দেওমাৰী। আটাইকেইজন অভিযুক্ত অসমৰ বিশ্বনাথ জিলাৰ বাসিন্দা।

এই সফল অভিযানৰ বাবে আৰক্ষী অধীক্ষক পাপুম পৰে তৰু গুছাৰে আৰক্ষী আৰু বন বিভাগৰ দলক অভিনন্দন জ্ঞাপন কৰে। তেওঁ কয় যে যদি এই সন্দেহযুক্ত গঁড়ৰ শিং ইটানগৰত উপস্থিত হ’লহেঁতেন তেন্তে চোৰাং ব্যৱসায়ীয়ে স্থানীয় বাসিন্দাক লক্ষ্য কৰি ল’ব পাৰিলেহেঁতেন।

আৰক্ষী অধীক্ষকগৰাকীয়ে লগতে উল্লেখ কৰে যে হেমন্ত দাস এজন অভ্যাসগত চোৰাং চিকাৰী আৰু সৰবৰাহকাৰী আৰু তেওঁৰ বিৰুদ্ধে কেইবাটাও বন্যপ্ৰাণী অপৰাধৰ গোচৰ ৰুজু হৈছে। শেহতীয়াকৈ বন্যপ্ৰাণীৰ গোচৰত অসমৰ এখন কাৰাগাৰৰ পৰা মুক্তি লাভ কৰিছিল।

হিন্দুস্থান সমাচাৰ / অৰৱিন্দ