তেহৰাণ/টেল আভিভ/ৱাশ্বিংটন, ০৬ এপ্ৰিল (হি.স.)। ইৰাণৰ বিৰুদ্ধে ২৮ ফেব্ৰুৱাৰীত আৰম্ভ হোৱা আমেৰিকা-ইজৰাইলৰ ঐক্যবদ্ধ সামৰিক অভিযানে সম্প্ৰতি সমগ্ৰ পশ্চিম এছিয়াত সংকটৰ সৃষ্টি কৰিছে। তেহৰানে ৱাশ্বিংটনৰ মঙলবাৰে হৰমুজ জলদ্বীপ মুকলি কৰাৰ সময়সীমা নাকচ কৰাৰ পিছত আমেৰিকা আৰু ইজৰাইলে ইৰাণৰ ওপৰত দ্ৰুত আক্ৰমণ চলাইছে। ইয়াৰ ফলত ৩৪ জন লোকৰ মৃত্যু হয়।

আনহাতে এই আক্ৰমণৰ প্ৰত্যুত্তৰ জনাই ইৰাণে ইজৰাইল আৰু উপসাগৰীয় আৰব প্ৰতিবেশী দেশসমূহৰ ওপৰত ক্ষেপণাস্ত্ৰ নিক্ষেপ কৰে। আমেৰিকাৰ ৰাষ্ট্ৰপতি ড’নাল্ড ট্ৰাম্পে মঙলবাৰৰ ভিতৰত ইৰাণে হৰমুজ জলদ্বীপ মুকলি নকৰিলে ইৰাণৰ বিদ্যুৎ কেন্দ্ৰ ধ্বংস কৰাৰ হুংকাৰ দিছিল । এই সন্দৰ্ভত ইৰাণে তীব্ৰ প্ৰতিক্ৰিয়া প্ৰকাশ কৰি ট্ৰাম্পৰ ভাবুকিৰ প্ৰতি কোনো গুৰুত্ব নিদিয়ে বুলি উল্লেখ কৰিছে। আমেৰিকা আৰু ইজৰাইলক উপযুক্ত উত্তৰ দিবলৈ সাজু আছে ।

ইৰাণত গোটেই নিশা বিস্ফোৰণৰ প্ৰতিধ্বনি:

আল জাজিৰাৰ মতে সমগ্ৰ তেহৰাণতে বিস্ফোৰণৰ প্ৰতিধ্বনিত হৈছিল আৰু ৰাজধানীত অবিৰত আক্ৰমণৰ মাজতে ঘণ্টাৰ পিছত ঘণ্টা ধৰি নিম্নভাগত উৰি যোৱা যুঁজাৰু বিমানৰ গৰ্জন শুনা গৈছিল। এটা বিমান আক্ৰমণে চহৰখনৰ আজাদী চৌহদৰ সমীপৰ শ্বৰীফ ইউনিভাৰ্চিটি অৱ টেকন’লজি কেম্পাছক লক্ষ্য কৰি লৈছিল।

হাইফাত আক্ৰমণ, দুজন নিহত:

ইজৰাইলৰ বিষয়াসকলৰ মতে ইৰাণে হাইফাৰ এটা আৱাসিক অট্টালিকাক লক্ষ্য কৰি লৈছিল। ধ্বংসাৱশেষৰ পৰা উদ্ধাৰ হৈছে দুজন লোকৰ মৃতদেহ। আন দুজনৰ সন্ধান এতিয়াও অব্যাহত আছে। সোমবাৰে পুৱা ইৰাণে উত্তৰ ইজৰাইলৰ এই চহৰখনলৈ আন এক ৰাউণ্ড ক্ষেপণাস্ত্ৰ নিক্ষেপ কৰে।

কুৱেইট আৰু সংযুক্ত আৰব আমিৰশ্বাহীত বায়ু প্ৰতিৰক্ষা সক্ৰিয়: ইৰাণৰ পৰা অহা ক্ষেপণাস্ত্ৰ আৰু ড্ৰোনক বাধা দিবলৈ কুৱেইট আৰু সংযুক্ত আৰব আমিৰশ্বাহীয়ে নিজৰ বায়ু প্ৰতিৰক্ষা সক্ৰিয় কৰিছে। ইফালে, তেহৰানে হৰমুজ জলদ্বীপৰ মাজেৰে সামুদ্ৰিক পৰিবহণৰ ক্ষেত্ৰত নিজৰ দখল শিথিল হোৱাৰ কোনো লক্ষণ দেখা পোৱা নাই। উল্লেখযোগ্য যে ২৮ ফেব্ৰুৱাৰীত শত্ৰুতা আৰম্ভ হোৱাৰ আগতে এই জলপথটো সম্পূৰ্ণ মুকলি আছিল।

উপসাগৰীয় অঞ্চলত ইৰাণৰ আক্ৰমণ অব্যাহত আছে:

কুৱেইটৰ বিদ্যুৎ, পানী বিশুদ্ধকৰণ আৰু তেল কেন্দ্ৰত আক্ৰমণ কৰা হৈছে। ইৰাণে বাহৰেইনৰ এটা তেলৰ সুবিধাক লক্ষ্য কৰি লৈছে। ইৰাকৰ চুলাইমানিয়াতো ড্ৰ’নে আক্ৰমণ কৰিছে। উত্তৰ ইৰাকৰ কুৰ্দি অঞ্চলতো সশস্ত্ৰ ইৰাণ বিৰোধী কুৰ্দি গোটৰ লক্ষ্যস্থানত আক্ৰমণ কৰা হৈছে।

বেৰচেবাত ক্ষেপণাস্ত্ৰৰ গুলী: আজি পুৱা ইৰাণে দক্ষিণ ইজৰাইলৰ কেইবাখনো চহৰত ক্ষেপণাস্ত্ৰ নিক্ষেপ কৰে। এই আক্ৰমণৰ ফলত বেৰচেবাত ছাইৰেন আৰম্ভ হয়। আজি পুৱাৰে পৰা ইজৰাইলক লক্ষ্য কৰি ইৰাণৰ ধাৰাবাহিক আক্ৰমণৰ শেহতীয়া।

ইউ এ ইৰ টেলিকম কোম্পানী ডি ইউৰ ওপৰত আক্ৰমণঃ

ইৰাণে ইউ এ ইৰ টেলিকম কোম্পানী ডি ইউৰ ওপৰত আক্ৰমণ। বিষয়াসকলৰ মতে, ইৰাণৰ পৰা উৎক্ষেপণ কৰা ড্ৰ’নে টেলিকম কোম্পানী এটাৰ ভৱনটোক লক্ষ্য কৰি লৈছিল। এই আক্ৰমণত কোনো লোক আহত হোৱাৰ খবৰ পোৱা নাই।

ছৌদি আৰবে দুখন ড্ৰ’ন ধ্বংস কৰিলে, ইজৰাইলৰ লেবাননত বোমা বৰ্ষণ:

যোৱা কেইঘণ্টামানৰ ভিতৰত দুখন ড্ৰ’ন ধ্বংস কৰিলে ছৌদি প্ৰতিৰক্ষা মন্ত্ৰালয়ে। ইজৰাইলে দক্ষিণ লেবাননৰ কাফৰ ৰুমান চহৰত বোমা বৰ্ষণ কৰে। এই বোমা বিস্ফোৰণৰ কৱলত পৰি গাড়ী এখনত থকা চাৰিজন লোক নিহত হয়।

ইৰাণত সন্দেহজনক লোকক ফাঁচীঃ

ইৰাণত সামৰিক জ’নত প্ৰৱেশৰ চেষ্টা চলোৱাৰ অভিযোগত এজন সন্দেহযুক্ত লোকক ফাঁচী দিয়া হয়। এই ঘটনা জানুৱাৰী মাহত সংঘটিত হৈছিল। ঘটনাৰ লগত জড়িত আন দুজন লোকক এদিন পূৰ্বে ফাঁচী দিয়া হৈছিল। ইছলামিক ষ্টুডেণ্টছ নিউজ এজেন্সীয়ে ন্যায়পালিকাৰ উদ্ধৃতি দি কয় যে আলী ফাহিমক উচ্চতম ন্যায়ালয়ে দোষী সাব্যস্ত কৰিছে। এমেনেষ্টী ইণ্টাৰনেশ্যনেলকে ধৰি মানৱ অধিকাৰ সংগঠনসমূহে এই ফাঁচীক গৰিহণা দিছে। জানুৱাৰী মাহৰ পৰা আৰম্ভ হোৱা এই অশান্তি অৰ্থনৈতিক দুৰ্দশাৰ ফলত ক্ৰমান্বয়ে দেশজোৰা আন্দোলনৰ ৰূপ লয়। ১৯৭৯ চনৰ বিপ্লৱৰ পিছত ইৰাণত সংঘটিত হোৱা আটাইতকৈ হিংসাত্মক সংঘৰ্ষত হাজাৰ হাজাৰ লোকৰ মৃত্যু হৈছিল।

ভাবুকিৰ সন্মুখীন হৈছে ইৰাণৰ বিদ্যুৎ কেন্দ্ৰ আৰু দলংঃ

চিবিএছ নিউজৰ এক প্ৰতিবেদন অনুসৰি ৰাষ্ট্ৰপতি ড’নাল্ড ট্ৰাম্পে কঠোৰভাৱে উল্লেখ কৰিছে যে যদি ইৰাণে হৰমুজ জলদ্বীপ পুনৰ মুকলি নকৰে তেন্তে মঙলবাৰে ইয়াৰ দলং আৰু বিদ্যুৎ কেন্দ্ৰসমূহ লক্ষ্য কৰি লোৱা হ’ব। অৱশ্যে ইৰাণে ট্ৰাম্পৰ এই সতৰ্কবাণী নাকচ কৰিছে। পেন্টাগনৰ তথ্য অনুসৰি ইৰাণৰ বিৰুদ্ধে আমেৰিকাৰ অভিযানত মুঠ ৩৬৫ জন আমেৰিকান জোৱান আহত হৈছে।

তেহৰাণৰ শ্বৰীফ বিশ্ববিদ্যালয়ৰ এক বৃহৎ অংশ ধ্বংসঃ

আমেৰিকা আৰু ইজৰাইলৰ আক্ৰমণত তেহৰানৰ শ্বৰীফ টেকন’লজি বিশ্ববিদ্যালয়ৰ এক বৃহৎ অংশ ধ্বংস হৈছে। দুয়োপক্ষই গোটেই নিশা আন্তঃগাঁথনিৰ লক্ষ্য লৈছিল, য’ত বিশ্ববিদ্যালয়, চিকিৎসালয়, বিদ্যালয়ৰ লগতে তেল আৰু তীখা সম্পৰ্কীয় আন্তঃগাঁথনিও আছিল। ইৰাণৰ কাৰাজ, শ্বিৰাজ, ইছফাহান, বুশ্বেহৰ আদি চহৰত আক্ৰমণ অব্যাহত আছে আৰু এই চহৰসমূহৰ যথেষ্ট ক্ষতিসাধন হৈছে। বান্দাৰ-ই লেংগেহত ছয়জন লোকৰ মৃত্যু হয়। ক’মত আন পাঁচজন লোক নিহত হয়। ৰাজধানী তেহৰাণৰ দক্ষিণ প্ৰান্তৰ বাহাৰেস্তানত ১৩ জন লোকৰ মৃত্যু হয়। যোৱা নিশাৰ পৰা আমেৰিকা-ইজৰাইলৰ আক্ৰমণত নিহত হোৱা মুঠ লোকৰ সংখ্যা ৩৪ জনলৈ বৃদ্ধি পাইছে।

हिन्दुस्थान समाचार / অৰৱিন্দ