নতুন দিল্লী, ২৩ এপ্ৰিল (হি.স.)। পশ্চিম এছিয়াত চলি থকা উত্তেজনাৰ বাবে আন্তঃৰাষ্ট্ৰীয় বজাৰত একেৰাহে চতুৰ্থ দিন ধৰি খাৰুৱা তেলৰ মূল্য বৃদ্ধিৰ ধাৰা অব্যাহত ৰাখিছে। আজি প্ৰতি বেৰেলত ব্ৰেণ্ট খাৰুৱা তেলৰ মূল্য ১০৫.৮৬ ডলাৰ হয়। একেদৰে পশ্চিম টেক্সাছ ইণ্টাৰমিডিয়েট (ডব্লিউ টি আই) খাৰুৱা তেলেও প্ৰতি বেৰেলত ১০০ ডলাৰৰ সীমা অতিক্ৰম কৰি প্ৰতি বেৰেলত ৯৭ ডলাৰত উপনীত হয়। কিন্তু পিছত সামান্য হ্ৰাস পোৱা যায়।
আমেৰিকা আৰু ইৰাণৰ মাজত শান্তি আলোচনা স্থগিত ৰখা আৰু হৰমুজ জলদ্বীপ অৱৰোধক লৈ দুয়োখন দেশৰ মাজত হোৱা সংঘাতৰ বাবে এই গুৰুত্বপূৰ্ণ সাগৰীয় পথটোৰ জৰিয়তে খাৰুৱা তেলৰ যোগান কাৰ্যতঃ স্তব্ধ হৈ পৰিছে, অদূৰ ভৱিষ্যতে ইয়াৰ কোনো ধৰণৰ পুনৰ আৰম্ভ হোৱা দেখা নাযায়। এই কাৰণেই খাৰুৱা তেলৰ মূল্য বৃদ্ধিৰ ধাৰা অব্যাহত ৰাখিছে।
আজি ব্ৰেণ্ট খাৰুৱা তেলে প্ৰতি বেৰেলত ১০১.৬৬ ডলাৰত ১০০ ডলাৰৰ ওপৰত ব্যৱসায়িক অধিবেশন আৰম্ভ কৰে। ইয়াৰ কিছু সময়ৰ পিছতে জঁপিয়াই প্ৰতি বেৰেলত ১০৫.৮৬ ডলাৰ হয়। পুৱা ৯:১৫ বজালৈকে ব্ৰেণ্ট খাৰুৱা তেলৰ মূল্য প্ৰতি বেৰেলত ১.৮০ শতাংশ বৃদ্ধিৰে ১০৩.৭৬ ডলাৰ হয়।
একেদৰে আজি ডব্লিউ টি আই খাৰুৱা তেলে প্ৰতি বেৰেলত ৯২ ডলাৰৰ সীমা অতিক্ৰম কৰি প্ৰতি বেৰেলত ৯২.৬৯ ডলাৰত ব্যৱসায়িক অধিবেশন আৰম্ভ কৰে। ইয়াৰ কিছু সময়ৰ পিছতে জপিয়াই প্ৰতি বেৰেলত ৯৭.২২ ডলাৰ হয়। অৱশ্যে পিছত সামান্য হ্ৰাস পোৱাও দেখা যায়। পুৱা ৯:১৫ বজাত ডব্লিউ টি আই খাৰুৱা তেলৰ মূল্য প্ৰতি বেৰেলত ৯৪.৯৭ ডলাৰ, ২.১৩ শতাংশ বৃদ্ধি।
ফেব্ৰুৱাৰী মাহৰ শেষৰ ফালে পশ্চিম এছিয়াত আৰম্ভ হোৱা যুদ্ধই বিশ্বৰ পেট্ৰলিয়াম ভিত্তিক শক্তিৰ বজাৰখন কঁপাই তুলিছে। এই যুদ্ধৰ বাবে হৰমুজ জলদ্বীপ কাৰ্যতঃ বন্ধ হৈ পৰিছে, যাৰ ফলত পাৰ্চী উপসাগৰৰ পৰা তেল আৰু গেছৰ যোগান ভয়ংকৰভাৱে হ্ৰাস পাইছে। ইৰাণক হেঁচা প্ৰয়োগ কৰিবলৈ আমেৰিকাই অৱৰোধ জাৰি কৰিছে। ইফালে ইৰাণেও আন্তঃৰাষ্ট্ৰীয় যাতায়তৰ বাবে হৰমুজ জলদ্বীপ বন্ধ ৰখাৰ চেষ্টা চলাইছে। এই প্ৰচেষ্টাত বুধবাৰে ওমানৰ সমীপৰ মালবাহী জাহাজত গুলীচালনা কৰে ইৰাণৰ বন্দুকৰ নাৱে।
বিশেষজ্ঞসকলে কয় যে আমেৰিকা আৰু ইৰাণৰ মাজত তাৎক্ষণিক শান্তি আলোচনাৰ সম্ভাৱনা নাই। আমেৰিকাৰ ৰাষ্ট্ৰপতি ড’নাল্ড ট্ৰাম্পে যুদ্ধবিৰতি ঘোষণা কৰিছে যদিও হৰমুজ জলদ্বীপত অৱৰোধ অব্যাহত ৰখাৰ প্ৰতিশ্ৰুতি দি উত্তেজনা আৰু অধিক বৃদ্ধি কৰিছে। ইফালে ইৰাণে ধাৰাবাহিকভাৱে আমেৰিকাক কঠোৰ সঁহাৰি জনোৱাৰ প্ৰতিশ্ৰুতি দিছে। ওমানৰ ওচৰৰ মালবাহী জাহাজত গুলীচালনা কৰি ই প্ৰমাণ কৰিছে যে আমেৰিকাৰ ভাবুকিৰ আগত নতশিৰ নহ’ব। এনে পৰিস্থিতিত এই দুয়োখন দেশৰ হঠকাৰী স্থিতিৰ পৰা অনুমান কৰিব পাৰি যে হৰমুজ জলদ্বীপৰ মাজেৰে মালবাহী জাহাজ আৰু তেল টেংকাৰৰ চলাচল তৎক্ষণাত সম্ভৱ নহ’ব। এনে পৰিস্থিতিত খাৰুৱা তেলৰ বিশ্বব্যাপী যোগানৰ সমস্যা অব্যাহত থাকিব, যাৰ ফলত খাৰুৱা তেলৰ মূল্য বৃদ্ধি হ’ব পাৰে।
हिन्दुस्थान समाचार / মনোজ কুমাৰ শইকীয়া
