শিমলা, ২৭ এপ্ৰিল (হি.স.)। হিমাচল প্ৰদেশ ভ্ৰমণৰ বাবে সোমবাৰে শিমলাত উপস্থিত হয় ৰাষ্ট্ৰপতি দ্ৰৌপদী মুৰ্মু। ৰাজধানীৰ আন্নাডেল হেলিপেডত ৰাজ্যখনৰ শীৰ্ষ নেতৃত্ব আৰু সেনাৰ জ্যেষ্ঠ বিষয়াসকলে তেওঁক উষ্ম আদৰণি জনায়।
ৰাষ্ট্ৰপতিগৰাকীৰ শিমলাত উপস্থিত হোৱাত হিমাচল প্ৰদেশৰ ৰাজ্যপাল কবিন্দৰ গুপ্তা, মুখ্যমন্ত্ৰী সুখবিন্দৰ সিং চুখু, কেবিনেট মন্ত্ৰী অনিৰুদ্ধ সিং, ৰাজ্যসভাৰ সাংসদ সুৰেশ কাশ্যপ, বিধানসভাৰ অধ্যক্ষ কুলদীপ সিং পাথানিয়াকে ধৰি বহু গণ্যমান্য ব্যক্তি উপস্থিত থাকে। সেনাবাহিনীৰ হৈ সেনা প্ৰশিক্ষণ কমাণ্ডৰ মুখ্য কৰ্মচাৰী লেফটেনেণ্ট জেনেৰেল দেৱেন্দ্ৰ শৰ্মাইও ৰাষ্ট্ৰপতিগৰাকীক আদৰণি জনায়।
শিমলাত উপস্থিত হোৱাৰ পিছত ৰাষ্ট্ৰপতিগৰাকীয়ে পোনে পোনে মাছোব্ৰাৰ ৰাষ্ট্ৰপতিৰ আৱাসলৈ আগবাঢ়ি যায়, য’ত তেওঁ থকাৰ সময়ছোৱাত থাকিব। এই ভ্ৰমণ ৰাষ্ট্ৰপতিৰ গ্ৰীষ্মকালীন ভ্ৰমণৰ অংশ, যিটো ২৭ এপ্ৰিলৰ পৰা ১ মে’লৈকে চলিব।
এই ভ্ৰমণৰ সময়ত ৰাষ্ট্ৰপতিগৰাকীৰ ব্যস্ততা থাকিব বুলি আশা কৰা হৈছে। ২৮ এপ্ৰিলত ৰাজ্যপালৰ আয়োজনত শিমলাৰ ৰাজভৱন লোক ভৱনত অনুষ্ঠিত হ’বলগীয়া আনুষ্ঠানিক ভোজত অংশগ্ৰহণ কৰিব, য’ত ৰাজ্যৰ বহু বিশিষ্ট ব্যক্তি উপস্থিত থাকিব। ২৯ এপ্ৰিলত ৰাষ্ট্ৰপতিগৰাকীয়ে কুল্লুৰ অটল সুৰংগ পৰিদৰ্শন কৰি লাহাউল-স্পিটি জিলাৰ ছিছুত সীমান্ত পথ সংস্থাৰ বিষয়াসকলৰ সৈতে সাক্ষাৎ কৰি প্ৰকল্পটো পৰ্যালোচনা কৰিব।
অহা ৩০ এপ্ৰিলত পালামপুৰত চৌধুৰী সৰৱান কুমাৰ হিমাচল প্ৰদেশ কৃষি বিশ্ববিদ্যালয়ৰ ১৭ সংখ্যক সমাৱৰ্তন অনুষ্ঠানত অংশগ্ৰহণ কৰিব ৰাষ্ট্ৰপতিগৰাকীয়ে। মাছোব্ৰাস্থিত ৰাষ্ট্ৰপতিৰ বাসগৃহতো এক অভ্যৰ্থনা অনুষ্ঠান আয়োজন কৰিব। এই ভ্ৰমণৰ সময়ত তেওঁ শিমলাৰ আৰ্মি ট্ৰেইনিং কমাণ্ড (আৰ টি আৰ ই চি)ও পৰিদৰ্শন কৰিব আৰু সেনাৰ প্ৰশিক্ষণ কাৰ্যসূচীত অংশগ্ৰহণ কৰিব।
ৰাষ্ট্ৰপতিৰ এই ভ্ৰমণৰ পৰিপ্ৰেক্ষিতত ইতিমধ্যে নিৰাপত্তাৰ ব্যৱস্থা সন্দৰ্ভত শিমলাৰ প্ৰশাসন উচ্চ সতৰ্কতা অৱলম্বন কৰিছে। নিৰাপত্তাৰ উদ্দেশ্যে শিমলাত মোতায়েন কৰা হৈছে এক হাজাৰ আৰক্ষী জোৱান।
हिन्दुस्थान समाचार / মনোজ কুমাৰ শইকীয়া
