ইম্ফল, ০৭ এপ্ৰিল (হি.স.)। মণিপুৰৰ বিষ্ণুপুৰ জিলাত মঙলবাৰে পুৱতি নিশা সংঘটিত হোৱা সন্দেহজনক কুকি উগ্ৰপন্থীৰ ৰকেট আক্ৰমণত দুজন নাবালক শিশুৰ মৃত্যু হোৱা ঘটনাই সমগ্ৰ অঞ্চলটোত তীব্ৰ উত্তেজনা আৰু ক্ষোভৰ সৃষ্টি কৰিছে । ঘটনাটো মৈৰাং থানাৰ অন্তৰ্গত ত্ৰংলাওবি অৱাং লেইকাইত প্ৰায় ৰাতি ১ বজাৰ পিছত সংঘটিত হয় । এক সন্দেহজনক প্ৰজেক্টাইল আৱাসিক অঞ্চলত পৰি বিস্ফোৰণ সংঘটিত হোৱাত পাঁচ বছৰীয়া এটি ল’ৰা আৰু পাঁচ মাহীয়া এটি কণমানি ছোৱালীৰ ঘটনাস্থলীতেই মৃত্যু হয়। তেওঁলোকৰ মাতৃ গুৰুতৰভাৱে আঘাতপ্ৰাপ্ত হয় আৰু তৎক্ষণাত ৰাজ মেডিচিটি চিকিৎসালয়ত ভৰ্তি কৰা হয়। চিকিৎসালয়ৰ সূত্ৰ অনুসাৰে, দুয়োটা শিশুক মৃত অৱস্থাত অনা হৈছিল আৰু মহিলাগৰাকীৰ অৱস্থা সংকটজনক হৈ আছে।

ঘটনাৰ পিছতে স্থানীয় লোকসকলৰ মাজত তীব্ৰ ক্ষোভৰ সৃষ্টি হয়। মৈৰাঙত প্ৰতিবাদকাৰীসকলে পথত নামি প্ৰতিবাদ সাব্যস্ত কৰে আৰু চুৰাচান্দপুৰ অভিমুখে যোৱা দুটা তেল টেংকাৰ আৰু এখন মালবাহী ট্ৰাক জ্বলাই দিয়ে, ফলত পৰিস্থিতিত অধিক অৱনতি ঘটে। প্ৰতিবাদকাৰীসকলে মৈৰাং থানাক ঘেৰাও কৰি দোষীক দ্ৰুত শাস্তি প্ৰদানৰ দাবী জনায়। থানাৰ বাহিৰত টায়াৰ আৰু আবর্জনা জ্বলাই প্ৰতিবাদ সাব্যস্ত কৰা হয়। পৰিস্থিতি নিয়ন্ত্ৰণ কৰিবলৈ অঞ্চলটোত বৃহৎ সংখ্যক নিৰাপত্তা বাহিনী মোতায়েন কৰা হৈছে। প্ৰশাসনৰ মতে, অৱস্থা এতিয়াও উত্তেজনাপূৰ্ণ যদিও পৰিস্থিতিৰ ওপৰত কঠোৰ নজৰ ৰখা হৈছে ।

মুখ্যমন্ত্ৰী ৱাই খেমচন্দ সিঙে ঘটনাটোৰ তীব্ৰ নিন্দা জনাই ইয়াক “বৰ্বৰ কাৰ্য” বুলি অভিহিত কৰে আৰু দোষীক চিনাক্ত কৰি কঠোৰ ব্যৱস্থা গ্ৰহণ কৰা হ’ব বুলি আশ্বাস দিয়ে। তেওঁ স্পষ্টকৈ কয় যে ৰাজ্যত এনে ধৰণৰ হিংসাত্মক ঘটনা কেতিয়াও সহ্য কৰা নহ’ব । ইফালে, মৈৰাং সমষ্টিৰ বিধায়ক থোকচোম শান্তি সিঙেও ঘটনাস্থলীত উপস্থিত হৈ এই আক্ৰমণক এক সন্ত্ৰাসবাদী কাৰ্য বুলি অভিহিত কৰে আৰু পীড়িত পৰিয়াললৈ গভীৰ সমবেদনা জ্ঞাপন কৰে । তেওঁও দোষীক কঠোৰ শাস্তি প্ৰদানৰ দাবী জনায় । বৰ্তমানলৈকে আক্ৰমণটোৰ আঁৰত কাক জড়িত আছে সেয়া চৰকাৰীভাৱে নিশ্চিত হোৱা নাই। ঘটনাটোৰ তদন্ত অব্যাহত আছে আৰু অধিক তথ্যৰ অপেক্ষা কৰা হৈছে ।

হিন্দুস্থান সমাচাৰ / শ্ৰীপ্ৰকাশ