- কিম্বাৰ্লি প্ৰক্ৰিয়াৰ বৈঠকত নিৰীক্ষণ, অনুসৰণ, আৰু বহনক্ষম হীৰা ব্যৱসায়ৰ ওপৰত গুৰুত্ব আৰোপ
মুম্বাই, ১২ মে’(হি.স.)। ভাৰতৰ অধ্যক্ষতাত অনুষ্ঠিত কিম্বাৰ্লি প্ৰচেছ (কেপি)ৰ আন্তঃঅধিবেশন বৈঠক মঙলবাৰৰ পৰা দেশৰ বিত্তীয় ৰাজধানী মুম্বাইত আৰম্ভ হয় আৰু এই বৈঠক ১৪ মে’লৈকে চলিব। চাৰিদিনীয়া বৈঠকত কিম্বাৰ্লি প্ৰক্ৰিয়াৰ অংশগ্ৰহণকাৰী, পৰ্যবেক্ষক আৰু বিশ্বৰ বিভিন্ন প্ৰান্তৰ উদ্যোগৰ অংশীদাৰসকলৰ প্ৰতিনিধিসকলক একত্ৰিত কৰি প্ৰাকৃতিক হীৰাৰ বিশ্বব্যাপী বাণিজ্যৰ সৈতে জড়িত মূল বিষয়সমূহৰ ওপৰত চৰ্চা কৰা হ’ব।
ইয়াৰ অধ্যক্ষতাত ভাৰতে মুম্বাইত কিম্বাৰ্লি প্ৰচেছ (কেপি)ৰ আন্তঃঅধিবেশন বৈঠক উদ্বোধন কৰে। সভাত ভাষণ দি কেপিৰ অধ্যক্ষ ২০২৬ সুচিন্দ্ৰ মিশ্ৰই কয় যে কিম্বাৰ্লি প্ৰক্ৰিয়াই শান্তি প্ৰসাৰিত, জীৱিকা সুৰক্ষা, আৰু উৎপাদনকাৰী দেশসমূহৰ মাজত বৈধ হীৰা ব্যৱসায় শক্তিশালী কৰাত গুৰুত্বপূৰ্ণ ভূমিকা পালন কৰিছে। তেওঁৰ ভাষণত তেওঁ ব্যৱস্থাটোৰ ওপৰত আস্থা আৰু অধিক শক্তিশালী কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে, অংশগ্ৰহণকাৰীসকলৰ মাজত সহযোগিতা বৃদ্ধি কৰা আৰু পৰিৱৰ্তিত বিশ্ব পৰিস্থিতিৰ সন্মুখত কিম্বাৰ্লি প্ৰক্ৰিয়াটো যাতে প্ৰাসংগিক আৰু ফলপ্ৰসূ হৈ থাকে তাৰ ওপৰত গুৰুত্ব আৰোপ কৰে। তেওঁ লগতে আঙুলিয়াই দিয়ে যে প্ৰাকৃতিক হীৰা বহনক্ষম সামগ্ৰী আৰু কিম্বাৰ্লি প্ৰক্ৰিয়া বিশ্বজুৰি অন্যতম প্ৰগতিশীল প্ৰমাণীকৰণ ব্যৱস্থা হৈয়েই আছে।
বাণিজ্য মন্ত্ৰালয়ৰ তথ্য অনুসৰি, আন্তঃঅধিৱেশন বৈঠকত অনাগত দিনত বিভিন্ন কৰ্মগোট আৰু সমিতিৰ আলোচনা আৰু বৈঠক অনুষ্ঠিত হ’ব। কিম্বাৰ্লি প্ৰক্ৰিয়া প্ৰমাণীকৰণ আঁচনি ৰূপায়ণ, নিৰীক্ষণ আৰু অনুসৰণ ব্যৱস্থা, গতানুগতিক আৰু জলজ হীৰা উৎপাদন, পৰিসংখ্যা, আৰু প্ৰাকৃতিক হীৰা মূল্য শৃংখলৰ ওপৰত আস্থা শক্তিশালী কৰাৰ লক্ষ্যৰে ব্যৱস্থাসমূহৰ ওপৰত আলোচনা কৰা হ’ব। ১৪ মে’লৈকে চলিবলগীয়া এই আন্তঃঅধিবেশন বৈঠকত অংশগ্ৰহণকাৰী দেশ, উদ্যোগ সংস্থা, আৰু নাগৰিক সমাজৰ গোটসমূহৰ বিশ্ব প্ৰতিনিধিসকলক একত্ৰিত কৰি দায়িত্বশীল আৰু বহনক্ষম হীৰা ব্যৱসায়ৰ ভৱিষ্যতৰ বিষয়ে আলোচনা কৰা হয়।
মন্ত্ৰালয়ে কয় যে এই বৈঠকে অংশগ্ৰহণকাৰী আৰু পৰ্যবেক্ষকসকলক আইনী উৎসৰ পৰা পোৱা প্ৰাকৃতিক হীৰাৰ ওপৰত গ্ৰাহকৰ আস্থা বৃদ্ধিৰ বাবে উদীয়মান প্ৰত্যাহ্বান আৰু সহযোগিতামূলক পদ্ধতিৰ ওপৰত মত বিনিময়ৰ সুযোগো প্ৰদান কৰাৰ আশা কৰা হৈছে। ভাৰত চৰকাৰৰ বাণিজ্য বিভাগৰ জ্যেষ্ঠ বিষয়া, কিম্বাৰ্লি প্ৰক্ৰিয়াৰ অংশগ্ৰহণকাৰীৰ প্ৰতিনিধি, বিশ্ব হীৰা পৰিষদৰ সদস্য, নাগৰিক সমাজৰ মিত্ৰজোঁটৰ সদস্য আৰু অন্যান্য অংশীদাৰসকলে আন্তঃঅধিবেশন বৈঠকত অংশগ্ৰহণ কৰিছে।
ৰাষ্ট্ৰসংঘৰ সাধাৰণ পৰিষদৰ ৫৫/৫৬ (২০০০) নং প্ৰস্তাৱৰ অধীনত স্থাপিত কিম্বাৰ্লি প্ৰক্ৰিয়া প্ৰমাণীকৰণ আঁচনি (কেপিচিএছ) হৈছে সংঘাতৰ অঞ্চলৰ পৰা অবৈধভাৱে উৎপন্ন হোৱা হীৰাক বৈধ হীৰা ব্যৱসায়ত প্ৰৱেশ ৰোধ কৰাৰ লক্ষ্যৰে এক আন্তঃৰাষ্ট্ৰীয় পদক্ষেপ। বৰ্তমান কিম্বাৰ্লি প্ৰক্ৰিয়াত ইউৰোপীয় সংঘ আৰু ইয়াৰ সদস্য ৰাষ্ট্ৰসমূহক একক গোট হিচাপেকে ধৰি ৮৬খন দেশক প্ৰতিনিধিত্ব কৰা ৬০ জন অংশগ্ৰহণকাৰী আছে।
हिन्दुस्थान समाचार / অৰৱিন্দ
