- দহ বছৰৰ ভিতৰত ভাৰতত আৰু ৩৯খন বিমান নিৰ্মাণ কৰিব টাটা কনচৰ্টিয়ামে

নতুন দিল্লী, ১২ মে’ (হি.স.)। গুজৰাটৰ বাডোদৰাস্থিত টাটা এডভান্সড চিষ্টেমছ লিমিটেডে ফ্ৰান্সৰ কোম্পানী এয়াৰবাছৰ সহযোগত প্ৰথমখন চি-২৯৫ বিমানৰ চূড়ান্ত এছেম্বলি লাইন সম্পূৰ্ণ কৰিছে। ভাৰতৰ বায়ুসেনাৰ বাবে ‘আত্মনিৰ্ভৰ ভাৰত’ৰ পদক্ষেপ পূৰণ কৰি ভাৰতৰ প্ৰথমখন সামৰিক পৰিবহণ বিমান। এইবাৰ দেশত প্ৰথমবাৰৰ বাবে এটা ব্যক্তিগত ভাৰতীয় কোম্পানীয়ে সম্পূৰ্ণ সামৰিক বিমানৰ চূড়ান্ত সমাবেশ লাইন নিৰ্মাণ কৰি কমিচন কৰিছে।

এই কাৰ্যসূচী ২০২১ চনত স্বাক্ষৰিত ২১,৯৩৫ কোটি টকাৰ পৰিবহণ বিমান চুক্তিৰ অধীনত বায়ুসেনাৰ বাবে ফ্ৰান্সৰ কোম্পানী এয়াৰবাছৰ সৈতে অংশীদাৰিত্বৰে ৰূপায়ণ কৰা হৈছে। ২০২১ চনৰ ২৪ ছেপ্টেম্বৰত ফ্ৰান্সৰ কোম্পানী এয়াৰবাছ ডিফেন্স এণ্ড স্পেচৰ সৈতে ৫৬খন চি-২৯৫ সামৰিক পৰিবহণ বিমানৰ চুক্তি চূড়ান্ত কৰা হয়। এই চুক্তিৰ অধীনত স্পেইনত প্ৰথমখন বিমান নিৰ্মাণ কৰি বায়ুসেনাক যোগান ধৰা হয়। ২০২৩ চনৰ ২০ ছেপ্টেম্বৰত বডোদৰা বায়ুসেনা ষ্টেচনত অৱতৰণ কৰে প্ৰথমখন চি-২৯৫ পৰিবহণ বিমান। গ্ৰুপ কেপ্তেইন পি. নেগীয়ে ফ্ৰান্সৰ পৰা ইজিপ্ত আৰু বাহৰেইন হৈ ভাৰতলৈ বিমানখন উৰুৱাই লৈ যায়। ইয়াৰ পিছতে প্ৰতিৰক্ষা মন্ত্ৰী ৰাজনাথ সিঙে ২৫ ছেপ্টেম্বৰত হিন্দন বায়ু ঘাটিত ভাৰতীয় বায়ুসেনাৰ পৰিবহণ সেৱাত আনুষ্ঠানিকভাৱে বিমানখনক অন্তৰ্ভুক্ত কৰে।

এয়াৰবাছে ভাৰতীয় বায়ুসেনাৰ বাবে স্পেইনত নিৰ্মিত প্ৰথমখন চি-২৯৫ সামৰিক পৰিবহণ বিমান ১৩ ছেপ্টেম্বৰত ভাৰতীয় বায়ুসেনাৰ তদানীন্তন মুৰব্বী এয়াৰ চিফ মাৰ্শ্বাল ভি.আৰ. চৌধুৰীৰ হাতত স্পেইনৰ চেভিলত অৰ্পন কৰিছিল। চি-২৯৫ বিমানখনৰ চাবি লাভ কৰাৰ পিছত সেইদিনা স্পেইনত বিমানখন উৰুৱাই এয়াৰ চিফে ব্যক্তিগতভাৱে ইয়াৰ সামৰ্থ্য পৰীক্ষা কৰে। চুক্তি অনুসৰি কোম্পানীটোৱে স্পেইনত ১৬খন বিমান নিৰ্মাণ কৰি ফ্লাইং মোডত ভাৰতক যোগান ধৰিব, বাকী ৪০খন বিমান দহ বছৰৰ ভিতৰত টাটা কনচৰ্টিয়ামে ভাৰতত নিৰ্মাণ কৰিব। ২০৩১ চনৰ আগষ্ট মাহৰ ভিতৰত ভাৰতত নিৰ্মিত ৪০ খন বিমানৰ সকলোবোৰ ডেলিভাৰী হোৱাৰ সম্ভাৱনা আছে। হায়দৰাবাদৰ মেইন ইকুইপমেণ্ট এছেম্বলি প্লাণ্টত বিমানৰ উপাদান নিৰ্মাণ আৰু বদোদৰা প্লাণ্টত একত্ৰিত কৰা হয়।

চি-২৯৫ সামৰিক পৰিবহণ বিমানৰ বৈশিষ্ট্য

এই বিমানখন দুজন লোকে পৰিচালনা কৰে আৰু ইয়াত ৭৩ জন সৈনিক, ৪৮ জন পেৰাট্ৰুপাৰ, ১২ জন ষ্ট্ৰেচাৰ ইনটেনচিভ কেয়াৰ মেডেভেক, বা ২৭ জন ষ্ট্ৰেচাৰ মেডেভেক, লগতে চাৰিজন মেডিকেল এটেণ্ডেণ্টো কঢ়িয়াব পাৰি। ইয়াত সৰ্বোচ্চ পেলোড ৯,২৫০ কিলোগ্ৰাম কঢ়িয়াব পাৰি। ইয়াৰ সৰ্বোচ্চ গতিবেগ প্ৰতি ঘণ্টাত ৪৮২ কিলোমিটাৰ আৰু সৰ্বোচ্চ উচ্চতা ১৩,৫৩৩ ফুট। ইয়াৰ বাবে উৰণৰ বাবে ৮৪৪ৰ পৰা ৯৩৪ মিটাৰ আৰু অৱতৰণৰ বাবে মাত্ৰ ৪২০ মিটাৰ ৰাণৱেৰ প্ৰয়োজন। ইয়াত অস্ত্ৰ স্থাপনৰ বাবে ছটা হাৰ্ডপইণ্ট আছে। অস্ত্ৰ-শস্ত্ৰ আৰু উদ্ধাৰ ব্যৱস্থা স্থাপনৰ বাবে প্ৰতিটো উইঙৰ তলত তিনিটাকৈ স্থান আছে আৰু ইয়াত প্ৰত্যেকেই ৮০০ কিলোগ্ৰাম অস্ত্ৰ কঢ়িয়াব পাৰে।

हिन्दुस्थान समाचार / অৰৱিন্দ