নতুন দিল্লী, ১২ মে’ (হি.স.)। ৰাষ্ট্ৰীয় প্ৰযুক্তি দিৱসৰ দিনা আয়োজন কৰা এক কাৰ্যসূচীত কাউন্সিল অৱ চাইন্টিফিক এণ্ড ইণ্ডাষ্ট্ৰিয়েল ৰিচাৰ্চ-চেণ্ট্ৰেল বিল্ডিং ৰিচাৰ্চ ইনষ্টিটিউট (চিএছআইআৰ-চিবিআৰআই), ৰুৰকিৰ দ্বাৰা বিকশিত ১৩টা থলুৱা প্ৰযুক্তি উদ্যোগ আৰু ষ্টাৰ্টআপলৈ হস্তান্তৰ কৰা হয়। ইয়াৰ ভিতৰত অগ্নি সুৰক্ষা, বহনক্ষম নিৰ্মাণ, শক্তি দক্ষতা, আৰু আন্তঃগাঁথনি সুৰক্ষাৰ সৈতে জড়িত উদ্ভাৱনসমূহো অন্তৰ্ভুক্ত।

কেন্দ্ৰীয় বিজ্ঞান আৰু প্ৰযুক্তি মন্ত্ৰালয়ৰ তথ্য অনুসৰি আজি ইয়াত চি এছ আই আৰ মুখ্য কাৰ্যালয়ত অনুষ্ঠিত কাৰ্যসূচীৰ সময়ত চি এছ আই আৰ-কেন্দ্ৰীয় বিল্ডিং ৰিচাৰ্চ ইনষ্টিটিউট (চি বি আৰ আই), ৰুৰকিৰ মুখ্য বিজ্ঞানী ড০ অজয় চৌৰাছিয়াই কয় যে উদ্যোগমুখী প্ৰযুক্তি হস্তান্তৰে দেশৰ উদ্ভাৱন-চালিত উন্নয়ন ত্বৰান্বিত কৰিব।

চিএছআইআৰ-চিবিআৰআইৰ সঞ্চালক অধ্যাপক আৰ প্ৰদীপ কুমাৰে ৰাষ্ট্ৰীয় প্ৰযুক্তি দিৱসত এই অনুষ্ঠানে বিশেষ তাৎপৰ্য বহন কৰা বুলি উল্লেখ কৰে, আৰু থলুৱা প্ৰযুক্তিসমূহ উদ্যোগলৈ হস্তান্তৰ কৰাটো ভাৰতৰ গৱেষণা পৰিৱেশ তন্ত্ৰক শক্তিশালী কৰাৰ লগতে স্বাৱলম্বী ভাৰতৰ লক্ষ্যত উপনীত হোৱাৰ দিশত এক মূল পদক্ষেপ বুলি উল্লেখ কৰে।

এই কাৰ্যসূচীত কাঠ আৰু ইয়াৰ বিকল্পৰ বাবে অগ্নিনিৰ্বাপক স্বচ্ছ আৱৰণ, আৰচিচি গঠন সুৰক্ষিত কৰাৰ বাবে আইপিএন আৱৰণ প্ৰযুক্তি, কম কাৰ্বনযুক্ত ইটা নিৰ্মাণ প্ৰযুক্তি, হাইব্ৰিড সৌৰ-সহায়ক হিট পাম্প ব্যৱস্থা, আৰু দেৱাল সুৰক্ষাৰ বাবে প্ৰিফেব্ৰিকেটেড উচ্চ শক্তিৰ ষ্টীল কৰ্ড প্ৰযুক্তিৰ স্থানান্তৰ অন্তৰ্ভুক্ত কৰা হৈছিল। এই প্ৰযুক্তিসমূহ ব্যৱসায়িক ৰূপায়ণৰ বাবে বিভিন্ন উদ্যোগ আৰু ষ্টাৰ্ট-আপলৈ হস্তান্তৰ কৰা হৈছিল।

এই উপলক্ষে চিএছআইআৰ স্মাৰ্ট ভিলেজ ইনিটিয়েটিভ (CSIR Smart Village Initiative) সম্পৰ্কীয় এটা ভিডিঅ'ও মুকলি কৰা হয়, য'ত গ্ৰাম্য উন্নয়ন আৰু বহনক্ষম প্ৰযুক্তিৰ ক্ষেত্ৰত চিএছআইআৰৰ অৱদানসমূহ প্ৰদৰ্শন কৰা হয়। চি এছ আই আৰ-চি বি আৰ আইৰ বাৰ্ষিক প্ৰতিবেদন ২০২৫-২৬ও প্ৰকাশ কৰা হয়।

চি এছ আই আৰৰ সঞ্চালক প্ৰধান তথা ডি এছ আই আৰৰ সম্পাদক ড০ এন কলাইচেলভিয়ে উল্লেখ কৰে যে ভাৰতৰ উন্নত ৰাষ্ট্ৰ হোৱাৰ যাত্ৰাত বিজ্ঞান, উদ্ভাৱন, আৰু প্ৰযুক্তি-চালিত উন্নয়নে গুৰুত্বপূৰ্ণ ভূমিকা পালন কৰিছে। চি এছ আই আৰ পৰীক্ষাগাৰৰ দ্বাৰা বিকশিত থলুৱা প্ৰযুক্তিসমূহ উদ্যোগলৈ হস্তান্তৰ কৰাটোৱে ৰাষ্ট্ৰীয় উদ্ভাৱন পৰিৱেশ তন্ত্ৰক শক্তিশালী কৰি তুলিছে আৰু স্বাৱলম্বী ভাৰতৰ লক্ষ্যৰ বাস্তৱায়নত ত্বৰান্বিত হৈছে। তেওঁ চি এছ আই আৰ-চি বি আৰ আইৰ দলটোক শেহতীয়া বছৰবোৰত ফলপ্ৰসূ প্ৰযুক্তি বিকশিত কৰি সমাজ আৰু উদ্যোগৰ মাজত প্ৰচাৰ কৰাৰ বাবে অভিনন্দন জনায়।

हिन्दुस्थान समाचार / অৰৱিন্দ