নতুন দিল্লী, ২৭ এপ্ৰিল (হি.স.)। উদ্যোগপতি বিনা মোডী আৰু জ্যেষ্ঠ অধিবক্তা ললিত ভাছিনৰ বিৰুদ্ধে সমীৰ মোদীয়ে দাখিল কৰা গোচৰ খাৰিজ কৰিলে দিল্লী উচ্চ ন্যায়ালয়ে। সমীৰ মোদীয়ে গোচৰটো প্ৰত্যাহাৰ কৰাৰ কথা আদালতক অৱগত কৰাৰ পিছতে ন্যায়াধীশ সৌৰভ বেনাৰ্জীৰ বিচাৰপীঠে এই নিৰ্দেশ জাৰি কৰে।
সোমবাৰে শুনানিৰ সময়ত ভিডিঅ’ কনফাৰেন্সিঙৰ জৰিয়তে আদালতত হাজিৰ হয় বীনা মোডী, সমীৰ মোডী, আৰু ললিত ভাছিনে। সকলো পক্ষৰ সৈতে কথা পতাৰ পিছত আদালতে লক্ষ্য কৰে যে কোনো চুক্তিপত্ৰ বা কোনো চুক্তিবদ্ধ ধন অবিহনে নিষ্পত্তি কৰা হৈছে। আদালতে সমীৰ মোডীক সোধা-পোছা কৰে যে তেওঁ কোনো বন্দোবস্তত উপনীত হৈছে নেকি? মোদীয়ে উত্তৰ দিলে যে তেওঁ নিজৰ গোচৰ প্ৰত্যাহাৰ কৰিছে। ইয়াৰ পিছতে সমীৰ মোদীয়ে দাখিল কৰা গোচৰ খাৰিজ কৰাৰ নিৰ্দেশ দিয়ে আদালতে।
ইয়াৰ পূৰ্বে ১৮ মাৰ্চত উচ্চ ন্যায়ালয়ে সমীৰ মোদীয়ে বিচাৰ আদালতত দাখিল কৰা আবেদনৰ কাৰ্য্যবিধিৰ ওপৰত অন্তৱৰ্তীকালীন স্থগিতাদেশ প্ৰদান কৰিছিল। ফেব্ৰুৱাৰী মাহত সমীৰ মোডীয়ে দাখিল কৰা এফআইআৰত দিল্লী আৰক্ষীয়ে দাখিল কৰা অভিযোগনামাৰ সন্দৰ্ভত সাকেট আদালতে সচেতন হৈ বিনা মোডী, তেওঁৰ ব্যক্তিগত নিৰাপত্তা বিষয়া সুৰেন্দ্ৰ প্ৰসাদ আৰু ললিত ভাছিনক চমন জাৰি কৰিছিল। তিনিওজনৰ বিৰুদ্ধে ২০২৪ চনত সমীৰ মোডীক আক্ৰমণ কৰাৰ অভিযোগ।
দিল্লী আৰক্ষীৰ তথ্য অনুসৰি ২০২৪ চনৰ ৩০ মে’ত গডফ্ৰে ফিলিপছ ইণ্ডিয়া লিমিটেডৰ গেটত কৰ্তব্যৰত আছিল সুৰেন্দ্ৰ প্ৰসাদ।জাছ’লাৰ ওমাক্স চ’কত চলি আছিল কোম্পানীটোৰ ব’ৰ্ডৰ বৈঠক। ব’ৰ্ডৰ বৈঠকৰ সময়ত ব্যক্তিগত নিৰাপত্তাৰক্ষী বিষয়াজনে নিজৰ কৰ্তব্য পালন কৰি থকাৰ সময়তে সমীৰ মোডী আহি উপস্থিত হৈ বৈঠক অনুষ্ঠিত হোৱা কোঠাটোত তলা লগোৱা হ’লেও বলপূৰ্বকভাৱে ব’ৰ্ডৰ বৈঠকত প্ৰৱেশ কৰিবলৈ চেষ্টা কৰে। ব্যক্তিগত নিৰাপত্তাৰক্ষী বিষয়াজন কোঠাটোৰ গেট আৰু সমীৰ মোডীৰ মাজত আহিছিল, তাৰ পিছত সমীৰ মোদীয়ে ব্যক্তিগত নিৰাপত্তাৰক্ষীৰ কলাৰত ধৰি আক্ৰমণ কৰে।
সমীৰ মোদীয়ে দাখিল কৰা এফআইআৰত উল্লেখ কৰা হৈছে যে তেওঁৰ ওপৰত আক্ৰমণৰ পৰিকল্পনা তেওঁৰ মাতৃ বিনা মোদীয়ে কৰিছিল। তেওঁৰ অভিযোগত সমীৰ মোদীয়ে উল্লেখ কৰিছে যে বীনা মোডী আৰু কোম্পানীটোৰ ব’ৰ্ডৰ সদস্যসকল অতিশয় প্ৰভাৱশালী। গতিকে তেওঁলোকৰ বিৰুদ্ধে ব্যৱস্থা গ্ৰহণ কৰিব লাগে। ইতিমধ্যে কোম্পানীটোৰ আধিপত্যক লৈ বিনা মোডী আৰু তেওঁৰ পৰিয়ালৰ মাজত বিবাদৰ সৃষ্টি হৈছে ।
हिन्दुस्थान समाचार / মনোজ কুমাৰ শইকীয়া
