কাঠমাণ্ডু, ০৬ এপ্ৰিল (হি.স.)। কম্বোডিয়াত ভিছা অবিহনে বসবাস কৰি থকা ৭ গৰাকী নেপালী নাগৰিকক উদ্ধাৰ কৰা হৈছে। থাইলেণ্ডৰ বেংককত থকা নেপালী দূতাবাসে কম্বোডিয়া চৰকাৰ আৰু প্ৰবাসী নেপালী সন্থাৰ সহযোগত আজি তেওঁলোকক নেপাললৈ ঘূৰাই পঠিয়াইছে ।

দূতাবাসৰ মতে, এই নাগৰিকসকল অবৈধ অনলাইন কেলেংকাৰী কেন্দ্ৰ, কেচিনো ভিত্তিক অনলাইন জালিয়াতি আৰু অন্যান্য অবৈধ কাৰ্য্যকলাপত নিয়োজিত আছিল। দূতাবাসে লগতে জনাইছে যে এতিয়াও কম্বোডিয়াত আৱদ্ধ হৈ আছে একাংশ নেপালী নাগৰিক। তেওঁলোকক চিনাক্ত কৰি নেপাললৈ ঘূৰাই অনাৰ প্ৰচেষ্টা অব্যাহত আছে।

দূতাবাসৰ বিবৃতিটোত উল্লেখ কৰা হৈছে যে নেপালী নাগৰিকসকলক অনলাইন জালিয়াতিৰ দৰে অবৈধ কামত নিয়োজিত কৰা হয় তথা ভিছা অবিহনে বা ভিছাৰ অতিৰিক্ত সময়লৈ তাত থাকে। দূতাবাসৰ মতে, কেলেংকাৰী কেন্দ্ৰত কাম কৰাসকলৰ পাছপ’ৰ্ট কোম্পানীসমূহে জব্দ কৰা বা এটা কেন্দ্ৰৰ পৰা আন এটা কেন্দ্ৰলৈ বদলি কৰাৰ সময়ত হেৰুৱাই পেলোৱাৰ অভিযোগ উত্থাপন হৈছে। বেংককত থকা নেপাল দূতাবাসে নেপাললৈ উভতি যাব বিচৰা নাগৰিকসকলক বিনামূলীয়া একমুখী ভ্ৰমণৰ অনুমতি প্ৰদান কৰিছে । লগতে নেপাল চৰকাৰে নিৰ্ধাৰণ কৰা মাপকাঠী অনুসৰি শ্ৰমিকৰ অনুমতি পত্ৰ লাভ কৰাৰ পিছতহে সকলো নাগৰিককে বহিঃৰাজ্যত কৰ্মসংস্থাপন বিচাৰিবলৈ অনুৰোধ জনাইছে ।

हिन्दुस्थान समाचार