কাঠমাণ্ডু, ২২ এপ্ৰিল (হি.স.)। নেপাললৈ তিনিদিনীয়া ভ্ৰমণ সমাপ্ত কৰি দেশলৈ উভতি আহিছে দক্ষিণ আৰু মধ্য এছিয়া বিভাগৰ আমেৰিকাৰ সহকাৰী বিদেশ সচিব সমীৰ পল কাপুৰ। এই ভ্ৰমণৰ সময়ত তেওঁ নেপাল-আমেৰিকাৰ অংশীদাৰিত্ব শক্তিশালী কৰাৰ লগতে বাণিজ্যিক সম্পৰ্ক সম্প্ৰসাৰণৰ বিষয়ে আলোচনা কৰিবলৈ উচ্চ পৰ্যায়ৰ বৈঠক অনুষ্ঠিত কৰে। নেপালত থকা আমেৰিকাৰ দূতাবাসে এই তথ্য প্ৰদান কৰে।
ভাৰতীয় মূলৰ কাপুৰে যোৱা ২০ এপ্ৰিলত কাঠমাণ্ডুত উপস্থিত হৈছিল । বালেন চৰকাৰ গঠনৰ পিছত তেওঁ কাঠমাণ্ডু ভ্ৰমণ কৰা আটাইতকৈ জ্যেষ্ঠ বিদেশী কূটনীতিবিদ । কাঠমাণ্ডুত থকা আমেৰিকাৰ দূতাবাসৰ এক বিবৃতিত কোৱা হৈছে যে নেপালত থকা সময়ছোৱাত তেওঁ শাসকীয় নেশ্যনেল ইণ্ডিপেণ্ডেণ্ট পাৰ্টিৰ সভাপতি ৰবি লামিচানে, বৈদেশিক মন্ত্ৰী শিশিৰ খানাল আৰু বিত্তমন্ত্ৰী ড০ স্বৰ্ণিম ৱাগলেৰ সৈতে পৃথকে পৃথকে সাক্ষাৎ কৰিছিল ।
কাপুৰে আগন্তুক আমেৰিকাৰ বিনিয়োগ সন্মিলনত অংশগ্ৰহণ কৰা নেপালী প্ৰতিনিধি দলৰ সৈতে আমেৰিকাৰ বিনিয়োগৰ সম্ভাৱ্য সুযোগৰ বিষয়েও আলোচনা কৰে । ইয়াৰ উপৰিও তেওঁ আমেৰিকা আৰু নেপালৰ ব্যক্তিগত খণ্ডৰ প্ৰতিনিধিৰ সৈতে মত বিনিময় কৰি নেপালৰ দ্ৰুতগতিত বিকাশশীল প্ৰযুক্তি খণ্ডত সহযোগিতাৰ সুযোগ বিচাৰিছিল । ভ্ৰমণৰ সময়ত তেওঁ নেপালৰ ঐতিহাসিক আৰু সাংস্কৃতিক ঐতিহ্যৰ সন্ধানো কৰে, বৌধনাথ স্তুপা আৰু পতন দৰবাৰ চৌহদ পৰিদৰ্শন কৰে। আমেৰিকাই এম্বেছাদৰছ ফাণ্ড ফৰ কালচাৰেল প্ৰিজাৰ্ভেচনৰ জৰিয়তে এই ঐতিহ্য ক্ষেত্ৰসমূহ সংৰক্ষণৰ বাবে সহায় আগবঢ়াই আহিছে ।
हिन्दुस्थान समाचार / মনোজ কুমাৰ শইকীয়া
