কলকাতা, ২৪ এপ্ৰিল (হি.স.)। পশ্চিম বংগৰ নিৰ্বাচনী প্ৰচাৰৰ মাজতে প্ৰধানমন্ত্ৰী নৰেন্দ্ৰ মোডীয়ে অহৰহ বাতৰিৰ শিৰোনাম দখল কৰি আহিছে । ঝাৰগ্ৰামত ঝালমুৰি খোৱাৰ পিছত শুকুৰবাৰে পুৱা দেখা গ’ল প্ৰধানমন্ত্ৰী মোডীক বেলেগ অৱতাৰত । তেওঁ কলকাতাৰ গংগা ঘাটত নাও যাত্ৰা কৰি তাত উপস্থিত থকা লোকসকলক লগ পালে । ঘাটত প্ৰধানমন্ত্ৰীৰ অভাৱনীয় আগমনক চাবলৈ জনসমাগম হয় ।

প্ৰট’কল ভংগ কৰি তেওঁ মানুহক লগ পাইছিল, মত বিনিময় কৰিছিল আৰু এজন মানুহক সাৱটি ধৰিছিল । জীৱনৰ প্ৰত্যাহ্বানৰ কথা ব্যক্ত কৰি মানুহজন আৱেগিক হৈ পৰিল । তেওঁলোকৰ ফটো ভাইৰেল হৈ পৰিল।

বৃহস্পতিবাৰে নাদিয়া আৰু দক্ষিণ ২৪ পৰগনাত ৰাজহুৱা সভাত ভাষণ দি বেলুৰ মঠ ভ্ৰমণ কৰি, হাওৰাত এক বৃহৎ ৰোড শ্ব’ৰ নেতৃত্ব দিয়াৰ পিছত প্ৰধানমন্ত্ৰীয়ে ৰাজভৱন (লোক ভৱন)ত নিশাটো কটায়। ৰাতিপুৱাৰ কিছু সময়ৰ আগতে গংগাৰ পাৰত উপস্থিত হৈ মাতৃ গংগাক শ্ৰদ্ধাঞ্জলি জনায় । তেওঁ নাওঁ চলাবলৈও গৈছিল, হাতত কেমেৰা লৈ সুন্দৰ নদীৰ পাৰ, হাওৰা দলং, চাৰিওফালৰ দৃশ্যপট বন্দী কৰিছিল। এই ফটোবোৰ ক্ষন্তেকতে চচিয়েল মিডিয়াত চৰ্চাৰ বিষয় হৈ পৰিল ।

ফটোসমূহ ইনষ্টাগ্ৰামত শ্বেয়াৰ কৰি প্ৰধানমন্ত্ৰীয়ে লিখিছে যে প্ৰতিজন বাঙালীৰ হৃদয়ত গংগাই এক বিশেষ স্থান দখল কৰিছে । তেওঁ কয় যে গংগা নদী কেৱল নদী নহয়, বংগৰ আত্মাৰ মাজেৰে বৈ যোৱা সাংস্কৃতিক ধাৰা । গংগা মাতৃৰ পবিত্ৰ জলজলে নিজৰ লগত কঢ়িয়াই লৈ ফুৰে এক সমগ্ৰ সভ্যতাৰ চিৰন্তন চেতনা ।

গংগাৰ পাৰত থকা সময়ছোৱাত প্ৰধানমন্ত্ৰী মোদীয়ে স্থানীয় নাৱৰীয়া আৰু মৰ্নিং ৱাকাৰৰ সৈতেও সাক্ষাৎ কৰে । তেওঁ নাৱৰীয়াসকলৰ কঠোৰ পৰিশ্ৰম, অনুশাসন আৰু অধ্যৱসায়ক প্ৰশংসা কৰি তেওঁলোকক প্ৰেৰণাদায়ক বুলি অভিহিত কৰে ।

প্ৰধানমন্ত্ৰীয়ে কয় যে হুগলীৰ পাৰত থকা সময়খিনি মাতৃ গংগাৰ প্ৰতি কৃতজ্ঞতা প্ৰকাশ কৰাৰ এক সুযোগ । পশ্চিম বংগৰ উন্নয়ন আৰু ৰাজ্যৰ জনসাধাৰণৰ সমৃদ্ধিৰ বাবে একেলগে কাম কৰাৰ প্ৰতিশ্ৰুতিও তেওঁ পুনৰবাৰ উল্লেখ কৰে।

উল্লেখযোগ্য যে ইয়াৰ পূৰ্বে বৃহস্পতিবাৰে সন্ধিয়া প্ৰধানমন্ত্ৰীয়ে হাওৰাৰ পৰা কলকাতালৈ এক বৃহৎ ৰোড শ্ব’ অনুষ্ঠিত কৰিছিল, য’ত বিপুল জনসমাগম ঘটিছিল । তেওঁ কয় যে পৰিৱৰ্তনৰ আকাংক্ষা বংগৰ প্ৰতিটো কোণতে স্পষ্টকৈ দেখা যায় । প্ৰধানমন্ত্ৰী নৰেন্দ্ৰ মোদীৰ শুকুৰবাৰে দুখনকৈ ৰাজহুৱা সভাও আয়োজন কৰা হয়।

हिन्दुस्थान समाचार / মনোজ কুমাৰ শইকীয়া