নতুন দিল্লী, ২৬ এপ্ৰিল (হি.স.)। তৃণমূল পৰ্যায়ত জৈৱ বৈচিত্ৰ্য সংৰক্ষণক শক্তিশালী কৰি গাঁও পঞ্চায়তৰ উন্নয়ন পৰিকল্পনাত একত্ৰিত কৰাৰ বাবে কেন্দ্ৰীয় চৰকাৰে পাঁচ বছৰীয়া প্ৰকল্প আৰম্ভ কৰিছে। এই পদক্ষেপে স্থানীয় জনগোষ্ঠী, পঞ্চায়ত প্ৰতিষ্ঠান আৰু বিভিন্ন সংস্থাক জড়িত কৰি সংৰক্ষণক প্ৰসাৰিত কৰিব আৰু জীৱিকাৰ সুযোগ বিকশিত কৰিব।
কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয় আৰু ৰাষ্ট্ৰীয় জৈৱ বৈচিত্ৰ্য কৰ্তৃপক্ষই আৰম্ভ কৰা জৈৱ বৈচিত্ৰ্য সংৰক্ষণ প্ৰতিশ্ৰুতিসমূহ সুৰক্ষিত কৰাৰ বাবে প্ৰতিষ্ঠানিক ক্ষমতা শক্তিশালী কৰা প্ৰকল্পটো ২০২৫ চনৰ পৰা ২০৩০ চনলৈ চলিব।
এই প্ৰকল্পটো তামিলনাডু আৰু মেঘালয়ৰ দুটা গুৰুত্বপূৰ্ণ পৰিৱেশ অঞ্চলত ৰূপায়ণ কৰা হ’ব: তামিলনাডুৰ পশ্চিম আৰু পূব ঘাটৰ সংগমস্থলীত অৱস্থিত সত্যমংগলম লেণ্ডস্কেপ, য’ত মুডুমলাই বাঘ সংৰক্ষিত বনাঞ্চল আৰু সত্যমংগলম বাঘ সংৰক্ষিত বনাঞ্চল অন্তৰ্ভুক্ত। এই বনাঞ্চলসমূহৰ সৈতে জড়িত জনগোষ্ঠীসমূহৰ অংশগ্ৰহণেৰে গ্ৰাম পঞ্চায়তৰ উন্নয়ন পৰিকল্পনাত জৈৱ বৈচিত্ৰ্য সংৰক্ষণ অন্তৰ্ভুক্ত কৰা হ’ব। মেঘালয়ৰ গাৰো হিলছ অঞ্চলত নোক্ৰেক বায়’স্ফিয়াৰ ৰিজাৰ্ভ, বালপাক্ৰাম ৰাষ্ট্ৰীয় উদ্যান, আৰু ছিজু বন্যপ্ৰাণী অভয়াৰণ্যৰ জৰিয়তে সম্প্ৰদায় পৰ্যায়ৰ সংৰক্ষণক প্ৰসাৰিত কৰা হ’ব।
স্থানীয় উন্নয়ন পৰিকল্পনাত জৈৱ বৈচিত্ৰ্যক সন্নিৱিষ্ট কৰি পঞ্চায়তীৰাজৰ প্ৰতিষ্ঠান আৰু জৈৱ বৈচিত্ৰ্য ব্যৱস্থাপনা সমিতিসমূহক সবলীকৰণ কৰাটোৱেই এই প্ৰকল্পৰ প্ৰধান উদ্দেশ্য। বন বিভাগ, ৰাজহ বিভাগ, জনপ্ৰতিনিধি, আৰু নাগৰিক সমাজক একত্ৰিত কৰি সম্প্ৰদায়ভিত্তিক সংৰক্ষণ পৰিকল্পনা প্ৰস্তুত কৰা হ’ব। ইয়াৰ উপৰিও প্ৰকল্পটোৱে সংৰক্ষণক সহায় কৰিবলৈ আৰু স্থানীয় লোকসকলৰ বাবে বহনক্ষম জীৱিকা প্ৰদান কৰিবলৈ প্ৰৱেশ আৰু সুবিধা ভাগ-বতৰা কৰাৰ ব্যৱস্থা, কৰ্পৰেট সামাজিক দায়বদ্ধতা সহযোগিতা, আৰু সেউজ ক্ষুদ্ৰ উদ্যোগৰ জৰিয়তে উদ্ভাৱনীমূলক বিত্তীয় ব্যৱস্থা বিকশিত কৰিব।
জ্ঞান ব্যৱস্থাপনা আৰু সামৰ্থ্য বিকাশও প্ৰকল্পটোৰ মূল দিশ, এই ক্ষেত্ৰসমূহত দেশজুৰি বিকশিত আৰ্হি আৰু উদ্ভাৱনসমূহ ৰূপায়ণৰ প্ৰচেষ্টা। মহিলা, অনুসূচিত জাতি, আৰু জনজাতীয় সম্প্ৰদায়ৰ অংশগ্ৰহণ আৰু সবলীকৰণৰ ওপৰত বিশেষ গুৰুত্ব দিয়া হয়।
মন্ত্ৰালয়ে উল্লেখ কৰে যে এই পদক্ষেপ তলৰ পৰা ওপৰলৈ ভিত্তি কৰি লোৱা হৈছে, য’ত পঞ্চায়ত প্ৰতিষ্ঠানসমূহে মূল ভূমিকা পালন কৰিছে। এই প্ৰকল্পই ভাৰতৰ নবীকৃত ৰাষ্ট্ৰীয় জৈৱ বৈচিত্ৰ্য কৌশল আৰু কাৰ্য্য পৰিকল্পনা (২০২৪-২০৩০), পেৰিছ চুক্তিৰ অধীনত নিৰ্ধাৰিত লক্ষ্য, আৰু বিশ্বব্যাপী জৈৱ বৈচিত্ৰ্য কাঠামোৰ লক্ষ্যসমূহো আগুৱাই নিয়াত সহায় কৰিব।
हिन्दुस्थान समाचार / মনোজ কুমাৰ শইকীয়া
