নতুন দিল্লী, ২২ এপ্ৰিল (হি.স.)। জম্মু-কাশ্মীৰত পেহেলগাম যোৱা বছৰ সংঘটিত হোৱা আক্ৰমণৰ বৰ্ষপূৰ্তি উপলক্ষে উপ-ৰাষ্ট্ৰপতি চি.পি. ৰাধাকৃষ্ণন, প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহ আৰু সমবায় মন্ত্ৰী অমিত শ্বাহে বুধবাৰে শ্ৰদ্ধাঞ্জলি জ্ঞাপন কৰে ।

পেহেলগাম আক্ৰমণক “কাপুৰুষ আৰু নিষ্ঠুৰ কাৰ্য্য” বুলি অভিহিত কৰি উপ-ৰাষ্ট্ৰপতি চি.পি. ৰাধাকৃষ্ণনে কয় যে ইয়াত হেৰুওৱা জীৱনবোৰ সদায় আমাৰ সামূহিক স্মৃতিত জীয়াই থাকিব। নিহতসকলৰ পৰিয়ালৰ সৈতে সংহতি প্ৰকাশ কৰি তেওঁ কয় যে এনে কাৰ্য্যই শান্তি, ঐক্য আৰু মানৱতাৰ মূল্যবোধক ক্ষতিগ্ৰস্ত কৰিব নোৱাৰে। সন্ত্ৰাসবাদৰ সকলো ৰূপ আৰু প্ৰকাশৰ বিৰুদ্ধে যুঁজিবলৈ আমি আমাৰ সংকল্পত অটল হৈ আছো।

তেওঁৰ বাৰ্তাত প্ৰধানমন্ত্ৰী নৰেন্দ্ৰ মোদীয়ে যোৱা বছৰৰ আজিৰ দিনটোতে পেহেলগামত সংঘটিত ভয়ানক সন্ত্ৰাসবাদী আক্ৰমণত প্ৰাণ হেৰুৱা নিৰীহ লোকসকলক শ্ৰদ্ধাঞ্জলি জ্ঞাপন কৰে। ভুক্তভোগীক স্মৰণ কৰি প্ৰধানমন্ত্ৰীয়ে কয় যে তেওঁলোক কেতিয়াও পাহৰিব নোৱাৰিব। তেওঁ এই শোকৰ সময়ত পৰিয়ালৰ সৈতে থিয় দিয়াৰ ৰাষ্ট্ৰৰ অদম্য প্ৰতিশ্ৰুতি পুনৰবাৰ উল্লেখ কৰে।

প্ৰধানমন্ত্ৰী মোদীয়ে জোৰ দি কয় যে এই শোকৰ সময়ত দেশ একত্ৰিত হৈ আছে আৰু সন্ত্ৰাসবাদৰ বিৰুদ্ধে ইয়াৰ সংকল্প অদম্য হৈয়ে আছে। তেওঁ পুনৰ কয় যে দেশখনে কেতিয়াও কোনো ধৰণৰ সন্ত্ৰাসবাদৰ সন্মুখত নতি স্বীকাৰ নকৰে আৰু সন্ত্ৰাসবাদীৰ কুৎসিত পৰিকল্পনা কেতিয়াও সফল নহ’ব। প্ৰধানমন্ত্ৰী মোদীয়ে কয়, এখন ৰাষ্ট্ৰ হিচাপে আমি শোক আৰু দৃঢ়তাৰে একত্ৰিত। ভাৰতে কেতিয়াও কোনো ধৰণৰ সন্ত্ৰাসবাদৰ আগত নতি স্বীকাৰ নকৰে। সন্ত্ৰাসবাদীৰ কুৎসিত পৰিকল্পনা কেতিয়াও সফল নহ'ব।

কেন্দ্ৰীয় গৃহ আৰু সমবায় মন্ত্ৰী অমিত শ্বাহে কয় যে এই আক্ৰমণৰ যন্ত্ৰণা এতিয়াও প্ৰতিজন ভাৰতীয়ৰ হৃদয়ত আছে। সন্ত্ৰাসবাদক “মানৱতাৰ আটাইতকৈ ডাঙৰ শত্ৰু” বুলি অভিহিত কৰি তেওঁ কয় যে দেশখনে ইয়াৰ বিৰুদ্ধে ঐক্যবদ্ধভাৱে যুঁজিব লাগিব। লগতে শ্বাহে স্পষ্ট কৰি দিয়ে যে ভাৰতে সন্ত্ৰাসবাদ আৰু ইয়াক সমৰ্থন কৰাসকলৰ বিৰুদ্ধে শূন্য সহনশীলতা নীতি অব্যাহত ৰাখিব।

উল্লেখযোগ্য যে ২০২৫ চনৰ ২২ এপ্ৰিলত লস্কৰ-ই-তৈয়বা আৰু টি আৰ এফৰ সন্ত্ৰাসবাদীয়ে পেহেলগামৰ বেছাৰণ উপত্যকাত পৰিকল্পিতভাৱে পৰ্যটকৰ ওপৰত আক্ৰমণ চলাই ২৬ জন লোকক হত্যা কৰিছিল । ধৰ্মৰ ওপৰত ভিত্তি কৰি মানুহক লক্ষ্য কৰি সাম্প্ৰদায়িক অশান্তি বিয়পাবলৈ এই আক্ৰমণ সংঘটিত হৈছিল।

हिन्दुस्थान समाचार / অৰৱিন্দ