নতুন দিল্লী, ২৭ এপ্ৰিল (হি.স.)। পাকিস্তান আৰু বাংলাদেশত সংখ্যালঘুৰ বিৰুদ্ধে চলি থকা মানৱ অধিকাৰ উলংঘাক লৈ বিশ্ব হিন্দু পৰিষদে গভীৰ উদ্বেগ প্ৰকাশ কৰি ৰাষ্ট্ৰসংঘৰ পৰা তাৎক্ষণিক আৰু ফলপ্ৰসূ হস্তক্ষেপৰ দাবী জনাইছে।
ভিএইচপিৰ আন্তঃৰাষ্ট্ৰীয় সভাপতি তথা জ্যেষ্ঠ অধিবক্তা আলোক কুমাৰে ৰাষ্ট্ৰসংঘৰ সাধাৰণ পৰিষদৰ সভানেত্ৰী এনালেনা বেয়াৰবকলৈ এখন পত্ৰ লিখি দুয়োখন দেশতে বিশেষকৈ হিন্দু, শিখ, বৌদ্ধ আৰু খ্ৰীষ্টান সম্প্ৰদায়ৰ বিৰুদ্ধে চলি থকা নিৰ্যাতন, বলপূৰ্বক ধৰ্মান্তৰকৰণ আৰু হিংসাৰ ওপৰত আলোকপাত কৰিছে।
ভিএইচপিৰ ৰাষ্ট্ৰীয় মুখপাত্ৰ বিনোদ বংছালে সোমবাৰে সংবাদ মাধ্যমলৈ প্ৰকাশ কৰা এখন পত্ৰত ৰাষ্ট্ৰসংঘৰ মানৱ অধিকাৰ ব্যৱস্থাৰ শেহতীয়া প্ৰতিবেদন আৰু বিশেষজ্ঞৰ মন্তব্যৰ উদ্ধৃতি দি কয় যে পাকিস্তানত নাবালক ছোৱালীৰ বলপূৰ্বক ধৰ্মান্তৰকৰণ আৰু বিবাহৰ গোচৰ ভয়ংকৰভাৱে বৃদ্ধি পাইছে। এই ক্ষেত্ৰত ভুক্তভোগীসকলৰ অধিকাংশই হিন্দু আৰু খ্ৰীষ্টান সম্প্ৰদায়ৰ। বিশেষকৈ সিন্ধ প্ৰদেশত এনে ঘটনাৰ প্ৰাদুৰ্ভাৱ ঘটিছে। ভুক্তভোগীয়ে শাৰীৰিক, মানসিক, সামাজিক নিৰ্যাতনৰ সন্মুখীন হয়। এনে গোচৰত পাকিস্তানৰ আইন প্ৰয়োগকাৰী সংস্থাৰ সঁহাৰিও কেতিয়াবা অপৰ্যাপ্ত বুলি অভিহিত কৰা হৈছে।
পত্ৰখনত বাংলাদেশত ধৰ্মীয় সংখ্যালঘু বিশেষকৈ হিন্দুৰ বিৰুদ্ধে হিংসা আৰু বৈষম্যৰ অসংখ্য গোচৰৰ উল্লেখ কৰা হৈছে। প্ৰতিবেদনসমূহে ইংগিত দিয়ে যে কেৱল ২০২৪ চনৰ আগষ্ট মাহৰ ভিতৰত সংখ্যালঘু সম্প্ৰদায়ক লক্ষ্য কৰি সাম্প্ৰদায়িক হিংসাৰ বৃহৎ সংখ্যক কাণ্ড লিপিবদ্ধ কৰা হৈছে। আলোক কুমাৰে উল্লেখ কৰে যে এই ঘটনাসমূহৰ স্থায়িত্ব আৰু ব্যাপকতাই সংখ্যালঘুসকলৰ অধিকাৰ সুৰক্ষিত কৰাৰ বাবে বৰ্তমানৰ ব্যৱস্থাসমূহ অপৰ্যাপ্ত হোৱাৰ ইংগিত দিয়ে। তেওঁ লগতে এই গুৰুতৰ মানৱ অধিকাৰ উলংঘা ৰোধৰ বাবে সুনিৰ্দিষ্ট আৰু ফলপ্ৰসূ পদক্ষেপ গ্ৰহণৰ দায়িত্ব আন্তঃৰাষ্ট্ৰীয় সমাজ আৰু ৰাষ্ট্ৰসংঘৰ বুলিও আলোকপাত কৰে।
ভিএইচপিয়ে ৰাষ্ট্ৰসংঘৰ সন্মুখত চাৰিটা মূল দাবী উত্থাপন কৰিছে: সংখ্যালঘুৰ বিৰুদ্ধে বলপূৰ্বক ধৰ্মান্তৰকৰণ আৰু হিংসাৰ স্বতন্ত্ৰ আৰু নিৰপেক্ষ আন্তঃৰাষ্ট্ৰীয় তদন্ত, ভুক্তভোগীৰ সুৰক্ষা আৰু ন্যায় নিশ্চিত কৰাৰ বাবে এক বিশেষ ব্যৱস্থা স্থাপন, আন্তঃৰাষ্ট্ৰীয় মানৱ অধিকাৰৰ মানদণ্ড অনুসৰি সংশ্লিষ্ট দেশসমূহক জবাবদিহি কৰা, আৰু মহিলা আৰু নাবালকসকলক সুৰক্ষা প্ৰদানৰ বাবে কঠোৰ আইনী আৰু প্ৰতিষ্ঠানিক ব্যৱস্থা ৰূপায়ণ কৰা। ভিএইচপিয়ে ৰাষ্ট্ৰসংঘক এই বিষয়টোক অগ্ৰাধিকাৰ দিবলৈ আহ্বান জনায় আৰু ক্ষতিগ্ৰস্ত সম্প্ৰদায়সমূহৰ জীৱন, স্বাধীনতা, মৰ্যাদা আৰু অধিকাৰ সুৰক্ষিত কৰাৰ বাবে তৎকালীন আৰু সুনিৰ্দিষ্ট ব্যৱস্থা গ্ৰহণ কৰাটো নিশ্চিত কৰে।
हिन्दुस्थान समाचार / মনোজ কুমাৰ শইকীয়া
