ৱাশ্বিংটন, ০৭ এপ্ৰিল (হি.স.)। ইৰাণ যুদ্ধ সন্দৰ্ভত আমেৰিকাৰ ৰাষ্ট্ৰপতি ড’নাল্ড ট্ৰাম্পে এক বৃহৎ দাবী উত্থাপন কৰি কয় যে শত্ৰুৰ ভূখণ্ডত আবদ্ধ হৈ থকা এজন পাইলটক উদ্ধাৰৰ বাবে আমেৰিকাৰ সেনাই “এতিয়ালৈকে সৰ্ববৃহৎ উদ্ধাৰ অভিযান” চলাইছিল।
হোৱাইট হাউছত সংবাদ মাধ্যমক সম্বোধন কৰি ট্ৰাম্পে কয় যে প্ৰায় ২০০ জন সৈনিক নিয়োগ কৰা হৈছে আৰু ২১খন সামৰিক বিমান শত্ৰুৰ আকাশমাৰ্গলৈ প্ৰেৰণ কৰা হৈছে। তেওঁৰ মতে, পাইলটজন ইৰাণৰ ভূখণ্ডত দুৰ্ঘটনাগ্ৰস্ত হৈ অতি বিপজ্জনক পৰিস্থিতিত নিৰাপদে উলিয়াই আনিছিল।
ট্ৰাম্পে কয় যে অভিযানৰ সময়ত আমেৰিকাৰ বিমানত অতি ওচৰৰ পৰা গুলীচালনা কৰা হৈছিল যদিও ইয়াৰ পিছতো সেনাই সাহস প্ৰদৰ্শন কৰি অভিযানটো সফলতাৰে সম্পূৰ্ণ কৰে। তেওঁ আমেৰিকান সৈন্যসকলৰ শৌৰ্য আৰু সাহসৰ প্ৰশংসা কৰে।
অৱশ্যে ট্ৰাম্পেও নিজৰ বক্তব্যত কঠোৰ স্থিতি গ্ৰহণ কৰে। তেওঁ সকীয়াই দিয়ে যে আমেৰিকাই “মাত্ৰ এটা ৰাতিতে সমগ্ৰ ইৰাণ ধ্বংস কৰিব পাৰে” আৰু যিকোনো সময়তে এনে ব্যৱস্থা সম্ভৱপৰ। এই বক্তব্যই আন্তঃৰাষ্ট্ৰীয় উদ্বিগ্নতাৰ সৃষ্টি কৰিব পাৰে।
ট্ৰাম্পে লগতে প্ৰকাশ কৰে যে অভিযানৰ সময়ত আমেৰিকাৰ এখন বিমান শত্ৰুৰ হাতত নপৰিবলৈ আত্মধ্বংস কৰিবলগীয়া হৈছিল। তেওঁ দাবী কৰে যে মিছনটোৰ সৈতে জড়িত স্পৰ্শকাতৰ তথ্য ফাদিল হৈছে, আৰু এতিয়া তদন্ত তীব্ৰতৰ কৰা হৈছে।
তেওঁ কেন্দ্ৰীয় চোৰাংচোৱা সংস্থাৰ ভূমিকাকো প্ৰশংসা কৰি কয় যে সমগ্ৰ অভিযানত সংস্থাটোৱে উল্লেখযোগ্য ভূমিকা পালন কৰিছিল।
ইফালে ইৰাণেও তীব্ৰ প্ৰতিক্ৰিয়া প্ৰকাশ কৰিছে। দেশৰ নতুন উচ্চতম নেতা মোজতাবা খামেনীয়ে কয় যে নেতাসকলৰ হত্যা বা নেতাৰ ওপৰত আক্ৰমণৰ ঘটনাক লৈ ইৰাণ বিৰত নাথাকিব।
যুদ্ধবিৰতিৰ বিষয়টোত ইৰাণে স্পষ্টভাৱে উল্লেখ কৰিছে যে তেওঁলোকে অস্থায়ী যুদ্ধবিৰতি বিচৰা নাই, বৰঞ্চ যুদ্ধৰ সম্পূৰ্ণ আৰু স্থায়ী অন্ত বিচাৰে।
পশ্চিম এছিয়াত বৃদ্ধি পোৱা উত্তেজনাৰ মাজতে দুয়োখন দেশৰ বক্তব্যই পৰিস্থিতি আৰু অধিক ভয়াৱহ কৰি তুলিছে, যাৰ ফলত বিশ্বজনীন উদ্বেগ বৃদ্ধি পাইছে।
हिन्दुस्थान समाचार / মনোজ কুমাৰ শইকীয়া
