ৱাশ্বিংটন/তেহৰাণ, ১১ মে’ (হি.স.)। চলিত বছৰৰ ফেব্ৰুৱাৰীৰ শেষৰ ফালৰ পৰা হৰমুজ জলদ্বীপক লৈ আমেৰিকা আৰু ইৰাণৰ মাজত বৃদ্ধি পোৱা উত্তেজনা আৰু গভীৰ হোৱাৰ সম্ভাৱনা আছে। যুদ্ধ ৰোধ আৰু উত্তেজনা লাঘৱ কৰাৰ বাবে শেহতীয়া কূটনৈতিক প্ৰচেষ্টাত বিপৰ্যয়ৰ সন্মুখীন হৈছে। আমেৰিকাৰ ৰাষ্ট্ৰপতি ড’নাল্ড ট্ৰাম্পে ৱাশ্বিংটনৰ শান্তি প্ৰস্তাৱৰ প্ৰতি ইৰাণৰ সঁহাৰি সম্পূৰ্ণৰূপে গ্ৰহণযোগ্য নহয় বুলি অভিহিত কৰিছে। ইৰাণৰ সেনাই আমেৰিকা আৰু ইজৰাইলক সকীয়াই দিছে যে যদিহে আগ্ৰাসন পুনৰ আৰম্ভ হয় তেন্তে দুয়োখন দেশেই কল্পনাৰ বাহিৰত প্ৰত্যাহ্বানৰ সন্মুখীন হ’ব।
আল জাজিৰা আৰু চিবিএছ নিউজৰ প্ৰতিবেদনত এই পৰিঘটনাৰ বিশদ বিৱৰণ দিয়া হৈছে। যুদ্ধৰ অন্ত পেলাবলৈ ইৰাণৰ শেহতীয়া প্ৰস্তাৱ সম্পূৰ্ণৰূপে নাকচ কৰিছে ট্ৰাম্পে । ইৰানে ইয়াৰ উত্তৰত কয় যে যদিহে আমেৰিকাই নৌসেনাৰ অৱৰোধ তৎক্ষণাত প্ৰত্যাহাৰ কৰে, নিষেধাজ্ঞা উঠাই লয় আৰু নিজৰ পাৰমাণৱিক কাৰ্যসূচী আৰু বৈদেশিক নীতিত হস্তক্ষেপ কৰাৰ পৰা বিৰত থাকে তেন্তে সংঘাত বন্ধ কৰিবলৈ সাজু। এই যুদ্ধৰ সূচনা কৰিবলৈ ৱাশ্বিংটনে উল্লেখ কৰা কিছুমান বিষয় এইবোৰেই। আমেৰিকাৰ ৰাষ্ট্ৰপতি ট্ৰাম্পে উল্লেখ কৰে যে আমেৰিকাই কেতিয়াও এনে কাম নকৰে। ইৰানে যে বিশ্বৰ দ্বাদশ বা ত্ৰয়োদশ পাৰমাণৱিক শক্তি হোৱাৰ আকাংক্ষা কৰিছে সেয়া কোনো গোপন কথা নহয়। ইয়াৰ উপৰিও ইজৰাইলৰ বিৰুদ্ধে আক্ৰমণ চলাব পৰা ক্ষমতাও আছে। হামাছ, হিজবুল্লাহৰ দৰে সন্ত্ৰাসবাদী সংগঠনৰ প্ৰতি ইৰাণৰ সমৰ্থন বন্ধ কৰিব বিচাৰিছে আমেৰিকাই। দুয়োখন দেশৰ মাজত কিছুমান মূল বিষয় আছে যিবোৰ শান্তিৰ বাবে উজুটি খাই থিয় দিছে।
ৰাষ্ট্ৰপতি ট্ৰাম্পে ট্ৰুথ ছ’চিয়েলত লিখিছে, মই এইমাত্ৰ ইৰাণৰ তথাকথিত প্ৰতিনিধিৰ প্ৰতিক্ৰিয়া পঢ়িলোঁ। এয়া মোৰ ভাল নালাগিল। ই সম্পূৰ্ণ অগ্ৰাহ্য! দ্বিতীয়টো পোষ্টত তেওঁ কয়, যোৱা ৪৭ বছৰ ধৰি ইৰাণে আমেৰিকা আৰু বিশ্বৰ বাকী অংশৰ সৈতে খেল খেলি আহিছে। ২০১৫ চনত ওবামা প্ৰশাসনে ইৰাণৰ পাৰমাণৱিক কাৰ্যসূচী সীমিত কৰাৰ লক্ষ্যৰে চুক্তি স্বাক্ষৰ কৰিছিল। মোৰ প্ৰথম কাৰ্যকালত এই চুক্তিত মই অনুমোদন দিয়া নাছিলো। শেহতীয়াকৈ ইৰাণে ৪২,০০০ নিৰীহ আৰু নিৰস্ত্ৰ প্ৰতিবাদকাৰীক হত্যা কৰিছিল। তেওঁলোকে আমাক লৈ হাঁহিছে। এতিয়া আৰু তেওঁলোকে হাঁহিব নোৱাৰিব।
ইৰাণে হৰমুজ জলদ্বীপত ফ্ৰান্স-ব্ৰিটিছৰ এই প্ৰচেষ্টাৰ বিৰুদ্ধেও সকীয়াই দিছে। ইৰাণৰ উপ-বিদেশ মন্ত্ৰীয়ে কয় যে যদিহে আমেৰিকাই হৰমুজত কৰা অবৈধ কাৰ্যক সমৰ্থন কৰে তেন্তে সশস্ত্ৰ বাহিনীয়ে নিৰ্ণায়ক আৰু তৎক্ষণাত প্ৰতিক্ৰিয়া প্ৰকাশ কৰিব। ইয়াৰ পিছত ফ্ৰান্সৰ ৰাষ্ট্ৰপতি ইমানুৱেল মেক্ৰনে কয় যে এইটো সামৰিক নিয়োগ নহয়, বৰঞ্চ আন্তঃৰাষ্ট্ৰীয় অভিযান হ’ব যাৰ লক্ষ্য হ’ব পৰিস্থিতিৰ উন্নতিৰ সময়ত জাহাজৰ চলাচল সুৰক্ষিত কৰা। ব্ৰিটিছ ৰয়েল নেভিয়ে জনোৱা মতে, এই সপ্তাহত এইচ এম এছ ড্ৰেগনক মধ্যপ্ৰাচ্যত নিয়োগ কৰা হ’ব। এইচ এম এছ ড্ৰেগন হৈছে ব্ৰিটিছ ৰয়েল নেভিৰ এখন ধ্বংসকাৰী যুদ্ধ জাহাজ। বিমান আৰু ক্ষেপণাস্ত্ৰৰ দৰে আকাশৰ ভাবুকিৰ পৰা সুৰক্ষা প্ৰদান কৰিবলৈ ইয়াক বিশেষভাৱে ডিজাইন কৰা হৈছে।
हिन्दुस्थान समाचार / মনোজ কুমাৰ শইকীয়া
