ভেৰাভল (গীৰ সোমনাথ), গুজৰাট, ১১ মে (হি.স.)। ভগৱান শিৱৰ ১২টা পবিত্ৰ জ্যোতিৰ্লিংগৰ ভিতৰত প্ৰথমটো সোমনাথ মন্দিৰ পৰিসৰ অমৃত পৰ্বৰ বাবে সম্পূৰ্ণৰূপে সাজু হৈছে। প্ৰথমবাৰৰ বাবে দেশৰ ১১টা পবিত্ৰ তীৰ্থস্থানৰ পৰা বিশেষ কলহ (পানীৰ পাত্ৰ)ৰে অনা জলৰে মন্দিৰৰ ভৱ্য শিখৰৰ কুম্ভভিষেক কৰা হ’ব। ইয়াৰ দ্বাৰা সোমনাথৰ গৌৰৱময় ইতিহাসৰ এক সোণালী অধ্যায় হিচাপে চিহ্নিত হ’ব। আজি পুৱা প্ৰায় ১০:১৫ বজাত এই অনুষ্ঠানৰ সাক্ষী হ’ব প্ৰধানমন্ত্ৰী নৰেন্দ্ৰ মোদী।

প্ৰায় আঠ ফুট উচ্চতাৰ বিশেষভাৱে সাজি উলিওৱা কলহটোৰ ধাৰণ ক্ষমতা ১১০০ লিটাৰ। সমগ্ৰ গঠনটোৰ ওজন ১৮৬০ কিলোগ্ৰাম, ইয়াৰে কলহটোৰ ওজন ৭৬০ কিলোগ্ৰাম। এনে বৃহৎ আৰু প্ৰযুক্তিগতভাৱে উন্নত কলহ অভিযান্ত্ৰিক আশ্চৰ্য্যৰ এক উল্লেখযোগ্য উদাহৰণ। গুজৰাটৰ মুখ্যমন্ত্ৰী ভূপেন্দ্ৰ পেটেল আৰু উপ-মুখ্যমন্ত্ৰী হৰ্ষ সংঘৱীয়েও প্ৰধানমন্ত্ৰী নৰেন্দ্ৰ মোডীৰ সৈতে এই অনুষ্ঠানত অংশগ্ৰহণ কৰিব। এই ঐশ্বৰিক মুহূৰ্তৰ সাক্ষী হ’বলৈ ভাৰত-বিদেশৰ হাজাৰ হাজাৰ ভক্ত সোমনাথত উপস্থিত হৈছে। সোমনাথ মন্দিৰ ফুলৰে সজাই পৰাই তোলা হৈছে।

সংস্কাৰ কৰা মন্দিৰৰ উদ্বোধনী ৭৫ বছৰীয়া জয়ন্তী উপলক্ষে আয়োজন কৰা হৈছে সোমনাথ অমৃত মহোৎসৱ। প্ৰধানমন্ত্ৰী নৰেন্দ্ৰ মোদীয়ে বিশেষ মহাপূজাত অংশগ্ৰহণ কৰিব, তাৰ পিছত কুম্ভভিষেক আৰু পতাকা উত্তোলন অনুষ্ঠান অনুষ্ঠিত হ’ব। প্ৰধানমন্ত্ৰীয়ে সোমনাথৰ চহকী ঐতিহ্য আৰু আধ্যাত্মিক তাৎপৰ্য্যক উজ্জ্বল কৰি তোলা স্মৃতিচাৰণ ডাক টিকট আৰু মুদ্ৰাও মুকলি কৰিব।

অমৃত মহোৎসৱৰ বিষয়াসকলে উল্লেখ কৰে যে ৯০ মিটাৰ উচ্চতাৰ ক্ৰেন ব্যৱহাৰ কৰি এই বিশাল কুম্ভটো সযতনে মন্দিৰৰ ওপৰলৈ তুলি লোৱা হ’ব। অত্যাধুনিক ৰিম’ট কণ্ট্ৰ’ল চিষ্টেম আৰু চেন্সৰ চিষ্টেম ব্যৱহাৰ কৰি মাত্ৰ তিনি মিনিটতে ১১টা পবিত্ৰ তীৰ্থস্থানৰ পৰা সংগ্ৰহ কৰা পবিত্ৰ জল, বৈদিক মন্ত্ৰোচ্চাৰণ, শংখ ধ্বনি, ঘণ্টাৰ প্ৰতিধ্বনিৰ মাজত শিখৰ অভিষেক কাম সম্পন্ন কৰা হ’ব। উল্লেখ্য যে গীৰ সোমনাথ জিলাৰ প্ৰভাস পাতনত আৰব সাগৰৰ পাৰত অৱস্থিত এই মন্দিৰটো।

हिन्दुस्थान समाचार / অৰৱিন্দ