পৰিচালক ৰাজকুমাৰ হিৰানীৰ ছুপাৰহিট ছবি ‘৩ ইডিয়টছ’ৰ ছিকুৱেল সন্দৰ্ভত দীৰ্ঘদিনীয়া জল্পনা-কল্পনাৰ মাজতে অভিনেতা আমিৰ খানে এটা ডাঙৰ আপডেট প্ৰদান কৰিছে । আমিৰে নিশ্চিত কৰে যে ‘৩ ইডিয়টছ ২’ৰ কাম আৰম্ভ হৈছে আৰু আনকি তেওঁ প্ৰাৰম্ভিক চিত্ৰনাট্যও শুনিছে । অভিনেতাগৰাকীৰ মতে, ছবিখন প্ৰথম খণ্ডৰ প্ৰায় দহ বছৰ আগতেই হ’ব, য’ত ৰাঞ্চো, ফাৰহান, ৰাজুৰ জীৱনৰ এক নতুন অধ্যায়ৰ চিত্ৰণ কৰা হ’ব ।
এক সাক্ষাৎকাৰত আমিৰ খানে প্ৰকাশ কৰে যে ৰাজকুমাৰ হিৰাণীয়ে বৰ্তমান ছবিখনৰ চিত্ৰনাট্যৰ কাম কৰি আছে। তেওঁ কয় যে কাহিনীটো অতি আকৰ্ষণীয় আৰু প্ৰথমখন ছবিক বিশেষ কৰি তোলাৰ দৰেই হাস্যৰস আৰু আৱেগিক গভীৰতা আছে। আমিৰে স্বীকাৰ কৰে যে চিত্ৰনাট্যৰ কিছু কাম বাকী আছে, কিন্তু তেওঁ এতিয়ালৈকে শুনা কথাবোৰত অতিশয় আপ্লুত হৈছে।
আমিৰে লগতে স্পষ্ট কৰি দিয়ে যে তেওঁ নিজৰ জনপ্ৰিয় চৰিত্ৰ ফুনছুখ ৱাংডুক ছবিখনত পুনৰ অভিনয় কৰিবলৈ উৎসাহিত। তেওঁৰ মতে, এইখন ছবিৰ সৈতে তেওঁ অতি সোনকালে জড়িত হ’ব বিচৰা অন্যতম ছবি। খবৰ ওলাইছে যে আৰ মাধৱন, শৰ্মান যোশী আৰু কৰীনা কাপুৰো ছিকুৱেলত ঘূৰি আহিব পাৰে যদিও এই বিষয়ত আনুষ্ঠানিক ঘোষণা এতিয়াও বাকী আছে ।
২০০৯ চনত মুক্তি পোৱা ৩ ইডিয়টছক হিন্দী চিনেমাৰ অন্যতম সফল ছবি হিচাপে গণ্য কৰা হয় । চেতন ভগতৰ উপন্যাসৰ আধাৰত নিৰ্মিত এই ছবিখনে শিক্ষা ব্যৱস্থাক ব্যংগ কৰি দৰ্শকৰ হৃদয়ত এক বিশেষ স্থান দখল কৰিছিল । এতিয়া ইয়াৰ ছিকুৱেলৰ খবৰে পুনৰবাৰ দৰ্শকৰ মাজত কৌতুহল বৃদ্ধি কৰিছে ।
हिन्दुस्थान समाचार / মনোজ কুমাৰ শইকীয়া
