নতুন দিল্লী, ১২ মে’ (হি.স.)। নীট-ইউজি ২০২৬ (NEET-UG 2026) পৰীক্ষা বাতিলৰ বাবে কেন্দ্ৰীয় চৰকাৰক লক্ষ্য কৰি কংগ্ৰেছ নেতা ৰাহুল গান্ধীয়ে কয় যে ২২ লাখৰো অধিক ছাত্ৰ-ছাত্ৰীৰ কঠোৰ পৰিশ্ৰম, ত্যাগ, আৰু সপোনক দুৰ্নীতিগ্ৰস্ত ব্যৱস্থাই চেপি ধৰিছে। তেওঁ অভিযোগ কৰে যে কাগজ ফাদিল, চৰকাৰী গাফিলতি, শিক্ষাৰ ক্ষেত্ৰত সংগঠিত দুৰ্নীতিয়ে যুৱক-যুৱতীসকলৰ ভৱিষ্যত বিপদত পেলাইছে।

ৰাহুল গান্ধীয়ে এক্স-পোষ্টত লিখিছে যে কিছুমান পিতৃয়ে ঋণ লৈছিল, কিছুমান মাতৃয়ে গহণা বিক্ৰী কৰিছিল, লাখ লাখ শিশুৱে ৰাতি-ৰাতি উজাগৰে থাকি পঢ়া-শুনা কৰিছিল, কিন্তু বিনিময়ত তেওঁলোকে প্ৰশ্নকাকত ফাদিল আৰু দুৰ্নীতি লাভ কৰিছিল। এয়া কেৱল ব্যৰ্থতা নহয় যুৱক-যুৱতীৰ ভৱিষ্যতৰ বিৰুদ্ধে অপৰাধ।

তেওঁ কয় যে প্ৰতিবাৰেই প্ৰশ্নকাকতৰ মাফিয়া ৰক্ষা পৰে আৰু সৎ ছাত্ৰ-ছাত্ৰীয়ে ক্ষতিগ্ৰস্ত হয়। এতিয়া লাখ লাখ ছাত্ৰ-ছাত্ৰীয়ে আকৌ এবাৰ মানসিক চাপ, আৰ্থিক বোজা, অনিশ্চয়তাৰ সন্মুখীন হ’ব। যদি শিক্ষা কঠোৰ পৰিশ্ৰমৰ দ্বাৰা নহয় ধন আৰু প্ৰভাৱৰ দ্বাৰা নিৰ্ধাৰিত হয়, তেন্তে শিক্ষাৰ মূল্য কি হ’ব?

উল্লেখযোগ্য যে ৰাষ্ট্ৰীয় পৰীক্ষণ সংস্থাই নীট-ইউজি ২০২৬ পৰীক্ষা বাতিল কৰি পুনৰ পৰীক্ষা অনুষ্ঠিত কৰাৰ সিদ্ধান্ত লৈছে। পৰীক্ষাত হোৱা কথিত অনিয়ম আৰু তদন্তকাৰী সংস্থাসমূহৰ পৰা পোৱা ইনপুটৰ ভিত্তিত সংস্থাটোৱে এই সিদ্ধান্ত গ্ৰহণ কৰে। কেন্দ্ৰীয় চৰকাৰেও সমগ্ৰ বিষয়টোৰ তদন্ত চিবিআইক অৰ্পণ কৰিছে। স্বচ্ছতা আৰু ন্যায়পৰায়ণতা বজাই ৰাখিবলৈ পৰীক্ষা বাতিল কৰি পুনৰ অনুষ্ঠিত কৰা হ’ব বুলি এনটিএই উল্লেখ কৰে। শীঘ্ৰে ঘোষণা কৰা হ’ব নতুন পৰীক্ষাৰ তাৰিখ আৰু এডমিট কাৰ্ডৰ সময়সূচী।

हिन्दुस्थान समाचार / অৰৱিন্দ