নতুন দিল্লী, ১২ মে’ (হি.স.)। ৰাষ্ট্ৰীয় পৰিসংখ্যা কাৰ্যালয় (এনএছঅ’)-এ বাৰ্ষিক মুঠ ঘৰুৱা উৎপাদনৰ তথ্য প্ৰকাশৰ সময়সীমা সংশোধন কৰিছে। চৰকাৰে ২০২৫-২৬ বিত্তীয় বৰ্ষ আৰু মাৰ্চ ত্ৰৈমাসিকৰ জিডিপি তথ্য প্ৰকাশৰ তাৰিখ মে’ মাহৰ শেষ কৰ্মদিনৰ পৰা ৭ জুনলৈ সংশোধন কৰিছে।
পৰিসংখ্যা আৰু কাৰ্যসূচী ৰূপায়ণ মন্ত্ৰালয়ে মঙলবাৰে এক বিবৃতিত কয় যে বাৰ্ষিক অস্থায়ী জিডিপি অনুমান আৰু চতুৰ্থ ত্ৰৈমাসিকৰ তথ্য এতিয়া মে’ মাহৰ শেষ কৰ্মদিনৰ পৰিৱৰ্তে ৭ জুনত প্ৰকাশ কৰা হ’ব। মন্ত্ৰালয়ৰ মতে, ৭ জুন যদি বন্ধৰ দিন হয় তেন্তে পূৰ্বৰ কৰ্মদিনত তথ্য প্ৰকাশ কৰা হ’ব।
মন্ত্ৰালয়ৰ তথ্য অনুসৰি জিডিপিৰ তথ্যৰ মান আৰু অধিক উন্নত কৰাৰ বাবে ৰাষ্ট্ৰীয় হিচাপ পৰিসংখ্যাৰ পৰামৰ্শদাতা সমিতি (এচিএনএএছ)ৰ সৈতে যথাযথ আলোচনাৰ অন্তত প্ৰকাশৰ তাৰিখ সংশোধন কৰা হৈছে। প্ৰকাশৰ তাৰিখত পুনৰীক্ষণ কৰাটো প্ৰয়োজনীয় আছিল কাৰণ কিছুমান মূল তথ্য দুমাহ পৰ্যন্ত পলমকৈ উপলব্ধ। উল্লেখযোগ্য যে তালিকাভুক্ত কোম্পানীসমূহে অডিট কৰা চতুৰ্থ ত্ৰৈমাসিক আৰু বাৰ্ষিক বিত্তীয় ফলাফল দাখিলৰ বিধিগত সময়সীমা বিত্তীয় বৰ্ষৰ শেষৰ পৰা ৬০ দিন, যাৰ ফলত বৃহৎ সংখ্যক কোম্পানীয়ে ৩১ মে’ৰ সময়সীমাৰ ওচৰত নিজৰ বিত্তীয় বিৱৰণী দাখিল কৰে।
পৰিসংখ্যা আৰু কাৰ্যসূচী ৰূপায়ণ মন্ত্ৰালয়ে কয় যে, ইয়াৰ উপৰিও মাৰ্চ মাহৰ ৰাজহ ব্যয়, মূলধনী ব্যয়, কৰ, ৰাজসাহায্য, আৰু সুতৰ পৰিশোধৰ সৈতে জড়িত মূল বিত্তীয় তথ্য কেন্দ্ৰীয় চৰকাৰৰ একাউণ্ট চূড়ান্ত হোৱাৰ দুমাহৰ পলমৰ সৈতে উপলব্ধ। ইয়াৰ পৰিপ্ৰেক্ষিতত ৰাষ্ট্ৰীয় পৰিসংখ্যা কাৰ্যালয়ে বাৰ্ষিক মুঠ ঘৰুৱা উৎপাদন (জিডিপি) তথ্য প্ৰকাশৰ সময়সীমা সংশোধন কৰিছে।
মন্ত্ৰালয়ে উল্লেখ কৰে যে ২০২৫-২৬ বিত্তীয় বৰ্ষৰ জিডিপিৰ অস্থায়ী অনুমান (পিই) আৰু ২০২৫-২৬ চনৰ চতুৰ্থ ত্ৰৈমাসিক (জানুৱাৰী-মাৰ্চ)ৰ জিডিপিৰ ত্ৰিমাসিক অনুমানৰ প্ৰেছ নোট ৫ জুনত প্ৰকাশ পোৱাৰ কথা নিৰ্ধাৰণ কৰা হৈছে। এই পুনৰীক্ষণ ৰাষ্ট্ৰীয় হিচাপ সংকলনত ব্যৱহৃত তথ্যৰ গুণগত মান, ব্যাপকতা আৰু শক্তিশালীতা উন্নত কৰাৰ দিশত মন্ত্ৰালয়ৰ নিৰন্তৰ প্ৰচেষ্টাৰ এটা অংশ, যিটো প্ৰচলিত আন্তঃৰাষ্ট্ৰীয় উত্তম পদ্ধতিৰ সৈতেও মিল আছে।
हिन्दुस्थान समाचार / অৰৱিন্দ
