গুৱাহাটী, ১২ মে’ (হি.স.)। ভাৰতীয় জনতা পাৰ্টিৰ জ্যেষ্ঠ নেতৃ অজন্তা নেওগে অসমত ৰাষ্ট্ৰীয় গণতান্ত্ৰিক মিত্ৰজোঁটৰ চৰকাৰ গঠনৰ পিছতে আজি মঙলবাৰে একেৰাহে দ্বিতীয়বাৰৰ বাবে মন্ত্ৰী হিচাপে শপত গ্ৰহণ কৰে । গুৱাহাটীত অনুষ্ঠিত শপত গ্ৰহণ অনুষ্ঠানত অসমৰ ৰাজ্যপাল লক্ষ্মণ প্ৰসাদ আচাৰ্যই তেওঁক পদবী আৰু গোপনীয়তাৰ শপত গ্ৰহণ কৰোৱায়। ৰাজ্যত একেৰাহে তৃতীয়বাৰৰ বাবে এনডিএ চৰকাৰ গঠন হোৱাৰ পাছত মন্ত্ৰীসভাত তেওঁক মন্ত্ৰীসভাত চামিল কৰা হৈছে ।

১০৩ নং গোলাঘাট বিধান সভা সমষ্টিক প্ৰতিনিধিত্ব কৰা অজন্তা নেওগক অসমৰ অন্যতম বিশিষ্ট মহিলা নেত্ৰী হিচাপে গণ্য কৰা হয়। মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত পূৰ্বৰ চৰকাৰত তেওঁ বিত্ত আৰু মহিলা আৰু শিশু উন্নয়নৰ দায়িত্ব পালন কৰিছিল। অসমৰ প্ৰথমগৰাকী মহিলা বিত্তমন্ত্ৰীও হৈছিল।

২০০১ চনৰ পৰা একেৰাহে ৫টা কাৰ্যকালৰ বাবে গোলাঘাটৰ পৰা বিধায়িকা নিৰ্বাচিত হোৱা অজন্তা নেওগ ৰাজ্যৰ সৰ্বাধিক দীৰ্ঘদিনীয়া মহিলা বিধায়িকাও। ২০২০ চনৰ ডিচেম্বৰ মাহত ভাৰতীয় জনতা পাৰ্টিত যোগদান কৰাৰ পূৰ্বে তেওঁ ৰাজহুৱা কাম, নগৰ উন্নয়ন, আৰু গৃহ নিৰ্মাণকে ধৰি কেইবাটাও গুৰুত্বপূৰ্ণ পদত অধিষ্ঠিত হৈছিল।

গুৱাহাটীত জন্মগ্ৰহণ কৰা অজন্তা নেওগে গৌহাটী বিশ্ববিদ্যালয়ৰ পৰা এম এ, এল এল বি, এল এল এম ডিগ্ৰী লাভ কৰে। পৰৱৰ্তী সময়ত তেওঁ গৌহাটী উচ্চ ন্যায়ালয়ত অধিবক্তা হিচাপে ওকালতি কৰিছিল। তেওঁ সন্দিকৈ গাৰ্লছ কলেজৰ প্ৰাক্তন ছাত্ৰীও।

গড়কাপ্তানি মন্ত্ৰী হিচাপে তেওঁৰ কাৰ্যকালত অসমৰ আন্তঃগাঁথনি উন্নয়নে নতুন গতি লাভ কৰিছিল। নৱগঠিত অসম কেবিনেটৰ মন্ত্ৰীসকলৰ পৰ্টফলিঅ’ এতিয়াও আনুষ্ঠানিকভাৱে ঘোষণা কৰা হোৱা নাই।

অজন্তা নেওগৰ স্বামী প্ৰয়াত নগেন নেওগ আছিল এজন বিশিষ্ট কংগ্ৰেছ নেতা তথা অসম চৰকাৰৰ প্ৰাক্তন গ্ৰামোন্নয়ন মন্ত্ৰী। গোলাঘাট সমষ্টিৰ পৰা অসম বিধানসভালৈ নিৰ্বাচিত হোৱা নগেন নেওগে প্ৰাক্তন মুখ্যমন্ত্ৰী ড° হিতেশ্বৰ শইকীয়াৰ কেবিনেটত মন্ত্ৰী হিচাপে কাৰ্যনিৰ্বাহ কৰিছিল। ১৯৯৬ চনৰ ৬ মে’ত আলফা উগ্ৰপন্থীৰ আক্ৰমণত মৃত্যু হোৱা নগেন নেওগে পত্নী অজন্তা নেওগ আৰু দুজন পুত্ৰক এৰি থৈ যায়। নগেন নেওগৰ মৃত্যুৰ পাছতহে অজন্তাই সক্ৰিয় ৰাজনীতিত প্ৰৱেশ কৰে আৰু পিছলৈ অসমৰ এগৰাকী আগশাৰীৰ মহিলা নেত্ৰী হিচাপে নিজকে প্ৰতিষ্ঠা কৰে।

हिन्दुस्थान समाचार / মনোজ কুমাৰ শইকীয়া