কাঠমাণ্ডু, ২৯ এপ্ৰিল (হি.স.)। নেপাল চৰকাৰে মুকলি প্ৰতিযোগিতাৰ জৰিয়তে ৰাষ্ট্ৰদূত নিযুক্তিৰ প্ৰস্তুতি আৰম্ভ কৰিছে। যোৱা সোমবাৰে মন্ত্ৰালয়ৰ উচ্চপদস্থ বিষয়াসকলৰ সৈতে আলোচনাৰ সময়ত বৈদেশিক মন্ত্ৰী শিশিৰ খানালে এই সন্দৰ্ভত শীঘ্ৰে বিজ্ঞাপন জাৰি কৰা হ’ব বুলি ইংগিত দিয়ে।

খানালৰ মতে, তেওঁ প্ৰধানমন্ত্ৰী বলেন্দ্ৰ শ্বাহৰ সন্মতি লাভ কৰিছে। যদি এনেকুৱা হয়, তেন্তে বালেন্দ্ৰ শ্বাহৰ অধীনত চৰকাৰ গঠনৰ পিছত এইবাৰ প্ৰথমবাৰৰ বাবে মুকলি প্ৰতিযোগিতাৰ জৰিয়তে ৰাষ্ট্ৰদূত নিযুক্তি দিয়া হ’ব । ইয়াৰ পূৰ্বে কে পি শৰ্মা অলি নেতৃত্বাধীন চৰকাৰে ২০১৮ চনত ৰাজনৈতিক কোটাৰ জৰিয়তে নিযুক্তি পোৱা ৰাষ্ট্ৰদূতৰ বাবেও মাপকাঠী নিৰ্ধাৰণ কৰিছিল ।

ৰাষ্ট্ৰদূত নিযুক্তিৰ নিৰ্দেশনা অনুসৰি মুঠ খালী ৰাষ্ট্ৰদূতৰ পদৰ কমেও ৫০ শতাংশ বিদেশ সেৱা নিযুক্তিৰ জৰিয়তে আৰু বাকী ৫০ শতাংশ ৰাজনৈতিক নিযুক্তিৰ জৰিয়তে পূৰণ কৰিব লাগিব । পূৰ্বৰ চৰকাৰসমূহে কেতিয়াও মুকলি প্ৰতিযোগিতাৰ জৰিয়তে ৰাষ্ট্ৰদূত নিযুক্তি দিয়া নাছিল। এতিয়ালৈকে বৈদেশিক পৰিক্ৰমা মন্ত্ৰালয়ত কৰ্মৰত কেৰিয়াৰ কূটনীতিবিদ আৰু শাসকীয় দলে নিৰ্বাচিত কৰাসকলকহে ৰাষ্ট্ৰদূত নিযুক্তি দিয়া হৈছে।

কেৰিয়াৰ কূটনীতিবিদৰ মাজৰ পৰা ৫০ শতাংশতকৈ অধিক ৰাষ্ট্ৰদূত নিযুক্তি দিবলৈ মন্ত্ৰী খানালক পুনৰ আহ্বান জনাইছে বৈদেশিক মন্ত্ৰালয়ৰ বিষয়াসকলে। ইচ্ছুক প্ৰাৰ্থীসকলে মুকলি প্ৰতিযোগিতাৰ বিজ্ঞাপনত বয়স, অভিজ্ঞতা, শিক্ষাগত অৰ্হতা আদি তথ্য দিব লাগিব বুলি প্ৰস্তুতি চলি আছে ।

हिन्दुस्थान समाचार / মনোজ কুমাৰ শইকীয়া