কামৰূপ, ২৬ এপ্ৰিল (হি.স.): ৰঙালী বিহুৰ ৰঙৰ বিপৰীতে শুক্রবাৰে নিশা তামুলপুৰত বিহুৱা দল দুৰ্ঘটনাত পতিত হোৱাৰ ভয়াৱহ ঘটনাই শোকাহত কৰি তুলিছে ৰাজ্যবাসীক । ভাস্কৰজ্যোতি বিহু হুঁচৰি দলটি শুক্রবাৰ নিশা তামুলপুৰ-নাগ্রীজুলী পথৰ নোৱাখাটত ভয়াৱহ দুৰ্ঘটনাত পতিত হৈ দুৰ্ঘটনাস্থলীতে বিহুৱতী গায়িকা তথা জনপ্ৰিয় পাঠিকা নিশামণি হালৈয়ে মৃত্যুক সাৱটি লোৱাৰ সমান্তৰালকৈ গুৰুতৰভাৱে আহত হয় আন কেবাগৰাকীও শিল্পী ৷
ভয়ংকৰ দুৰ্ঘটনাটিত গুৰুতৰভাৱে আহত হৈ বৰ্তমানেও ৰঙিয়াৰ স্বস্তি হাস্পাতালত চিকিৎসাধীন হৈ আছে দলটোৰ অন্যান্য বিহুৱা-বিহুৱতী সকল । শিল্পী সকলৰ আশু আৰোগ্য কামনা কৰি চিকিৎসালয়খনত যোৱা কালি শনিবাৰে সন্ধিয়া উপস্থিত হয় স্থানীয় বিধায়ক ভবেশ কলিতা ৷ বিধায়ক গৰাকীয়ে শিল্পী সকলৰ স্বাস্থ্য পৰিস্থিতিৰ বুজ লোৱাৰ লগতে মৃতকৰ পৰিয়াললৈও গভীৰ সমবেদনা জ্ঞাপন কৰে।
হিন্দুস্থান সমাচাৰ / কিশোৰ মিশ্ৰ
