কলকাতা, ২৭ এপ্ৰিল (হি.স.)। পশ্চিম বংগ বিধানসভাৰ দ্বিতীয় পৰ্যায়ৰ নিৰ্বাচনৰ প্ৰচাৰৰ অন্তিম দিনটোত সকলো দলে যৎপৰোনাস্তি চেষ্টা কৰা দেখা গৈছে। এনে পৰিপ্ৰেক্ষিতত উত্তৰ প্ৰদেশৰ মুখ্যমন্ত্ৰী যোগী আদিত্যনাথে সোমবাৰে হুগলীৰ বিখ্যাত তাৰকেশ্বৰ মন্দিৰ দৰ্শন কৰি ভগৱান শিৱৰ আৰাধনা কৰে।
ইয়াৰ পূৰ্বে ভাৰতীয় জনতা পাৰ্টিৰ প্ৰাৰ্থী অনুপম বিশ্বাসৰ সমৰ্থনত কল্যাণীত ৰোডশ্ব' অনুষ্ঠিত কৰিছিল। শ্ব’টোৰ সময়ত আদিত্যনাথে তৃণমূল কংগ্ৰেছ চৰকাৰক তুষ্টিকৰণৰ অভিযোগ উত্থাপন কৰি তীব্ৰ আক্ৰমণ চলায়।
তেওঁ কয় যে মমতা বেনাৰ্জীয়ে ৰাজপথত নামাজ আগবঢ়ায় আৰু ইফতাৰ (ৰোজা) অনুষ্ঠানৰ আয়োজন কৰে। যিকোনো হিন্দু উৎসৱৰ আগতেই জাৰি কৰা হয় কাৰ্ফিউ। লাভ জেহাদ আৰু ভূমি জেহাদৰ ঘটনা সংঘটিত হয়। এই সকলোবোৰৰ মাজতো তৃণমূল কংগ্ৰেছ নিমাত হৈ আছে।
উত্তৰ প্ৰদেশৰ মুখ্যমন্ত্ৰীগৰাকীয়ে কয় যে ২০১৭ চনৰ পূৰ্বে উত্তৰ প্ৰদেশতো একেধৰণৰ পৰিস্থিতি আছিল। গুণ্ডাগিৰি আছিল আৰু মাফিয়াই সমান্তৰাল চৰকাৰ চলাইছিল। ভূমি জেহাদ ব্যাপক আছিল। উৎসৱৰ আগতেই সংঘৰ্ষ আৰম্ভ হৈছিল। ২০১৭ চনত উত্তৰ প্ৰদেশত দুই ইঞ্জিনৰ এখন চৰকাৰ ক্ষমতালৈ আহে। গুণ্ডাগিৰিৰ অন্ত পৰিল, কাৰ্ফিউ শেষ হ’ল, সংঘৰ্ষ শেষ হ’ল। লাভ জেহাদ আৰু লেণ্ড জেহাদ সম্পূৰ্ণৰূপে নিষিদ্ধ কৰা হৈছে। কোনো মাফিয়াই কোনো ব্যৱসায়ীক ভাবুকি দিব নোৱাৰে। যদি কৰে তেন্তে উত্তৰ প্ৰদেশৰ বুলডজাৰে তেওঁলোকৰ হাড় থেতেলিয়াই পেলাব। পশ্চিমবংগত বিজেপি চৰকাৰ ক্ষমতালৈ অহাৰ পাছত অসামাজিক উপাদান ৰোধ কৰা হ’ব আৰু কাকো গুণ্ডাগিৰিত লিপ্ত হ’বলৈ দিয়া নহ’ব বুলিও তেওঁ উল্লেখ কৰে ।
हिन्दुस्थान समाचार / অৰৱিন্দ
