নতুন দিল্লী, ২৪ এপ্ৰিল (হি.স.)। ৰাষ্ট্ৰীয় মানৱ অধিকাৰ আয়োগে ওড়িশাৰ গজপতি জিলাৰ এখন চৰকাৰী প্ৰাথমিক বিদ্যালয়ৰ লোহাৰ গেট ভাঙি দুগৰাকী স্কুলীয়া ছাত্ৰীৰ মৃত্যু হোৱাৰ ঘটনাক বিশেষ গুৰুত্বসহকাৰে লৈছে । এই ঘটনাক গুৰুতৰ বুলি বিবেচনা কৰি আয়োগে ৰাজ্য প্ৰশাসনৰ পৰা বিতং প্ৰতিবেদন বিচাৰিছে।

এন এইচ আৰ চিয়ে শুকুৰবাৰে ওড়িশা চৰকাৰৰ মুখ্য সচিব আৰু গজপতি জিলাৰ আৰক্ষী অধীক্ষকক জাননী জাৰি কৰি দুসপ্তাহৰ ভিতৰত এই বিষয়ত বিতং প্ৰতিবেদন দাখিল কৰিবলৈ নিৰ্দেশ দিয়ে । আয়োগে কয় যে এই কাণ্ডই শিশুৰ সুৰক্ষাৰ ওপৰত গুৰুতৰ প্ৰশ্নৰ উত্থাপন কৰিছে আৰু ইয়াৰ বাবে এক সম্যক তদন্তৰ প্ৰয়োজন ।

আয়োগৰ তথ্য অনুসৰি ২০২৬ চনৰ ১৬ এপ্ৰিলত প্ৰকাশিত সংবাদ মাধ্যমৰ বাতৰিৰ ভিত্তিত এই জ্ঞান লোৱা হৈছে।প্ৰতিবেদন অনুসৰি, ১৫ এপ্ৰিলত ওড়িশাৰ গজপতি জিলাৰ এখন চৰকাৰী প্ৰাথমিক বিদ্যালয়ৰ লোহাৰ মূল গেট হঠাতে ভাঙি দুগৰাকী স্কুলীয়া ছাত্ৰী গুৰুতৰভাৱে আহত হয় ।

ঘটনাৰ লগে লগে দুয়োগৰাকী ছাত্ৰ-ছাত্ৰীক ওচৰৰ চিকিৎসালয়ত ভৰ্তি কৰোৱা হয়, য’ত চিকিৎসকে তেওঁলোকক মৃত ঘোষণা কৰে। এই কৰুণ ঘটনাই অঞ্চলটোত শোক আৰু ক্ষোভৰ পৰিৱেশৰ সৃষ্টি কৰিছে । স্থানীয় ৰাইজে বিদ্যালয়খনৰ নিৰাপত্তাৰ ব্যৱস্থাক লৈ প্ৰশ্ন উত্থাপন কৰি দায়িত্বশীল বিষয়াসকলৰ বিৰুদ্ধে ব্যৱস্থা গ্ৰহণৰ দাবী জনাইছে ।

এন এইচ আৰ চিয়ে নিজৰ জাননীত স্পষ্ট কৰি দিছে যে যদি সংবাদ মাধ্যমৰ বাতৰি সঁচা বুলি ধৰা পৰে তেন্তে ই এক গুৰুতৰ মানৱ অধিকাৰ উলংঘাৰ ৰূপ লয় । শিশুৰ সুৰক্ষা নিশ্চিত কৰাৰ ক্ষেত্ৰত প্ৰশাসনিক গাফিলতিৰ উদ্বেগ প্ৰকাশ কৰি আয়োগে বিশেষভাৱে বিশদ বিৱৰণ বিচাৰিছে ।

আয়োগে এতিয়া ৰাজ্য চৰকাৰৰ পৰা জানিব বিচাৰিছে যে বিদ্যালয় চৌহদত কিয় সুৰক্ষাৰ মানদণ্ড পালন কৰা নহ’ল আৰু দুৰ্ঘটনাৰ বাবে দায়ীসকলৰ বিৰুদ্ধে কি ব্যৱস্থা গ্ৰহণ কৰা হৈছে। প্ৰতিবেদন লাভ কৰাৰ পিছতে আয়োগে পৰৱৰ্তী ব্যৱস্থাৰ সিদ্ধান্ত ল’ব।

हिन्दुस्थान समाचार / মনোজ কুমাৰ শইকীয়া