পেৰিছ, ১১ মে’ (হি.স.)। স্পেইনৰ টেনেৰিফৰ পৰা প্ৰত্যাৱৰ্তন কৰা পাঁচজন ফ্ৰান্সৰ নাগৰিকৰ ভিতৰত এজনৰ বিমান যাত্ৰাৰ সময়ত হান্টাভাইৰাছৰ দৰে লক্ষণ দেখা দিয়াৰ কথা নিশ্চিত কৰিছে ফ্ৰান্স চৰকাৰে। ইয়াৰ পিছতে সকলো যাত্ৰীক সতৰ্কতামূলক ব্যৱস্থা হিচাপে কঠোৰ পৃথকীকৰণ (আইছ’লেচন)ত ৰখা হৈছে ।
ছ’চিয়েল মিডিয়া প্লেটফৰ্ম ‘এক্স’ত তথ্য ভাগ-বতৰা কৰি ফ্ৰান্সৰ প্ৰধানমন্ত্ৰী চেবাষ্টিয়ান লেকৰ্ণুৱে কয় যে লক্ষণ প্ৰদৰ্শন কৰা যাত্ৰীজনক চিনাক্ত কৰাৰ পিছতেই স্বাস্থ্য সুৰক্ষাৰ প্ৰট’কল তৎক্ষণাত কাৰ্যকৰী কৰা হয়। তেওঁ উল্লেখ কৰে যে পাঁচোজন যাত্ৰীক পৃথক কৰি ৰখা হৈছে আৰু অহৰহ চিকিৎসা পৰ্যবেক্ষণৰ অধীনত আছে।
প্ৰধানমন্ত্ৰীৰ মতে, যাত্ৰীসকলৰ সংক্ৰমণ নিশ্চিত কৰাৰ লগতে সময়মতে যিকোনো সম্ভাৱ্য বিপদ ৰোধ কৰিবলৈ যাত্ৰীসকলৰ বিশদ স্বাস্থ্য পৰীক্ষা আৰু লেব টেষ্ট কৰা হ’ব। তেওঁ উল্লেখ কৰে যে চৰকাৰে জনসাধাৰণৰ সুৰক্ষাক অগ্ৰাধিকাৰ দিছে আৰু কন্টাক্ট ট্ৰেচিং আৰম্ভ কৰিছে।
তদুপৰি ফৰাচী প্ৰশাসনে ঘনিষ্ঠ যোগাযোগৰ বাবে বিশেষ পৃথকীকৰণ ব্যৱস্থা ৰূপায়ণৰ বাবে সাজু হৈছে। এই সন্দৰ্ভত শীঘ্ৰে চৰকাৰী আদেশ জাৰি কৰা হ’ব বুলি প্ৰধানমন্ত্ৰীয়ে উল্লেখ কৰে।
এতিয়াৰ বাবে ফ্ৰান্সৰ স্বাস্থ্য বিভাগে জনসাধাৰণক আতংকিত হোৱাতকৈ সজাগ হৈ থাকিবলৈ আহ্বান জনাইছে। বিষয়াসকলে কয় যে পৰিস্থিতিৰ ওপৰত নিৰন্তৰ নিৰীক্ষণ কৰা হৈছে আৰু সংক্ৰমণ ৰোধৰ বাবে প্ৰয়োজনীয় সকলো পদক্ষেপ গ্ৰহণ কৰা হৈছে।
হান্টাভাইৰাছক বিৰল কিন্তু গুৰুতৰ সংক্ৰমণ বুলি গণ্য কৰা হয়, সাধাৰণতে সংক্ৰমিত এন্দুৰ বা আন ৰোডেন্টৰ সংস্পৰ্শৰ দ্বাৰা বিয়পে। ইয়াৰ লক্ষণসমূহ হ’ব পাৰে উচ্চ জ্বৰ, মূৰৰ বিষ, শৰীৰৰ বিষ, উশাহ-নিশাহ লোৱাত কষ্ট আৰু গুৰুতৰ ক্ষেত্ৰত হাওঁফাওঁৰ সমস্যা।
हिन्दुस्थान समाचार / মনোজ কুমাৰ শইকীয়া
