নতুন দিল্লী, ২৬ এপ্ৰিল (হি.স.)। আন্তঃৰাষ্ট্ৰীয় নিৰ্বাচনী দৰ্শনাৰ্থী কাৰ্যসূচীৰ অধীনত নিৰ্বাচন আয়োগে তামিলনাডু আৰু পশ্চিম বংগৰ প্ৰথম পৰ্যায়ৰ বিধানসভা নিৰ্বাচনৰ সময়ত ১৬খন দেশৰ ৩২ গৰাকী আন্তঃৰাষ্ট্ৰীয় প্ৰতিনিধিক নিৰ্বাচনী প্ৰক্ৰিয়াৰ প্ৰত্যক্ষ দৃষ্টিভংগী প্ৰদান কৰে। প্ৰতিনিধিসকলে দেশৰ স্বচ্ছ, পদ্ধতিগত, আৰু ব্যাপক নিৰ্বাচনী প্ৰক্ৰিয়াক প্ৰশংসা কৰে।
নিৰ্বাচন আয়োগৰ মতে, ২২ আৰু ২৩ এপ্ৰিলত তামিলনাডু আৰু পশ্চিম বংগ ভ্ৰমণৰ সময়ত এই প্ৰতিনিধিসকলে ভোটগ্ৰহণ কেন্দ্ৰ, প্ৰেৰণ কেন্দ্ৰ আৰু নিৰীক্ষণ ব্যৱস্থা পৰিদৰ্শন কৰে। তেওঁলোকে নিৰ্বাচনী প্ৰক্ৰিয়াক গণতন্ত্ৰৰ প্ৰকৃত উদযাপন বুলি অভিহিত কৰি অভিলেখ সৃষ্টিকাৰী ভোটাৰৰ ভোটদান, নিখুঁত পৰিকল্পনা, আৰু মসৃণ আচৰণৰ প্ৰশংসা কৰে।
ভ্ৰমণৰ আৰম্ভণিতে প্ৰতিনিধিসকলে ডিচপেচ আৰু বিতৰণ কেন্দ্ৰসমূহ পৰিদৰ্শন কৰে, য’ত তেওঁলোকে ভোটগ্ৰহণ দল আৰু নিৰ্বাচনী সামগ্ৰীৰ শৃংখলাবদ্ধ গতিবিধি পৰ্যবেক্ষণ কৰে। ইলেক্ট্ৰনিক ভোটিং মেচিনৰ স্বচ্ছ ব্যৱস্থা আৰু ফলপ্ৰসূ নিৰ্বাচন ব্যৱস্থাপনাৰ প্ৰশংসা কৰে।
প্ৰতিনিধিসকলে ৰাজ্যসমূহৰ মুখ্য নিৰ্বাচনী বিষয়া আৰু জিলা পৰ্যায়ৰ বিষয়াসকলৰ সৈতে বৈঠকত মিলিত হৈ নিৰাপত্তা আৰু নিৰ্বাচনী কাৰ্য্যকলাপৰ পৰ্যালোচনা কৰে। বিশেষকৈ বৃদ্ধ আৰু বিশেষভাৱে সক্ষম ভোটাৰসকলে ঘৰৰ পৰাই ভোটদানৰ সুবিধাৰ বাবে তেওঁলোকে শলাগ লয়।
নিৰ্বাচনৰ দিনা প্ৰতিনিধিসকলে প্ৰাৰম্ভিক পৰীক্ষামূলক ভোটদান প্ৰক্ৰিয়া পৰ্যবেক্ষণ কৰে আৰু তাৰ পিছত বিভিন্ন ভোট কেন্দ্ৰ পৰিদৰ্শন কৰি প্ৰকৃত ভোটদান পৰ্যবেক্ষণ কৰে। তেওঁলোকে ৰেম্প, হুইল চেয়াৰ, স্বেচ্ছাসেৱক আৰু ভোটকেন্দ্ৰত শিশুৰ যত্নৰ দৰে সুবিধাসমূহক অন্তৰ্ভুক্তিৰ উদাহৰণ হিচাপে উল্লেখ কৰে।
সুসংগঠিত আৰু ৰঙীন সংকেতযুক্ত ভোটগ্ৰহণ কেন্দ্ৰ আৰু তামিলনাডুত নূন্যতম নিশ্চিত সুবিধা প্ৰদানৰ প্ৰশংসা হোৱাৰ বিপৰীতে পশ্চিম বংগত স্বাস্থ্য পৰীক্ষা সেৱা আৰু মোবাইল জমা সুবিধাৰ দৰে উদ্ভাৱনক উপযোগী বুলি উল্লেখ কৰা হয়।
প্ৰতিনিধিসকলে ভোটগ্ৰহণ কেন্দ্ৰত ১০০% ৱেবকাষ্ট নিৰীক্ষণ ব্যৱস্থাক স্বচ্ছতাৰ এক শক্তিশালী ভেটি বুলি অভিহিত কৰি নিৰ্বাচনী প্ৰক্ৰিয়াৰ ন্যায্যতাক প্ৰশংসা কৰে।
ইয়াৰ পূৰ্বে ৮ আৰু ৯ এপ্ৰিলত ২২খন দেশৰ ৩৮ জন প্ৰতিনিধিয়ে অসম, কেৰালা, পুডুচেৰীত নিৰ্বাচনী প্ৰক্ৰিয়া পৰ্যবেক্ষণ কৰিছিল। এইদৰে এই কাৰ্যসূচীৰ অধীনত ৩৮খন দেশৰ মুঠ ৭০ জন প্ৰতিনিধিয়ে ভাৰতৰ বিভিন্ন ৰাজ্য আৰু কেন্দ্ৰীয় শাসিত অঞ্চলত নিৰ্বাচনী প্ৰক্ৰিয়া পৰ্যবেক্ষণ কৰিছে।
हिन्दुस्थान समाचार
