হামিৰপুৰ, ২৮ এপ্ৰিল (হি.স.)। উত্তৰ প্ৰদেশৰ হামিৰপুৰ জিলাৰ কানপুৰ-সাগৰ ৰাষ্ট্ৰীয় ঘাইপথত সোমবাৰে নিশা সংঘটিত দুৰ্ঘটনাত চাৰিজন বিবাহ অতিথি নিহত হয়। নিহতসকলৰ ভিতৰত সহবালা (দৰাৰ ভাতৃ)ও আছিল। দুৰ্ঘটনাৰ খবৰ বিয়পি পৰাৰ লগে লগে দুয়োখন গাঁৱতে শোক বিয়পি পৰে। কইনাৰ বিদায় হ’ব নোৱাৰিলে। দৰাৰ ভাতৃ আৰু অন্যান্য বিবাহ অতিথিক কঢ়িয়াই অনা ইকো ভ্যানৰ সৈতে এখন তীব্ৰবেগী ট্ৰাকৰ মুখামুখি সংঘৰ্ষত সংঘটিত হয় এই দুৰ্ঘটনা। এই দুৰ্ঘটনাত আন তিনিজন বিবাহ অতিথিও আহত হয়। এই তথ্য লাভ কৰাৰ লগে লগে ঘটনাস্থলীত উপস্থিত হয় জিলা দণ্ডাধীশ অভিষেক গোৱেল আৰু আৰক্ষী অধীক্ষক মৃগাং শেখৰ পাঠক। ট্ৰাক চালকজনক গ্ৰেপ্তাৰ কৰা হৈছে।
আৰক্ষীয়ে জনোৱা মতে, হামিৰপুৰ জিলাৰ কুৰাৰা থানা এলেকাৰ ডাম্মাৰ গাঁৱৰ নিবাসী ৰমাকান্ত কুশৱাহাই মহোবা জিলাৰ কাবৰাই থানা এলেকাৰ পাহাৰা গাঁৱৰ নিবাসী সন্ত্ৰম কুশৱাহাৰ কন্যা অঞ্জুৰ সৈতে বাগ্দান কৰিছিল। সোমবাৰে নিশা বিবাহ শোভাযাত্ৰা গাঁৱৰ পৰা ওলাই ব্যক্তিগত বাহনেৰে কাবৰাইলৈ গৈ আছিল। দৰাৰ ভাতৃ শশীকান্ত ওৰফে আশীষ (২২) আত্মীয়ৰ সৈতে কমলেশ যাদৱৰ ইকো ভ্যানত যাত্ৰা কৰিছিল। মৌদাহা আৰক্ষী থানা এলেকাৰ চিৰকা গাঁৱৰ সমীপত পেট্ৰল পাম্পত উপস্থিত হোৱাৰ লগে লগে কাবৰাইৰ পৰা কানপুৰ অভিমুখে গৈ থকা এখন শিলগুটি ভৰ্তি ট্ৰাকে খুন্দা মাৰে।
আৰক্ষীয়ে জনোৱা মতে, ভ্যানখন সম্পূৰ্ণৰূপে ধ্বংস হৈছে। দৰাৰ ভাতৃ শশীকান্ত, ৰামসেৱক, কমল যাদৱ আৰু ৰিঠহৰি গাঁৱৰ নিবাসী জিতেন্দ্ৰৰ পুত্ৰ মোহনৰ থিতাতে মৃত্যু হয়। উৰ্দনা গাঁৱৰ বাসিন্দা গণেশৰ পুত্ৰ দিলীপ কুমাৰ, টিণ্ডুহি গাঁৱৰ নিবাসী ৰাধেশ্যামৰ পুত্ৰ ৰোহিত আৰু ডামাৰ গাঁৱৰ বাবু গুৰুতৰভাৱে আহত হয়। তথ্য লাভ কৰাৰ লগে লগে মৌদহা থানাৰ ভাৰপ্ৰাপ্ত বিষয়া সন্তোষ সিং ঘটনাস্থলীত উপস্থিত হয়। জিলা দণ্ডাধীশ (ডি এম) আৰু আৰক্ষী অধীক্ষক (এছ পি)ও উপস্থিত হয়। আৰক্ষীয়ে ভ্যানত আবদ্ধ হৈ থকা আহতসকলক উদ্ধাৰ কৰি চিকিৎসালয়লৈ লৈ যায়।
দুৰ্ঘটনাত ভাতৃ আৰু আত্মীয়ৰ মৃত্যুৰ খবৰ পোৱাৰ লগে লগে দৰা কান্দোনত ভাঙি পৰে আৰু কইনাৰ গাঁৱত শোক বিয়পি পৰে। সৰলতাৰে পৰিচালিত হৈছিল বিবাহ অনুষ্ঠান। কইনাক বিদায় দিয়া নহ’ল। জিলা দণ্ডাধীশ অভিষেক গোৱেলে উল্লেখ কৰে যে এই দুৰ্ঘটনাত চাৰিজন লোকৰ মৃত্যু হোৱাৰ বিপৰীতে আন তিনিজন বিবাহ অতিথি আহত হয়। দুৰ্ঘটনা সংঘটিত হোৱাৰ পিছতে ট্ৰাক চালকজনক জিম্মাত লোৱা হয়।
हिन्दुस्थान समाचार / মনোজ কুমাৰ শইকীয়া
