- অপাৰেচন লোটাছে বিধায়কৰ বিৰুদ্ধে কাম কৰিব নোৱাৰিলে, গতিকে সাংসদসকলক সাঙোৰা হ’ল; পঞ্জাৱৰ জনসাধাৰণে এই বিশ্বাসঘাতকসকলক শিক্ষা দিব

চণ্ডীগড়, ২৪ এপ্ৰিল (হি.স.)। পঞ্জাৱৰ মুখ্যমন্ত্রী ভগৱন্ত মানে দলৰ পৰা পদত্যাগ কৰা ৰাজ্যসভাৰ সাংসদসকলক পঞ্জাৱ আৰু পাঞ্জাবীয়ৰ বিশ্বাসঘাতকক আখ্যা দি কয় যে পঞ্জাৱৰ জনসাধাৰণে অতি সোনকালে তেওঁলোকৰ এই কার্যৰ উত্তৰ দিব৷ শুকুৰবাৰে দিল্লীত আম আদমি পাৰ্টিৰ ৰাজ্যসভাৰ সাতজন সাংসদে দলৰ পৰা আঁতৰি যোৱাৰ কথা ঘোষণা কৰে। এই সাতজন সাংসদৰ ভিতৰত ৬ জন পঞ্জাৱৰ।

ৰাজনৈতিক পৰিঘটনাৰ পিছত চণ্ডীগড়ত সাংবাদিকৰ সৈতে হোৱা এক সাক্ষাৎকাৰত মুখ্যমন্ত্ৰী ভগৱন্ত মানে কয় যে সাতজন দেশদ্ৰোহীৰ বিদায়ৰ কোনো পাৰ্থক্য নাই। দলটো সম্পূৰ্ণ শক্তিশালী। পঞ্জাৱৰ আম আদমী পাৰ্টি চৰকাৰে ৩০০ ইউনিট বিনামূলীয়া বিদ্যুৎ যোগান ধৰাৰ লগতে বিদ্যুৎ খণ্ডত পঞ্জাবক স্বাৱলম্বী কৰি তুলিছে বুলি মুখ্যমন্ত্ৰীয়ে কয়। পঞ্জাৱত ১৯ টা টোল টেক্স বিলুপ্ত কৰা হৈছে। কেন্দ্ৰীয় চৰকাৰক আৰ ডি এফৰ ধন ৰখাৰ বাবে আক্ৰমণ কৰি ভগৱন্ত মানে কয় যে পঞ্জাৱত চলি থকা উন্নয়নমূলক কাম-কাজ বিজেপিয়ে হজম কৰিবলৈ অক্ষম। বিজেপিয়ে আৰম্ভণিৰে পৰা পঞ্জাৱৰ জনসাধাৰণক প্ৰতাৰণা আৰু হাৰাশাস্তি কৰি আহিছে।

সমগ্ৰ দেশৰ আন কেইবাখনো ৰাজ্যৰ দুষ্যন্ত চৌটালা নেতৃত্বাধীন জননায়ক জনতা পাৰ্টিকে ধৰি হাৰিয়ানাত বিজেপিয়ে কৰা মিত্ৰতাৰ উদ্ধৃতি দি তেওঁ কয় যে বিজেপিয়ে যিকোনো দলৰ সৈতে মিত্ৰতা কৰিলে বিজেপিয়ে ধ্বংস কৰে। ভগৱন্ত মানে কয় যে পঞ্জাৱত ইয়াৰ পূৰ্বেও এনে এক পৰিঘটনা ঘটিছিল, যেতিয়া সুখপাল সিং খাইৰাই কেইবাজনো বিধায়কক বিচ্ছিন্ন কৰি সুকীয়া ফৈদ গঠন কৰিছিল। ইয়াৰ পূৰ্বেও পঞ্জাৱৰ কেইবাজনো বিধায়কক বিচ্ছেদ কৰিবলৈ বিজেপিয়ে অপাৰেচন লোটাছ আৰম্ভ কৰিছিল যদিও সফল নহ’ল।

দল ত্যাগ কৰা ৰাঘৱ চাদ্ধা, অশোক মিত্তল, সন্দীপ পাঠক, হৰভজন সিং ভজজী, বিক্ৰমজীত সাহনী আৰু ৰাজিন্দৰ গুপ্তাক পঞ্জাৱৰ বৃহত্তম দেশদ্ৰোহী আখ্যা দি তেওঁ কয় যে তেওঁলোক সকলোৱে নিজৰ জীৱন ৰক্ষাৰ বাবে বিজেপিত যোগদান কৰিছে, কিন্তু অতি সোনকালে তেওঁলোক সকলোৱে অনুতাপ কৰিব লাগিব। মনপ্ৰীত বাদল আৰু বিজেপিত যোগদান কৰা কেপ্তেইন অমৰিন্দৰ সিঙৰ দৰে নেতা আজি পঞ্জাৱৰ ৰাজনীতিত এলাগী হৈ পৰিছে। ইডি আৰু অন্যান্য তদন্তকাৰী সংস্থাক প্ৰত্যাহ্বান জনাই ভগৱন্ত মানে কয় যে যেতিয়াই বিচাৰে তেওঁৰ বিৰুদ্ধে তদন্ত কৰিব পাৰে। যোৱা চাৰি বছৰত বহু চেষ্টা কৰা হৈছিল যদিও একো নাপালে তেওঁৰ মানুহক দমন কৰিবলৈ ধৰিলে।

हिन्दुस्थान समाचार / মনোজ কুমাৰ শইকীয়া