নতুন দিল্লী, ২৭ এপ্ৰিল (হি.স.)। চাৰিধাম যাত্ৰা সুচাৰুৰূপে চলাৰ বাবে উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে ১০০% বাণিজ্যিক এল পি জি চিলিণ্ডাৰ যোগানৰ বাবে অনুৰোধ জনাইছে। সোমবাৰে নতুন দিল্লীৰ কৰ্তব্য ভৱনত কেন্দ্ৰীয় পেট্ৰলিয়াম আৰু প্ৰাকৃতিক গেছ মন্ত্ৰী হৰদীপ সিং পুৰীৰ সৈতে সাক্ষাৎ কৰি এই বিষয়ে বিতং চৰ্চা কৰে ।
মুখ্যমন্ত্ৰীয়ে উল্লেখ কৰে যে এপ্ৰিলৰ পৰা নৱেম্বৰলৈ চলিব লগা চাৰিধাম যাত্ৰাৰ সময়ত ভাৰত আৰু বিদেশৰ লাখ লাখ তীৰ্থযাত্ৰী উত্তৰাখণ্ডত উপস্থিত হয়, যাৰ ফলত বাণিজ্যিক এল পি জিৰ চাহিদা যথেষ্ট বৃদ্ধি পায়। এই সময়ছোৱাত ৰাজ্যখনত প্ৰায় ৯৬৭,৯৪৯টা বাণিজ্যিক চিলিণ্ডাৰৰ প্ৰয়োজন। নিৰৱচ্ছিন্ন যোগান বজাই ৰখাটো অতি প্ৰয়োজনীয়।
জুনৰ পৰা ছেপ্টেম্বৰৰ ভিতৰত বাৰিষা হোৱা সম্ভাৱ্য প্ৰাকৃতিক দুৰ্যোগৰ কথা উল্লেখ কৰি পুষ্কৰ সিং ধামীয়ে কয় যে পাহাৰীয়া অঞ্চলত সাহায্য আৰু উদ্ধাৰ অভিযানত এল পি জিয়ে গুৰুত্বপূৰ্ণ ভূমিকা পালন কৰে। এই সময়ছোৱাৰ বাবে প্ৰায় ৫ শতাংশ (প্ৰায় ৪৮,৩৯৭ চিলিণ্ডাৰ) অতিৰিক্ত আবণ্টন নিশ্চিত কৰিবলৈও অনুৰোধ জনায়।
মুখ্যমন্ত্ৰীয়ে কয় যে উত্তৰাখণ্ডৰ অৰ্থনীতি মূলতঃ পৰ্যটন, বিশেষকৈ ধৰ্মীয় আৰু দুঃসাহসিক পৰ্যটনৰ ওপৰত ভিত্তি কৰি গঢ় লৈ উঠিছে। চাৰি ধাম যাত্ৰা ৰাজ্যৰ বিশ্বাস, সাংস্কৃতিক পৰিচয়, অৰ্থনৈতিক কাৰ্যকলাপৰ এক প্ৰধান স্তম্ভ, গতিকে প্ৰয়োজনীয় সম্পদৰ উপলব্ধতা অত্যন্ত গুৰুত্বপূৰ্ণ।
কেন্দ্ৰীয় মন্ত্ৰী হৰদীপ সিং পুৰীয়ে মুখ্যমন্ত্ৰীয়ে উত্থাপন কৰা প্ৰস্তাৱসমূহৰ ইতিবাচক বিবেচনাৰ আশ্বাস দিয়ে। কেন্দ্ৰীয় চৰকাৰ ৰাজ্যৰ স্বাৰ্থৰ প্ৰতি দায়বদ্ধ আৰু প্ৰয়োজনীয় ব্যৱস্থা গ্ৰহণ নিশ্চিত কৰিছে বুলিও তেওঁ কয়।
हिन्दुस्थान समाचार / অৰৱিন্দ
