নগাঁও, ০৫ এপ্ৰিল (হি.স.)। অসম চৰকাৰৰ মন্ত্ৰী পীয়ুষ হাজৰিকাই ধনদাতা আৰু ড্ৰাগছ সৰবৰাহকাৰীৰ বিৰুদ্ধে কঠোৰ ব্যৱস্থা গ্ৰহণৰ আশ্বাস দি ৰাইজক সঠিক সিদ্ধান্ত ল’বলৈ আহ্বান জনাইছে।
যোৱা নিশা নগাঁৱত এখন নিৰ্বাচনী সভাত ভাষণ দি সাংবাদিকৰ আগত এই মন্তব্য কৰে মন্ত্ৰী পীয়ুষ হাজৰিকাই। ইয়াৰ পূৰ্বে নগাঁৱৰ উৰিয়াগাঁৱৰ ভূপেন হাজৰিকা থিয়েটাৰত অনুষ্ঠিত এক সভাত তেওঁ নগাঁও-বটাদ্ৰৱা বিধানসভা সমষ্টিৰ পৰা বিজেপি প্ৰাৰ্থী ৰূপক শৰ্মাৰ সমৰ্থনত প্ৰচাৰ চলায়। তেওঁ কয় যে ধনদাতা আৰু ড্ৰাগছ সৰবৰাহৰ সৈতে জড়িত উপাদানসমূহ জিলাখনত পুনৰ উত্থান হ’বলৈ দিয়া নহ’ব।
কংগ্ৰেছক লক্ষ্য কৰি হাজৰিকাই কয় যে দলটোৱে ২৪খন আসন লাভ কৰাৰ দাবীক লৈ সন্দেহ প্ৰকাশ কৰিছে। লগতে তেওঁ দাবী কৰে যে ৰহাৰ পৰা বিজেপি প্ৰাৰ্থী শশীকান্ত দাসৰ জয় নিশ্চিত আৰু মধ্য অসমৰ সকলো আসন মিত্ৰজোঁটৰ হাতলৈ যাব।
ৰাজ্যবাসীয়ে হিমন্ত বিশ্ব শৰ্মাক পুনৰ মুখ্যমন্ত্ৰী হিচাপে বিচাৰে আৰু তেওঁৰ নেতৃত্বত চৰকাৰ গঠন হ’ব বুলিও মন্তব্য কৰে। ৰহাৰ চাপৰমুখত আন এক সমাৱেশত হাজৰিকাই প্ৰতিশ্ৰুতি দিয়ে যে যদি বিজেপিয়ে চৰকাৰ গঠন কৰে তেন্তে অহা পাঁচ বছৰত ₹১৮,০০০ কোটি টকা ব্যয় কৰি অসম বানমুক্ত হ’ব। লগতে ৰহা অঞ্চলৰ সকলো মথাউৰি নিৰ্মাণৰ আশ্বাস দি অহা বছৰৰ পৰা জলসিঞ্চনৰ ক্ষেত্ৰত বিশেষ গুৰুত্ব দিয়া হ’ব বুলিও কয়।
কংগ্ৰেছক সমালোচনা কৰি তেওঁ কয় যে দলটো ক্ষমতালৈ আহিলে অৰুণোদয়ৰ দৰে জনকল্যাণমূলক আঁচনি বন্ধ হৈ যাব আৰু সেইবাবে কংগ্ৰেছক ভোট দিয়া মানে ভোট নষ্ট কৰা।
উল্লেখ্য যে ১০ হাজাৰৰো অধিক লোকে অংশগ্ৰহণ কৰা এই সমাৱেশত বিভিন্ন দলৰ বহু কৰ্মীয়ে বিজেপিত যোগদান কৰে। ইয়াৰ পিছতে দক্ষিণপাটত আন এক নিৰ্বাচনী সভাত ভাষণ দিয়ে মন্ত্ৰীগৰাকীয়ে।
हिन्दुस्थान समाचार / মনোজ কুমাৰ শইকীয়া