নতুন দিল্লী, ১১ মে’ (হি.স.)। লোকসভাত বিৰোধী দলৰ নেতা ৰাহুল গান্ধী আৰু কংগ্ৰেছৰ সভাপতি মল্লিকাৰ্জুন খৰ্গেয়ে সোমবাৰে প্ৰধানমন্ত্ৰী নৰেন্দ্ৰ মোডীয়ে সংযমপূৰ্ণ উপভোগৰ আহ্বানক সমালোচনা কৰে। বিৰোধীয়ে প্ৰধানমন্ত্ৰীৰ “ত্যাগৰ” আহ্বানক চৰকাৰৰ ব্যৰ্থতাৰ নথি বুলি অভিহিত কৰে।

এক্সত প্ৰধানমন্ত্ৰীৰ ভাষণৰ প্ৰতিক্ৰিয়া প্ৰকাশ কৰি ৰাহুল গান্ধীয়ে কয় যে মোডীয়ে জনসাধাৰণক সোণ ক্ৰয়ৰ পৰা বিৰত থাকিবলৈ, বিদেশ ভ্ৰমণ কৰিবলৈ, পেট্ৰ’লৰ ব্যৱহাৰ হ্ৰাস কৰিবলৈ, সাৰ আৰু খাব পৰা তেলৰ ব্যৱহাৰ হ্ৰাস কৰিবলৈ কৰা আহ্বান তেওঁৰ চৰকাৰৰ ব্যৰ্থতাৰ প্ৰমাণ। তেওঁ কয়, ১২ বছৰত দেশখন এনে এটা পৰ্যায় পাইছেগৈ যে জনসাধাৰণক কি কিনিব আৰু কি কিনিব নালাগে সেইটো ক'ব লাগিব। প্ৰতিবাৰেই জবাবদিহিতাৰ পৰা হাত সাৰিবলৈ দায়িত্ব জনসাধাৰণৰ ওপৰত স্থানান্তৰিত কৰা হয়।

প্ৰধানমন্ত্ৰীৰ সঞ্চয়ৰ পাঠক লৈ কংগ্ৰেছৰ সভাপতি মল্লিকাৰ্জুন খৰ্গেয়ে কয় যে দেশৰ জনসাধাৰণে আৰ্থিক দুৰ্দশাৰ সৈতে যুঁজি থকা সময়ত প্ৰচাৰ কৰা হৈছে। তেওঁ অভিযোগ কৰে যে ফেব্ৰুৱাৰী মাহত যেতিয়া পশ্চিম এছিয়াত যুদ্ধসদৃশ পৰিস্থিতিৰ সৃষ্টি হৈছিল তেতিয়া কংগ্ৰেছে অৰ্থনীতিৰ পতন, টকা হ্ৰাস, মুদ্ৰাস্ফীতি আদি বিষয়ত সকীয়াই দিছিল যদিও চৰকাৰে নিৰ্বাচনী সভা অনুষ্ঠিত কৰাত ব্যস্ত আছিল। অৰ্থনীতি আৰু খাদ্য সুৰক্ষাৰ প্ৰতি ভাবুকি কঢ়িয়াই অনাৰ সময়ত প্ৰধানমন্ত্ৰীয়ে কিয় ৰোড শ্ব’ অনুষ্ঠিত কৰিছিল? নিৰ্বাচন শেষ হোৱাৰ পিছত কিয় নিষেধাজ্ঞা আৰোপ কৰি জনসাধাৰণৰ আগত প্ৰচাৰ কৰিছে?

খৰ্গে কয় যে প্ৰধানমন্ত্ৰীয়ে নিজৰ ১২ বছৰীয়া ব্যৰ্থতাৰ বোজা জনসাধাৰণৰ কান্ধত তুলি দিয়াটো বন্ধ কৰক। গোস্বামী তুলসীদাসৰ এটা পদ্যৰ উদ্ধৃতি দি তেওঁ কয়, পৰ উপদেশ কুশল বহুতেৰে অৰ্থাৎ বহু লোক আনক পৰামৰ্শ দিয়াত পাকৈত, কিন্তু নিজে অনুসৰণ কৰাটো কঠিন।

মন কৰিবলগীয়া যে দেওবাৰে তেলেংগানাৰ ৰাজধানী হায়দৰাবাদত পশ্চিম এছিয়াত চলি থকা যুদ্ধ আৰু বিশ্ব সংকটৰ মাজতে প্ৰধানমন্ত্ৰী মোদীয়ে দেশবাসীক পেট্ৰল-ডিজেল ৰাহি কৰিবলৈ, বিদেশ ভ্ৰমণ পিছুৱাই দিবলৈ, সোণ ক্ৰয় হ্ৰাস কৰিবলৈ, থলুৱা সামগ্ৰীৰ ব্যৱহাৰক প্ৰসাৰিত কৰিবলৈ আহ্বান জনায়।

हिन्दुस्थान समाचार / মনোজ কুমাৰ শইকীয়া