- গোৱেলে কয়, বিশ্ব সংকটৰ সময়ত ভাৰতীয় অৰ্থনীতিয়ে স্থিতিস্থাপকতা দেখুৱাইছে
নতুন দিল্লী, ১২ মে’ (হি.স.)। কেন্দ্ৰীয় বাণিজ্য আৰু উদ্যোগ মন্ত্ৰী পীযুষ গোৱেলে মঙলবাৰে কয় যে ভাৰতৰ অৰ্থনীতিয়ে বিশ্বৰ ভূ-ৰাজনৈতিক আৰু অৰ্থনৈতিক প্ৰত্যাহ্বানৰ মাজতো নিজৰ শক্তি অক্ষুণ্ণ ৰাখিছে, ভাৰতৰ শক্তিশালী মৌলিক দিশ আৰু ভাৰতৰ প্ৰতি ক্ৰমাৎ বৃদ্ধি পোৱা বিশ্বৰ আস্থাৰ বাবেই এয়া প্ৰতিফলিত হৈছে ।
নতুন দিল্লীত ভাৰতীয় উদ্যোগ সংঘৰ বাৰ্ষিক ব্যৱসায় সন্মিলনত ভাষণ দি তেওঁ কয় যে বিশ্বৰ ভূ-ৰাজনৈতিক অস্থিৰতা, মুদ্ৰাস্ফীতি, আৰু পৰিৱৰ্তিত বাণিজ্যিক শুল্কৰ মাজতো ভাৰতৰ অৰ্থনীতিয়ে অবিৰত শক্তি দেখুৱাইছে। তেওঁ আৰু কয় যে বিশ্বৰ অন্যতম দ্ৰুতগতিত বৃদ্ধি পোৱা বৃহৎ অৰ্থনীতি হিচাপে ভাৰতে প্ৰবল ঘৰুৱা চাহিদা, ১১ মাহতকৈ অধিক আমদানি সামৰি লোৱা শক্তিশালী বৈদেশিক মুদ্ৰাৰ মজুত, আৰু উৎপাদন ক্ষেত্ৰত আত্মনিৰ্ভৰশীলতাৰ দিশত বৃহৎ প্ৰচেষ্টাৰ জৰিয়তে নিজৰ গতি বজাই ৰাখিছে।
ভাৰতৰ ৰপ্তানি প্ৰদৰ্শনৰ কথা উল্লেখ কৰি তেওঁ কয় যে এই বছৰ দেশখনে সৰ্বকালৰ সৰ্বোচ্চ ৰপ্তানিৰ পৰিসংখ্যা প্ৰায় ৮৬৩ বিলিয়ন মাৰ্কিন ডলাৰ লাভ কৰিবলৈ সাজু হৈছে। তেওঁ কয় যে ভাৰতৰ সামগ্ৰী আৰু সেৱাৰ বাণিজ্যিক ঘাটি দেশৰ বাৰ্ষিক ৰেমিটেন্সতকৈ যথেষ্ট কম, যিয়ে শক্তিশালী অৰ্থনৈতিক প্ৰদৰ্শনৰ প্ৰতিফলন ঘটায়। কেন্দ্ৰীয় মন্ত্ৰীগৰাকীয়ে কয় যে ভাৰতে ধাৰাবাহিকভাৱে সংকটক সুযোগলৈ ৰূপান্তৰিত কৰিছে। তেওঁ কয় যে প্ৰতিকূল পৰিস্থিতিৰ সময়ত দেশ সদায় শক্তিশালী ৰূপত আত্মপ্ৰকাশ কৰি আহিছে। গোৱালে কয় যে বৰ্তমান বিশ্বৰ পৰিস্থিতি ভাৰতক অধিক কাৰ্যক্ষম, উৎপাদনশীল আৰু স্বাৱলম্বী হোৱাৰ সতৰ্কবাণী হিচাপে চাব লাগে।
আত্মনিৰ্ভৰ ভাৰতৰ দৃষ্টিভংগীৰ কথা উল্লেখ কৰি গোৱালে কয় যে প্ৰধানমন্ত্ৰী নৰেন্দ্ৰ মোডীৰ নেতৃত্বত ভাৰতৰ সামৰ্থ্যৰ ওপৰত আত্মনিৰ্ভৰশীলতা আৰু আস্থাৰ নীতি ধাৰাবাহিক হৈ আছে। তেওঁ কয় যে ভাৰতৰ বৃদ্ধিৰ কাহিনীক শক্তিশালী কৰাৰ বাবে চৰকাৰ আৰু উদ্যোগে একেলগে কাম কৰিব লাগিব।
हिन्दुस्थान समाचार / অৰৱিন্দ
