নতুন দিল্লী, ১১ মে’ (হি.স.)। ৰাষ্ট্ৰীয় স্বয়ংসেৱক সংঘৰ যুটীয়া সাধাৰণ সম্পাদক ড০ কৃষ্ণ গোপালে সোমবাৰে কয় যে ভাৰতৰ বাবে প্ৰকৃতি কেৱল এক সম্পদ নহয়, বৰঞ্চ এক জীৱিত সত্তা। কনষ্টিটিউচন ক্লাবৰ মাভলংকাৰ প্ৰেক্ষাগৃহত প্ৰকৃতি বিকাশ মঞ্চৰ তত্বাৱধানত আয়োজিত প্ৰকৃতি সংবাদ কাৰ্যসূচীত ড° গোপালে সম্বোধন কৰে। এই কাৰ্যসূচীত পৰিৱেশ সুৰক্ষা আৰু ভৱিষ্যতৰ উন্নয়ন নীতিৰ ওপৰত গভীৰ আলোচনা কৰা হয়।

কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰী, দিল্লী বিশ্ববিদ্যালয়ৰ উপাচাৰ্য অধ্যাপক যোগেশ সিং, লাল বাহাদুৰ শাস্ত্ৰী ৰাষ্ট্ৰীয় সংস্কৃত বিশ্ববিদ্যালয়ৰ উপাচাৰ্য অধ্যাপক মুৰালী মনোহৰ পাঠক, প্ৰাক্তন সাংসদ মহেশ চন্দ্ৰ শৰ্মা, মহাৰাজা আগৰসেন বিশ্ববিদ্যালয়ৰ অধ্যক্ষ ড° নন্দ কিশোৰ গাৰ্গৰ লগতে সমাজ কৰ্মী, বিভিন্ন ক্ষেত্ৰৰ বুদ্ধিজীৱী, পৰিৱেশবিদ, আৰু বিশিষ্ট ব্যক্তিসকল উপস্থিত আছিল।

ড° কৃষ্ণ গোপালে কয়, পৃথিৱী আমাৰ সম্পত্তি নহয়, আমাৰ মাতৃ। ইয়াৰ সংৰক্ষণেহে মানৱতাৰ ভৱিষ্যত সুৰক্ষিত কৰিব পাৰে। পশ্চিমীয়াসকলৰ বাবে পৃথিৱীখন হয়তো 'সম্পত্তি' হ'ব পাৰে, কিন্তু ভাৰতীয়সকলৰ বাবে ই এগৰাকী 'মাতৃ'। আমি পৃথিৱীখনত আমি কোৰ মৰাৰ আগতেই অনুমতি বিচাৰো। দেশৰ পৰিৱৰ্তিত ৰাজনৈতিক পৰিৱেশৰ পৰা আৰম্ভ কৰি কেদাৰনাথৰ দুৰ্গম পাহাৰ আৰু উত্তৰ-পূবৰ চাহ বাগিচালৈকে উদাহৰণ দি ড০ কৃষ্ণ গোপালে স্পষ্ট কৰি দিলে যে ভাৰতৰ আত্মা ইয়াৰ ‘প্ৰকৃতিৰ পূজা’ত বাস কৰে। তেওঁ সকীয়াই দিছিল যে যদি আমি পৃথিৱীখন গৰম কৰি যাওঁ তেন্তে ইয়াৰ পৰিণাম ভয়াৱহ হ’ব। অমৌসুমী বৰষুণ আৰু প্ৰাকৃতিক দুৰ্যোগ এই শোষণৰ ফল।

কৃষ্ণ গোপালে প্ৰকৃতি বিকাশ মঞ্চৰ আহ্বায়ক কে.এন. গোবিন্দাচাৰ্য, সমাজৰ প্ৰচেষ্টাক প্ৰশংসা কৰি সমাজখনক ‘মিতব্যয়ী’ আৰু ‘সংযত’ হ’বলৈ আহ্বান জনায়। তেওঁ এই বাৰ্তা প্ৰদান কৰে যে যদি আমি প্ৰকৃতাৰ্থে প্ৰকৃতি সংৰক্ষণ কৰিব বিচাৰো তেন্তে ঋষিসকলৰ পৰম্পৰাৰ লগত আমাৰ জীৱনশৈলী খাপ খুৱাই ল’ব লাগিব, য’ত প্ৰয়োজন অনুসৰি মাত্ৰ ল’বলৈ অনুশাসন আছে।

ইন্দিৰা গান্ধী ৰাষ্ট্ৰীয় কলা কেন্দ্ৰৰ অধ্যক্ষ ৰাম বাহাদুৰ ৰায়ে কয় যে পণ্ডিত দীনদয়াল উপাধ্যায়ৰ পিছত যদি কোনো প্ৰকৃত ৰাজনৈতিক দাৰ্শনিক আছে তেন্তে সেয়া কেৱল কে.এন. গোবিন্দাচাৰ্য। তেওঁৰ ৰাজনৈতিক দৰ্শনে ক্ষমতালৈ লৈ যাব নে নাই নাজানো, কিন্তু ইয়াৰ দ্বাৰা সমাজখন উন্নত হ’ব আৰু স্বাৱলম্বী হ’ব সেয়া নিশ্চিত। কে.এন. গোবিন্দাচাৰ্যই কয় যে যিকোনো জাতিৰ অগ্ৰগতি কেৱল কৰ বা ৰাজহৰ দ্বাৰাই নহয়, ইয়াৰ সামাজিক পুঁজি আৰু সাংস্কৃতিক পৰম্পৰাৰ দ্বাৰা নিৰ্ধাৰিত হয়। তেওঁ যুৱক-যুৱতীসকলক নিজৰ পথ নিজে গঢ়ি তুলিবলৈ আহ্বান জনায়। আধুনিক উন্নয়নৰ দৌৰত প্ৰকৃতিক আওকাণ কৰিলে ভৱিষ্যত প্ৰজন্মৰ বাবে সংকটৰ সৃষ্টি হ’ব পাৰে বুলি অনুষ্ঠানত বক্তাসকলে গুৰুত্ব আৰোপ কৰে। উন্নয়ন কেৱল আন্তঃগাঁথনিৰ মাজতে সীমাবদ্ধ নাথাকিব লাগে বৰঞ্চ পানী, বনাঞ্চল, ভূমি সংৰক্ষণকো অন্তৰ্ভুক্ত কৰিব লাগিব।

हिन्दुस्थान समाचार / অৰৱিন্দ